Read Southern Rengma Naga JOHAN 4 Bible Online

JOHAN 4 - Southern Rengma Naga bible

JOHAN 4

¹Lo Jisu le Johan nyeki meno senthyükelo thyü chonlo njüo baptaiz thyükelo Farisinyu le shala kethyü Npugü le shalo.

²Tson-e Jisu le a-npvü me baptaiz thyü mvule a-sikethen nyu dan le thyüshü hü.

³Lo a-le Judia khela njüo Galil lojvü ki ni gunla titse bin.

⁴Lo a-le Samarianyu lojvü pvüthü gun mvuloshvu bin.

⁵Tson-o a-le gü nduka Jakob le lobu nme pe a-nyu gü Josef tsükeshü khoka Sikar tsekethyü Samarianyu rünyi nyida nme tilo.

⁶Lo tsünyu Jakob zülvu le bin, tsüka Jisu le tsonchüo a-tson rüzi lao gü zülvu khoka binlo, lo tsügwünkho ka tsüle nhennyu hokho ka.

⁷Tsüka Samarianyu tenunyu nme le zülü ryü; tsüselo Jisu le a-ka, “Zü pe ano tsü ta.”

⁸Lo tsükatsü Jisu le a-senthyükelonyu dan we ketyüketsü hei titseo rünyi nyida gü nyu chwila.

⁹Tsüselo Samaria nyu tenugi le a-ka, “Nle Judanyu lo ale Samarianyu tsele nyu tsethyüo aka zü hi hü nla?” (Kechamvule Judanyu le Samarianyu zen-o thame tyütsü hü kemvu genyu.)

¹⁰Jisu le a-ka, “Tenugi, nle Sunggigü tha zansü, lo nka, zü pe ano tsüta, tsonkeshü gü sha kethyü we,nle aka tha hiti, lo ale kerhün zü pe ntsüti atale.”

¹¹Tenugi le a-ka, “Kedagü, nle thame pe zü thyülo nrün ndi, lo zülvu le ntsun. Tsonlo nle dikipon kerhün zü hyulo tila?

¹²Nle zülvu khipe agun ketsü apvü Jakob nyeki gon ole? Jakob-e lo a-nyenyu lo a-senru dan-e nduka hinyu zü tsü ryü?”

¹³Jisu le a-ka, “Temi lihigüe zü higü ketsü gü we teri nila ti.

¹⁴Ai temi lihigüe ale zü lope a-tsüshüo tsükelo gü we thame kae teri nilo ho; tsüntimvule ale zü pe a-tsüshü titse kebin gü we a-nyun ki zü le penchwi keryü zülvu thyüo gü kethonthen kerhün ti loti.”

¹⁵Tenu tsügi le a-ka, “Kedagü, ano terimvulo nrün genyu, lo ryüo hithen laki zü lü mvulo nrün genyu nle zü tsügü lope atsüshü ta.”

¹⁶Jisu le tenugi ka, “Nle gü nnyepvü kozen ryü chi.”

¹⁷Tenugi le a-ka, “Anyepvü ndi.” Jisu le a-ka, “Nle anyepvü ndi, tson kezo tsüle zo tsentsü shü laso.

¹⁸Nnyepvü le mipvün thyü laso, lo ntsoka nzen kebin gü tsüle nnyepvü kemvu. Njo hile a-ketsin zoshü laso.”

¹⁹Tenugi le Jisu ka, “Kedagü, nle sidyükeshanyu nme tsekethyü ale shalo laso.

²⁰Agun pepvünyu le nduka kazüthun higü ge hi rüshvu hü, ai hagun we temi no gü rüshvu kehü kazü Jerusalem nyu bin letse hünyo.”

²¹Jisu le a-ka, “Tenugi, ajo tenyelo chi, gwüngwa nme ka hagun le kazüthun hige hi, nmvue Jerusalem nyue Apvü rüshvu mvula nrün gwünkho le ryü zhü nyo.

²²Hagun we a-rüshvu kehü gü sha hümvu; awe ale rüshvu kehü gü shao rüshvu hü; Kechamvule kenikelo tsüle Judanyu ge chwiryü binla kethyü si genyu.

²³Ai ketsin thyüo rüshvu kehünyu le Kapu lo ketsin nyu rüshvu kelo gwünkho le ryüzhü, lo ntsokae ryü bin laso, kechamvule Ngun Pvü le ngun no shao a-kerüshvunyu thyü titse fü kehü genyu.

²⁴Sunggigü tsüle Kapu gü lo a-rüshvu kehünyu le Kapu lo ketsin nyu rüshvu mvuloshvu.”

²⁵Tenugi le a-ka, “Mesia Khrista, tse kehügü le ryü zhü tse kethyü ale shabin nyo, a-le ryülo tha phu zo pe me hiti.”

²⁶Lo Jisu le a-ka, “Nzen kenthon kebin gü hile tsügü tsü le.”

