Read Southern Rengma Naga JOHAN 20 Bible Online

JOHAN 20 - Southern Rengma Naga bible

JOHAN 20

¹Lo Sabbath jon kerinyü tsangzün kebin ka Maria Magdalin le lonyü nshwen ka sika ki gun ntsin sika tso tsüle keto kela hyulo.

²Tsügenyu a-le tin sen-o Simon Pitor lo Jisu le so gunkeryü senthyükelo kechagü au ki ryüo au ka, “Me le sika nyu Npugü pen tinla so, lo agun le me le pen gü dikipon shüla seyo tsekethyü shalo mvu laso.”

³Tsontsin Pitor lo senthyükelo kecha gü au le sika kipon tsü gunla.

⁴Lo tsükatsü au kentsin-o tin gunzhü ntsin senthyükelo kecha gü le Pitor mhundyü rio tin gü sika tilo.

⁵Tson-o tsünyu nkhün tsügü sika nyu shwishü ntsin linen phi le bin-o hyulo; ai a-le a-nyunki yü mvula.

⁶Tsüselo Simon Pitor ko a-siki ryüo sika nyu yü lo a-ko linen phi le kebin tsü hyu.

⁷Tsüntimvule a-pe keje phi keshanyu, linen phi sin bin mvuo keju pe nme ki bin njü.

⁸Lo tsüsiki sika nyu ri gunkeryü senthyükelo kecha gü ko yügü hyulo-o tenyenlo.

⁹Kechamvule anyugun le a-le kesinyu dan nyu rhünni solo mvulo shvu tsekethyü ketsinlesü jo shalo mvuzun kethyü genyu.

¹⁰Tson-o senthyükelo tsühvu le au npvü au ka ki gunla.

¹¹Lo Maria we sika soki chü bin; lo a-le chü bin nsen nkhün tsügü shwishü

¹²tsontsin tsangge lonyu mihvu le phinya kechon ben-o Jisu min lope keshü bin ka nme le a-pe zin lo nme le a-pha zin tse bin-o hyulo.

¹³Lo tsühvu le a-ka, “Tenunyu, nle nyuthyüo chü hü nla?” Lo a-le au ka, “Me le Npugü pen tin laso, lo pen gü dikipon shüla seyo ale sha kemvu genyu le!”

¹⁴A-le tsonshüo rani gü a-si kipon shwishü ntsin Jisu le bin-o hyulo, ai tsüle Jisu tsekethyü shalo mvula.

¹⁵Jisu le a-ka, “Tenugi, nle nyuthyüo chü hü nla? Nle segü fü hü nla?” A-we tsü le chwi kekhwen gü letseo a-ka, “Kedagü, nle hinyu Npugü pen tinla yatselo, nle pen gü dikipon shüla yo aka zoshü ta; lo ale a-pen gun lati.”

¹⁶Lo tsüka Jisu le a-ka, “Maria, tsonshü.” A-le rani gü Ibrinyu khwen ki a-ka, “Raboni!” (A-kon le, “Senkethyügü.”)

¹⁷Jisu le a-ka, “Nle a kesü nya; ale Apvü ki külo mvu zun. Nle gü a sikezennyu dan ka, ‘Ale Apvü, lo hagun Pvü lo a Sunggigü lo hagun Sunggigü ki gun jüla sele,’ tse zoshü nye.”

¹⁸Maria Magdalin le gü senthyükelo dan ka, ale Npugü hyu le, lo a-le aka, jo hi zoshü tsekethyü zoshü.

¹⁹Lo tsünyü a-kon le Sabbath jon keri nyü ngwün ki a-le senthyükelo dan le Judanyu kenshvu genyu ka khinpvü kebin ka Jisu le ryüo anyugun dan nyu binlo njüo anyugun ka, “Hagun kegwagü thyülo.”

²⁰Lo a-le anyugun ka jo hi kezo ka, a-le a-ben hvu lo a-nyasin-e pe anyugun hishü. Lo senthyükelonyu dan le Npugü kehyu genyu anyugun sherhün thyülo.

²¹Tsügenyu Jisu le anyugun ka, “Hagun kegwagü thyü lo nye! Apvü le a nikeshü hontse ako tsühontse hagun nishü le nye.”

²²Lo a-le jo tsü zokeshü siki a-teshe hen pe anyugun ge shüo anyugun ka, “Hagun Kenshün Kapu gü khilo nye.

²³Hagun le me kemu jü keshü dan tsü jüshü ti; lo hagun le me kemu jüshü mvu yatselo, tsünyu jüshü mvu lati.”

²⁴Ai Jisu le anyugun ka keryü ka Thoma, mele a-no Diduma tse kehü senthyükelonyu nme le anyugun zen bin mvula.

²⁵Tsügenyu senthyükelonyu kechanyu dan le a-ka, “Agun le Npugü hyu!” tsonshü. Ai a-le anyugun ka, “Ale a npvü aben pe a-nyasin nyu mi shvu ka shü kemvu we tenyenlo ho,” tsonla.

²⁶Lo tsükatsü jon tetse ki senthyükelonyu dan le kanyu bin, lo Thoma ko anyugun sin tse kakhin pvü bin, lo Jisu le ryüo anyugun dan ka binlo njüo anyugun ka, “Hagun kegwagü thyülo nye!”

²⁷Tson-o a-le Thoma ka, “Nle nben hvu senryüo aben hvu shwishü re, tsüntimvule nben hvu pe a nyasin nyu shüre; tson-o tenyen kemvu thyü nyao tenyelo.”

²⁸Thoma le a-ka, “A Npugü, lo a Sunggigü,” tson.

²⁹Jisu le a-ka, “N we ahyu kelo genyu tenyenlo so; hyu mvu tse tenyen kelonyu le jochü kepvü tsin nyu.”

³⁰Lo Jisu le senthyükelonyu kehyu ka lesü hinyu thu shü mvu kela ndun kethyü tho kecha kechon thyü sin shü.

³¹Ai jo hidan thu pe bin kelo kechamvule hagun no Jisu le Sunggigü Nyugü Khrista gü tsekethyü tenyenlo-o hagun no a-zan nyu kerhün hyulo nrün genyu.