Read Southern Rengma Naga JOHAN 3 Bible Online

JOHAN 3 - Southern Rengma Naga bible

JOHAN 3

¹Lo Nekodema tsekethyü Judanyu kedanyu nme le Farisinyu dan nyu hü.

²Tsügü le kezün ki gunryüo Jisu ka, “Rabi, nle Sunggigü kanyu gunkeryü senkethyünyu nme tsekethyü agun le sha bin nyo. Kechamvule Sunggigü le zen hü kemvu we temi nme-e nle tha zansü thyü keshü hithyülo keho genyu.”

³Jisu le a-ka, “Ale nka zo tsentsü shüti le, nnyu keshün nilo kemvu we temi nme-e Sunggigü keda bin hyu loho.”

⁴Nekodema le a-ka, “Temi le peshü kela le nyu tsetyüo nnyu keshün nilo tila? A-jvü gin nyu niyüo nnyu nilo gwa ole?”

⁵Jisu le a-ka, “Ale nka zo tsentsü shüti le, zü lo Kapu nyu nnyu kemvu we temi le Sunggigü keda bin nyu yü loho.

⁶Nthyü ge kenyu le nthyü, lo Kapu gü nyu kenyu le Kapu gü.

⁷Ale hagun nnyu keshün nilo mvuloshvu tsonkeshü genyu ndun thyü nya.

⁸Tsang le nbu sen-o a-kenyü kipon gunla hü, lo nle a-khwen nyülo hünyo; tson-e a-le dikipon ryü, lo dikipon güla hüyo, nle tsü sha hümvu. Temi lihigüe Kapu nyu kenyu le tsü a-keme.”

⁹Nekodema le a-ka, “Tha tsü le nyu tsethyüo thyülo tila?”

¹⁰Jisu le a-ka, “Nle Israel nyu senkethyü nyu thyüo jo hi shamvu la?

¹¹Ale nka zo tsentsü shüti, a we a kesha jo zohü nyo, lo ale kehyu rüla zo hünyo, ai hagun le ajo zenlo hümvu.

¹²Ale hagun ka kazünyu jo zo shüe hagun le tsüe tenyenlo mvulo, ale hagun ka tsangge rüla zo yatselo hagun le nyu tsethyüo tenyenlo tila?

¹³Tson-o tsangge kebin Temi Nyugü le tsüryü kemvu we temi nme-e tsangge kü shwi mvu.”

¹⁴Lo nduka Mosa le tehen nyu peri penkeso hontse Temi Nyugüe penso shü mvuloshvu.

¹⁵Kechamvule tenyen kelogü le kethonthen kerhün hyulo nrün genyu.

¹⁶Sunggigü le kazü sogwari ketsin genyu A-nyu chegü khishü, tson-o temi lihigüe tenyen kelo gü le nkela mvule kethonthen kerhün hyulo nrün genyu.

¹⁷Lo kazü gü nmu titse kethyü genyu Sunggigü le A-nyu nipe kazü nyu shü mvu, ai kazü nyu no a-genyu kenikelo hyulo titse kethyü genyu.

¹⁸A-tenyen kelonyu nmula loho; ai tenyen kemvunyu we a-le Sunggigü Nyuche gü zan nyu tenyen mvu kela genyu ntsokae nmu bin nyo.

¹⁹Tson-o nmu nrün jo tsü le keben gü le kazü nyu ryü, ai temi le a-tho njü kemvu genyu keben gü nyeki kezün gü sogwa kvula.

²⁰Temi lihigüe ntsen serikemvu nyu le keben gü ntsü hünyo, a-tho le mu, tsekethyü kenshvu genyu keben gü ki ryü hümvu.

²¹Ai temi lihigüe ketsin tho thyü kehünyu we, a-tho le Sunggigü genyu thyü hü tsekethyü pe hishü titseo Sunggigü ki ryü hünyo.

²²Tsüselo Jisu le senthyükelonyu zen-o Judia kazü nyu ryü, lo a-le anyugun zen-o tsünyu me baptaiz thyü.

²³Lo Johan ko Salim khoki Aenon nyu zü le bin kethyü genyu me baptaiz thyü, lo me ko ryüo baptaiz thyülo.

²⁴Lo tsükatsü le mele Johan ten pe doka nyu shümvu bin zun.

²⁵Lo Johan le senthyükelonyu le Judanyu nme zen-o nthyü kenshün rüla zo kenyi.

²⁶Lo anyugun le Johan ki ryüo a-ka, “Rabi, kerika Jordan züri pere kipon nzen kehü gü nle a-rüla zo kehü gü, tsüle me baptaiz thyü tinla so, lo temi aphu a-ki gun küzhü laso!”

²⁷Johan le zoni shü, “Tsangge hoshü pe temi tsü keshü gü kemvu we a-le thame hyulo ho.

²⁸‘Ale Khrista gü kemvu, ai a-mhundyü ki anikeshü,’ tson-o ale kerika zokehü hagun ko ajo shabin nyo.

²⁹Shenhügi hyukelo tsüle shenhü gü, ai shenhü gü pvünyu dan le bin-o a-khwen nyü kebin tsüle shenhü gü genyu a-kenyü sabin hünyo. Tsügenyu akekenyü tsüle tila so.

³⁰A-no gonkenye kvulo mvuloshvu so, ai awe shen ketsintsin tse mvulo shvu so.”

³¹Tesoki keryü gü le aphu so ge. Kazü nyu chwikeryü gü le kazünyu nyu, lo a-le kazünyu rüla zo hünyo, tsangge keryü gü le aphu so ge.

³²A-le a-kesha kehyu rüla zo hünyo, ai temi nme-e a-rüla kezo nyü hü mvu.

³³A-jo zen kelonyu we Sunggigü le ketsin gü tsekethyü mohor le a-ge bin hünyo.

³⁴Kechamvule Sunggigü le nikeshü gü, tsüle Sunggigü jo zo hünyo, a-le ndo mvu tse Kapu gü khikeshü genyu.

³⁵Pvügü le Nyugü so hünyo, lo tha aphu hoshü pe a-ben ka shüla so.

³⁶Temi lihigüe Nyugü tenyen kelonyu le kethonthen kerhün hyulo laso; ai temi lihigüe Sunggigü Nyugü jo zen kemvu nyu we kerhün hyulo ho, ai Sunggigü nyukekhü le a-ge bin hünyo.