Read Southern Rengma Naga JOHAN 18 Bible Online

JOHAN 18 - Southern Rengma Naga bible

JOHAN 18

¹Jisu le jo tsü zokeshü sika a-le senthyükelonyu dan zen-o Kidron züri nken gun. Tsünyu chwi nme le bin, lo Jisu le senthyükelonyu dan zen-o tsünyu gunla.

²Lo a-ten pe me ben nyu keshü gü Judas ko bin tsügü shabin; kechamvule Jisu le senthyükelonyu dan zen-o tsünyu keteno zin kehü genyu.

³Tson-o Judas le Peshükeda dan, lo Farisinyu dan ka shüpahü nyu lo Kershvuka kekhwenyu dan me zen-o teri kanyü lo mahkenbenkhin sen tse tsünyu ryü.

⁴Tsükatsü Jisu le a-ge tha thyü nrün tsü aphu sha-o chwigü anyugun ka, “Hagun le segü fü hü nla?”

⁵Anyugun le a-ka, “Nazaret Jisu.” Lo Jisu le anyugun ka, “Ale tsügü le.” Lo tsükatsü a-ten pe me ben nyu keshü gü Judas ko me zen hü.

⁶Lo Jisu le anyugun ka, “Ale tsügü tsüle,” tsonkeshü ka anyugun le tesen nio kazü nyu chetsü la.

⁷Tsontsin a-le anyugun ka, “Hagun le segü fü hü nla?” tson-o ketso. Lo anyugun le, “Nazaret Jisu.”

⁸Jisu le, “Ale tsügü tsü tse hagun ka zoshü laso,” tsonshü. “Tsonlo hagun le afü hü yatselo, hidan no tinla rilo.”

⁹Tsüle kechamvule a-le himhundyü, “Nle khipe a tsü keshü dan tsü, ale nme-e nmhenla mvu,” tson kethyü jo tsüno penlo nrün genyu.

¹⁰Lo Simon Pitor le zhethon nme sen hüo sütho pe peshükedagü gogü duo a-nyetin njüzin du mhela, gonyu tsügü zan le Melka.

¹¹Jisu le Pitor ka, “Zhethon gü khipe a-khin ka shülo la chi! Pvügü le honpen khipe a tsü keshü gü, ale tsügü tsü tsülo zümvu ole?”

¹²Tsüsika tsü shüpahünyu lo tsüdan so kegon gü lo Judanyu tsonlo nyu dan le Jisu ten pe phinlo.

¹³Tson-o a-zen-o Anna ki ryü; tsügü le tsüchen püshükeda thyü kebin Kaifa a-mi gü genyu.

¹⁴Lo Kaifa tsüle himhundyü Judanyu dan zen-o tedo rhio temi aphu genyu mime no sikela we gwakvu letse kezogü tsü.

¹⁵Lo tsükatsü Simon Pitor le Jisu sithen hü; lo senthyükelo kechanyu nme ko hü, lo senthyükelo tsügü le peshü tsin gü zen-o shahu kethyü genyu Jisu sithen-o püshü gü kamhun tsen nyu yüla.

¹⁶Lo Pitor le kamhun chonrha ki hü. Tsügenyu peshü gü zen kesha kethyü senthyükelo kecha gü le kamhun ki chwiryüo chonrha kekhwen tenugi ka zo-o Pitor ko zen-o yüla.

¹⁷Lo tsükatsü chonrha kekhwen tenugi le Pitor ka, “Nko temi higü senthyükelonyu nme ole?” Lo a-le zo, “Nmvu le.”

¹⁸Lo tsükatsü me gonyu lo melo kethyü nyu tse tsang le kunri kethyü genyu magi pe mah thyü shüo mah habin; lo Pitor ko tsüdan zen-o mah habin.

¹⁹Tsükatsü peshükeda gü le Jisu ka, a-le senthyükelonyu dan lo a-senkethyü jo tse ketso.

²⁰Ai Jisu le a-ka, “Ale kazü hinyu zankechwi thyüshü laso; lo ale Judanyu aphu gü kehun kehü sinagog kanyu lo Kershvuka nyue me senthyü ryü, lo ale kebuo thame zo ryü mvu.

