Read Southern Rengma Naga JOHAN 21 Bible Online

JOHAN 21 - Southern Rengma Naga bible

JOHAN 21

¹Tsüselo Jisu le Tiberia züda khoki a-le a-npvü a-khipe senthyükelonyu dan hishü, lo anyugun hikeshü le hihontse.

²Tsükatsü Simon Pitor lo Diduma tsekethyü Thoma lo Galil lojvü ki Kana rünyi nyu Nathanael lo Zebedi nyuhvu lo a-sikethen nyu kechanyu mihvu ko hü.

³Simon Pitor le anyugun ka, “Awe tsügü tsehü ten ti.” Lo anyugun le a-ka, “Agun ko nzen tsüti.” Tson-o anyugun le tsügü run nme nyu yülo ntsin, tsüje anyugun le thame hyulo mvula.

⁴Ai tsangben chwiryü kezhü ka Jisu le ryüo kesin ki binlo. Ai senthyükelonyu dan le tsüle Jisu tsekethyü shalo mvula.

⁵Tsügenyu Jisu le anyugun ka, “Hagun le ketyüketsü peha pvü hü le?” tsonshü. Anyugun le, “Nmvu,” tsonshü.

⁶Tsontsin a-le anyugun ka, “Hagun joh pe run tejüzin kipon shwenshülo hagun le tha hyulo ti.” Tsügenyu anyugun le shwenshü ntsin joh nyu tsehü chonri kela genyu joh süshwi loho la.

⁷Lo tsükatsü Jisu le so gunkeryü senthyükelo gü le Pitor ka, “Hile Npugü le!” Lo Simon Pitor le tsü le Jisu tsekethyü shalo ntsin a-le a-kemben kehü genyu a-mirün khibenlo njüo nchweo züda nyu tsü yüla.

⁸Ai senthyükelo kechagü le tsehü le süpvü kehü joh gü sü sen-o run keshegü ka yüla. Anyugun le kazü kesin ti nrün le tsu tsihvu nyesin hü kemvu genyu.

⁹Tson-o anyugun le chwiryüo kesin tilo ntsin magi pe mah kethyü lo tsünyu tsehü lo tensü le kebin hyulo.

¹⁰Jisu le anyugun ka, “Hagun ntsoka tenkelo tsehü peha sen ryü shwi.”

¹¹Tsontsin Simon Pitor le kügü tsehü tsio henpvün kenshen le kebin joh gü sü sen-o kesin ki chwiryülo; lo tsehü tsü tsülaki le joh nyu bin-e joh gü tsü le nrhenla mvu.

¹²Jisu le anyugun ka, “Hagun ryüo chvü tyülo.” Ai senthyükelonyu dan le tsü le Npugü tse shakela genyu, “Nle següla?” tson-o a-rüla ketso mvu.

¹³Jisu le ryüo tensü khilo, tson-o pe anyugun tsüshü; lo tsehü ko pe tsonshü.

¹⁴Jisu le kesinyu dan nyu rhünni kelo siki senthyükelonyu dan no a-kehyu higü le gwünshen ge gü laso.

¹⁵Tson-o anyugun le chvü tyülo ntsin Jisu le Simon Pitor ka, “Jona nyugü Simon, nle hidan nyeki aso kvu hü nle” Pitor le a-ka, “Ele, ale nso kehü nle n npvüe sha bin ti.” Jisu le a-ka, “A tanyü dan leyi lo.”

¹⁶Jisu le gwünhvu ge güka ko a-ka, “Jona nyugü Simon, nle aso hü mon?” Pitor le a-ka, “Ele, Npugü, ale nso kehü nle n npvü shabin ti.” Jisu le a-ka, “A tanyü dan nuchalo.”

¹⁷Jisu le gwünshen ge gü a-ka, “Jana nyugü Simon, nle aso hü nmon?” Pitor le Jisu le a-ka gwünshen ge, nle aso hü nmon? Nle aso hü nmon? Nle aso hü nmon? tsonzo kethyü genyu a-nyun gwamvu sola. Tson-o a-le Jisu ka, “Npugü, nle n npvü tha aphu sha kü bin nyo; nle n npvü ale nso kehü shabin nyo.” Jisu le a-ka, “A tanyü dan leyilo.”

¹⁸Ale nka zo tsentsü shüti, nle npoka we n npvü nsenphinlo njüo n npvü nkendo kipon gunla hü; ai nle then kela siki we nben ketoshüo meno nsen phin shüo nzen-o nle günyü kemvu bin ki gunti.

¹⁹A-le nyu si thyüo Sunggigü no a-zan kechwi thyülo tiyo tsekethyü zoshü nrün genyu a-le jo hi zoshü. Lo a-le jo hi zoshüo Pitor ka, “Nle a sithenlo nye,” tsonshü.

²⁰Lo Pitor le ranio a-sikipon nrishü ntsin, himhundyü kheje ki chvüketyü gwünkho ka Jisu nyun ntsen nyu bin-o, “Hire, Npugü, segü le nten pe me ben nyu shü tila?” tson-o ketso keshü Jisu le so gunkeryü gü le a-sika kebin hyulo.

²¹Pitor le a-hyushü njüo Jisu ka, “Npugü, tsonno temi higü we dihontse tila?”

²²Jisu le a-ka, “Ale ryü kemvuthen a-no bin titse kethyü akendo yatselo, nle nyuthyüo tson hü nla? Nle a sithenlo nye!” tsonla.

²³Tsügenyu senthyükelo tsügü le si loho tsekethyü a-sikethen nyu dan le jo tsü zo tinla. Ai Jisu le a-ka tsügü no si loho, tson mvule, “Ale ryü kemvuthen a-no bin titse kethyü a kendo yatselo, nle nyuthyüo tson hü nla?” tsonkeshü gwünzin.

²⁴Senthyükelo tsügü le jo hi zoshwishü, lo jo hidan thu shü lo jünkezo hile a-ketsin tsekethyü ale sha tsetsü bin laso.

²⁵Jisu le thyükeshü tha kecha kechon le bin nyo; tsüdan nmeme tse thu ti yatselo, a kerüchün le lesü dan le kazü aphu sükela lati.