Read Southern Rengma Naga JOHAN 2 Bible Online

JOHAN 2 - Southern Rengma Naga bible

JOHAN 2

¹Tson-o jonshen nyü Galil kazü Kana rünyi nyu senhü keho nme thyü; lo Jisu a-jvü le tsünyu bin

²Lo senhü keho tsünyu mele Jisu lo senthyükelonyu aphu ko.

³Lo vain zü le rhori la ntsin, Jisu a-jvü le Jisu ka, “Ngun vain zü le ndi laso.”

⁴Tsontsin Jisu le a-jvü ka, “Tenunyu, nle nyuthyüo a-ka tsonzo hü nla? A gwünkho timvu zun.”

⁵A-jvü le gonyu dan ka, “Jisu le hagun ka lihi zoshüe thyülo nye.”

⁶Lo jon tsükatsü Judanyu le nthyü kenshün jvü genyu zü mon kenyhun kenshen shülo kehü zükhin tsero le bin.

⁷Jisu le anyugun ka, “Hagun zü lü pe zükhin tsü sü külo nye.” Tsüselo anyugun le zü lü pe zükhin dan sükülo.

⁸Tson njüo Jisu le anyugun ka, “Hagun tsü thyülo njüo pen gü keho tsünyu kedagü ki shü nye.” Lo anyugun le pen gun la,

⁹lo keho tsünyu tha ketsen kebin gü le zü pe vain zü kethyü ntsin kethyü ka, dikipon hyulo yo shamvu, (ai gonyu zü lü pvü keryü dan we sha.)

¹⁰Tsükatsü a-le senhü gü koshüo a-ka, “Temi lihigüe süda keho nyu ho nyeka vain zü kegwa khishü tseo, mele tsü sakelo siki we tsünye ki keshvu khishü hü nyo; nwe le ntsokhin-e vain zü kegwa khishü bin zun hile la!”

¹¹Jisu le Galil kazü Kana rünyi nyu a-le nduntho kerigü hi thyüshüo a-kekvu pe me tesha shü; lo a-le senthyü kelonyu dan-e a-tenyenlo.

¹²Tsüselo Jisu le a-jvü lo a-sikezen nyu dan lo senthyükelonyu ju zen-o Kapernaum nyu gun; lo anyugun le tsünyu jon kethonri bin mvu.

¹³Lo Judanyu le Nkenkechwi Nga khonni gun kelo ka Jisu le Jerusalem nyu gun.

¹⁴Tson-o Jisu le Kershvuka nyu mele methu lo tanyü lo paro jwe kebin, lo raka kelu kebin nyu dan hyulo.

¹⁵Tsontsin a-le ron lope thakevü san ge shülo njüo Kershvuka nyu tanyü lo methu aphu kesin hü küla, lo pisa kelu kebin nyu pisa pe jala, tson-o anyugun miz-e boketo la.

¹⁶Tson-o a-le paro jwe kebin nyu dan ka, “Hagun hika hi tha jwen nya, sen-o tinla chi, Apvü ka lope hakethyü ka thyü loho!”

¹⁷Tsükatsü a-sikethen nyu dan le, “Ale nka nyu sherhün kethyü genyu a nke lati,” tson-o thu pe bin kenjü rüchünlo.

¹⁸Judanyu dan le a-ka, “Nle thyü keshü hile nyu zansü thyü pe agun hi hü nla?”

¹⁹Jisu le anyugun ka, “Hagun Kershvuka hi borhola chi, lo ale jonshen nyü thyüni loti.”

²⁰Lo anyugun le, “Judanyu le Kershvuka higü kethyü le chen henzio tsero thyü, lo nle joshen nyü thyüni loti la?”

²¹Ai Jisu le a-thyümin gü kershvuka rüla zoshü.

²²Tsügenyu kesinyu dan nyu Jisu le rhünniso kelo ka a-le jo higü kezo senthyükelonyu dan le rüchünlo; tson-o anyugun le ketsin lesü jo-e lo Jisu le zokeshü jo-e tse tenyenlo.

²³Tsüsika Nkenkechwi Nga ka Jisu le Jerusalem nyu kebin ka nga nyu a-le nduntho thyü keshü hyulo njüo temi kechon le a-zan nyu tenyenlo.

²⁴Ai Jisu le anyugun tenyen ngwa mvu; kechamvule a-le temi aphu rüla sha genyu.

²⁵A-le temi nyun ka nyu le bin yo tse kethyü sha kebin genyu, temi nme-e no temi rüla a-ka kezoi bin ndi.