²⁷Tson kebin ka a-le senthyükelonyu dan le ryüo a-le tenunyu zen kenthon kebin hyu shüo anyugun dun thyüla; ai temi nme-e tsügi ka, “Nle nyu shanyü ola?” nmvue a-ka, “Nle segü zen kenthon bin nla?” tson kethyüe shün shü mvu.

²⁸Lo tsükatsü tenugi le a-laki khela njüo rünyi nyida gü ki chwigü meka zoshü.

²⁹“Hagun chwiryüo temi nme nrishü re! A-le ale thyükela aphu pe aka zoshü. A-le Khrista gü tsü ole nyu tsethyü yono?”

³⁰Lo anyugun le nyida gü nyu tin-o Jisu ki chwiryü.

³¹Lo tsükatsü senthyükelonyu dan le Jisu ka, “Senkethyü gü, chvü tyü lota.”

³²Ai Jisu le anyugun ka, “Ale hagun le sha hü kemvu ketyüketsü nme le bin nyo.”

³³Tsügenyu senthyükelonyu dan le khinyunyu ka, “Peha le ketyüketsü pe a-tsüshü ole?”

³⁴Lo Jisu le anyugun ka, “A ketyüketsü tsüle a nikeshü gü kenyü thyü titse lo a-tho thyü titse kethyü genyu.

³⁵Hagun le logvü ti nrün le shyezi le bin zun, tson hü mvu ole? Hire, ale hagun ka zoshü ti, hagun nyiso gü low nrishü shwi; tsüle chon pe gvülo gwa laso.

³⁶Gvü kehünyu le a-chün hyulo hünyo, lo a-sha fü pe kethonthen kerhün nyu shülo hünyo, tson-o ntsi kegwün gü lo gvü kehü gü le kengüo a-sherhün bin hünyo.

³⁷Lo nme le gwün hü, lo kechanyu le gvü hü, lo tsonkethyü tsü rüchün keso le a-ketsin.

³⁸Ale hagun nipe hagun le kenjünthyü shü kemvu ki gvülo tse hünyo; me kechanyu le kenjün thyüshülo hagun no tsüdan tho nyu keyü gwünzin.”

³⁹Lo tenu tsügi le, “Ale thyükela aphu a-le aka zoshü,” tson-o a-rüla zokeshü genyu nyida tsünyu Samarianyu kechon le Jisu tenyenlo.

⁴⁰Tson-o Samaria nyu le a-ki ryüo a-no anyugun zen binlo tseo a-ka hi. Lo a-le jonhvu anyugun zen bin.

⁴¹Lo a-jo genyu temi kechon le tenyen sinlo.

⁴²Tson-o anyugun le tenugi ka, “Agun le ntsoka we njo nti genyu tenyen lo mvu; kechamvule agun le a nyetin pe nyülo laso; lo higü hile kazü kenikelo gü ketsin tsekethyü shalo kela genyu.”

⁴³Lo Jonhvu sika a-le tsünyu tin sen-o Galil nyu gunla.

⁴⁴Sidyükeshanyu le a-rünyi nyu we teshwen kepvü ndi letse kethyü Jisu le zoshü.

⁴⁵Tson-o a-le Galil nyu gunryü kelo ka a-le Jerusalem nyu nga ka tha thyükeshü kehyu genyu Galilnyu ko a-zenlo. Kechamvule anyugun ko nga tsünyu gun kethyü genyu.

⁴⁶Tson-o a-le zü lope vain zü thyü keshü Galil lojvü Kana rünyi nyu niryülo. Tsükatsü Kapernaum nyu thakeshanyu nme le a-nyu pechenyu nme le ho bin.

⁴⁷A-le Jisu le Judia lojvü ki tsonchü sen-o Galil lojvü nyu ryü kelo ka, a-le Jisu ki gun-o a-no gü a-nyu thyü ngwashü lotseo hi, a nyu le si güzhü kela genyu.

⁴⁸Jisu le a-ka, “Hagun we tha zansü lo nduntho hyu kemvu we thame kae tenyen hümvu.”

⁴⁹Peshünyu tsü gü le a-ka, “Kedagü, nle anyu le kesi mhundyü ryülo.”

⁵⁰Jisu le a-ka, “Nle gunla, nnyu le rhünlo ti!” Temi tsügü le Jisu le a-ka kezo jo tenyenlo njüo gunla.

⁵¹Tson-o a-le gun kezhü ka a-gonyu le ryüo a-zen ketenolo njüo a-ka, “Nnyu le rhünlo laso!” tse zoshü.

⁵²Tsontsin a-le anyugun ka, “A-le di gwünkho ka rhün soryü la?” tsonkethyü ketsoshü. Lo anyugun le a-ka, “Ndu tegi nme kevü gwünkho ka a-le rüka mvula.”

⁵³Tsontsin ntsenyu gü a-pvü le, Jisu le tsügwünkho ka, “N nyu le rhünlo ti,” tsonshü kethyü shalo njüo a-ko lo a-kaminyu aphu tenyenlo.

⁵⁴Tsügü ka tsüle Jisu le Galil lojvü nyu tha zansü thyükeshü kenyhun gü.