²¹Nyuthyüo aketso hü nla? ale meka nyu zoshü yo ajo keshanyu dan ka ketsolo chi; tsüdan le ajo aphu shabin nyo.”

²²Lo a-le jo tsü zoshü ntsin a-khoka kebin melo kethyü nyu nme le a-benje pe Jisu jüo, “Nle peshükeda tsingü ka hon zo tila?”

²³Jisu le a-ka, “Ale jo gwakemvu zoshülo jo gwakemvu zo hü nletse zoshü ta, ai ale jozo toshü lo, nle nyuthyüo avü hü nla?”

²⁴Tsüselo Anna le Jisu ben phin pe Kaifa ki nishü la.

²⁵Lo tsükatsü Simon Pitor le mah habin. Tsüselo anyugun le a-ka, “Nko a-sikethen nyu nme amon?” Tsüselo Pitor le, “Nmvu le,” tse nila.

²⁶Lo tsüsika ko Peshükedagü gonyu nme Pitor le a-nyetin duthü kela senye nyu nme le, “Nle chwi nyu a-zen kehü ale nhyu mvu ole?”

²⁷Ai Pitor le, “Nmvu le,” tse nila- tsontsin tero khun chwiryü la.

²⁸Tsüselo anyugun le Kaifa kanyu Jisu zen-o Ahng ka ki gunla, lo tsüle lonyü nshwen ka zun. Ai anyugun le nkenkechwi nga chvü tyükenyü genyu anyugun nrhu kela nshvuo anyugun we Ahng kanyu yü mvula.

²⁹Tsügenyu Pilat le chwiryüo anyugun ka, “Hagun le temi higü ge nyu kera ryü la?”

³⁰Anyugun le a-ka, “Temi higü hile temi gwakemvu nyu kemvu we agun le a-ten sen-o nki ryü loho.”

³¹Tsontsin Pilat le anyugun ka, “Hagun a-zen gü hagun npvü hagun jvü nyu a-ketsolo.” Judanyu dan le a-ka, “Agun le temi nme-e boshvu kethyü agun jvu mvu.”

³²(Jisu le nyusi thyüsi mvulo shvuyo tsekethyü no penlo nrün genyu hihontse kela gwünzin.)

³³Lo Pilat le a-raja bin nyu yülo-o Jisu ko-o a-ka, “Nle Judanyu raja gü ole?”

³⁴Jisu le, “Nle n npvü johi zo kehü gwünzin le me kechanyu le a rüla hi lope nka zoshü la?”

³⁵Pilat le a-ka, “Ale Judanyu nme ole? N npvü ntemi peshünyu dan le nten pe aben nyu keshü gwünzin.

³⁶Nle nyuthyüla se ola?” Jisu le a-ka, “A raja we kazü hinyu raja kemvu. A raja le kazü hinyu raja yatselo, meno aten pe Judanyu ki shü mvulo nrün genyu ago dan no me zen kenren loti; ai a raja le hinyu raja kemvu.”

³⁷Tsügenyu Pilat le a-ka, “Tsonlo nle rajanyu nme ole?” Jisu le, “Ele, ale rajanyu le, a nnyukelo lo ale kazü hinyu yhun keryü, kechamvule ketsin gü jünzoshü nrün genyu. Lo ketsin gü kipon kehü nyu aphu a khwenyü hünyo.”

³⁸Pilat le, “Ketsin gü tsüle nyula?”

³⁹Lo a-le jozo keshü siki a-le Judanyu dan ki nichwi gü anyugun ka, “Awe a-ge kemu nme-e hyulo mvu. Ai nkenkechwi nga ka ano temi nme khipe hagun ketsü hagun jvü nyu bin; tsügenyu hagun ano Judanyu rajagü khipe hagun ketsü hagun kendo le mvula?”

⁴⁰Anyugun le nra sen-o, “Temi higü mvule Baraba gü ti!” Baraba tsüle mehon seketyü nyu nme.