Read Southern Rengma Naga JOHAN 6 Bible Online

JOHAN 6 - Southern Rengma Naga bible

JOHAN 6

¹Tsüselo Jisu le Galil züda nmvue Tiberia züda tse kehü gü nken gunla.

²Lo a-le kehonyu ge nduntho thyükeshü genyu temi dan me le a-sithen hü.

³Tson-o Jisu le rincho ge külo njüo a-le senthyükelonyu zen-o tsüge binlo.

⁴Lo tsü le Judanyu le nkenkechwi nga khonni la.

⁵Tsükatsü Jisu le nyi sogü temi danda le ryü kezhü hyulo njüo Filip ka, “Ngun temi lidan ginthyülo nrün genyu dikipon tensü hyulo mon?”

⁶(Filip nyun kegwa keshvu shalo nrün genyu jo hi kezo; a-le thyü titse kebin tsü a-npvü sha kü kebin genyu.)

⁷Filip le a-ka, “Mi me no keshashanyu hyulo titse-e deneri tsihvu mi-e jün ti loho.”

⁸Jisu le a-senthyükelonyu nme Simon Pitor sikezen gü Andria le a-ka,

⁹“Ntsenyu nme le tensü pvün lo tsehü penhvu sen-o hika hünyo; ai temi hitsülaki dan nyu hikechehi pe nyuthyülo mon?”

¹⁰Tsontsin Jisu le, “Temi dan no dunlo chi.” Lo tsükatsü le tehen nyu genyu tehen le chon sa, tsügenyu temi yie pvün le tehen so ge dunlo.

¹¹Tsüselo Jisu le tensü khilo,tson-o Sunggigü shwnshüo kenjün pe temi dan tsü küshü. Tsühontse tsehü hvue anyugun le hi kebin then khishü.

¹²Tson-o anyugun le tyü pe anyugun gin nyü kelo siki Jisu le senthyükelonyu dan ka, “Keshanyue kenthyüla mvu nrün genyu hagun le tyü kensen a-sen tsü khü kequenlo.”

¹³Lo anyugun le tensü pvü pvün tyüo tyü nsen kelo khü pe khvütsü tseryü kenyhun sülo.

¹⁴Tsügenyu temi le a-le ndun tho thyükeshü kehyu ka anyugun le, “Temi higü hile kazünyu tsüryü titse kehü gü sidyükesha gü tsü ketsin so.”

¹⁵Tson-o mele ryüo a-kemvu thyüo a-ten pe a-no Raja thyü titse kebin Jisu le shalo-o rincho ge gunla.

¹⁶Tson-o ngwünki a-le senthyükelonyu dan le züda nyu güla,

¹⁷Lo anyugun le run nyu yülo-o züda pvüthü sen-o Kapernaum nyu gunzhü; lo tsükitsü tsang le zünla, lo Jisu le anyugun ki ryü mvu zun.

¹⁸Lo tsang le nbu rilo kela genyu züda tsü le nnun sola.

¹⁹Tson-o anyugun le run jen sen-o mel jo kenshen pezi ki gunzhü kela siki anyugun le Jisu le züda soge tsonchü sen-o run kho nni ryü kezhü hyulo-o nshvu rila.

²⁰Ai a-le anyugun ka, “Ale le, hagun nshvu nya.”

²¹Tsügenyu anyugun le a-zen-o run nyu yüryüla nyülo; tsontsin whütse run gü tsü le anyugun le gun titse kebin bin gü tilo.

²²Tsüsinyü züda kho lukipon kehü temi dan tsüle ndu we run nme tsü a-me run kecha nme-e tsünyu bin mvu; lo Jisu le senthyükelonyu zen-o run tsünyu gü mvuo senthyükelonyu nti gunla kethyü hyu.

²³Tson-e Tiberia nyu run dan me le Npugü le Sunggigü shwen shüo anyugun tensü ketyü bin khoki ryü.

²⁴Tsügenyu temi dan le Jisu lo senthyükelonyu jue tse tsünyu bin kemvu shalo njüo anyugun le run nyu yülo-o Jisu füo Kapernaum nyu ryü.

²⁵Tson-o anyugun le züda pere zin a-hyulo-o a-ka, “Rabi, nle dicheka ryüo hi tila la?”

²⁶Lo Jisu le anyugun ka, “Ale hagun ka zo tsentsü shüti, hagun le nduntho kehyu genyu mvule tensü tyü pe gin nyü kelo genyu afü kehü gwünzin.

²⁷Nke nmhükela chvü fü kenjünthyü bin nya, Temi Nyugü le khipe hagun tsü nrün kethonthen kerhün chvü genyu kenjünthyülo. Temi Nyugü le pe hagun tsü titse kebin chvü le hile, kechamvule Pvügü Sunggigü le a-kendo kela mehor a-ge vü kela genyu.”

²⁸Tson-o anyugun le a-ka, “Agun le Sunggigü tho thyülo nrün genyu nyu thyülo mvulo shvula?”

²⁹Jisu le anyugun ka, “Hagun le Sunggigü le nikeshü gü tenyenkelo gü tsüle Sunggigü tho le.”

³⁰Lo anyugun le a-ka, “Nle agun no hyulo ntenyenlo nrün genyu nyu zansü thyüshü hüla? Nle Nyutho thyüshü la?

³¹Agun pvübon nyu le nduka tehen nyu Manna tyü, tsekethyü thu pe bin njü. ‘Anyugun no tyü ti tse kethyü genyu a-le tsangge tensü khipe anyugun tsü.’ ”

³²Jisu le anyugun ka ale hagun ka zo tsentsü shüti le, “Tsangge tensü khipe hagun ketsü tsüle Mosa le mvu, ai Pvügü le tsangge tensü ketsin pe hagun tsü hünyo.

³³Kechamvule Sunggigü le khikeshü tsügü tsüle kerhün khipe kazü gü tsüshü kehü genyu.”

³⁴Tsügenyu anyugun le a-ka, “Npugü nle kethonthen tensü tsü khipe agun tsüzin hülo.”

³⁵Jisu le anyugun ka, “Ale kerhün tensü gü, temi lihigüe aki keryü gü we nnyon loho, lo temi lihigüe a tenyen kehünyu we thame kae teri loho.

³⁶Ai ale hagun ka zoshü ti, hagun we hyue tenyen hümvu.

³⁷Sunggigü le khipe a ketsünyu aphu aki ryü küti; lo temi lihigüe aki keryü nyu ale tsünyu khela loho.

³⁸Kechamvule ale anpvü akenyü yhüdyü thyü titse mvule a nikeshü gü kenyü thyüti tseo tsangge tsüryü kethyü genyu.

³⁹Lo a nikeshü gü kenyü tsüle a-le khipe a tsüshü kela nme-e nmhenla mvuo kenkhin nyü kenilo nrün gü.

⁴⁰Tsüntimvule Nyugü so lo tenyen kehünyu le kethonthen kerhün hyulo ti; ale jon kenkhin nyü tsünyu kenilo ti; lo tsüle apvü kendo.”

⁴¹Ai, “A-le tsangge tsükeryü tensü,” tsonkeshü genyu Judanyu le a-ge kenyon sola.

⁴²Tson-o anyugun le, “Higü hile Josef nyugü, Jisu, ngun le a-pepvünyu keshanyu mvu ole? Nyuthyüo ‘Ale tsangge tsükeryü,’ tson zo hü nla?”

⁴³Jisu le anyugun ka, “Hagun tha zo-o kenyi bin nya chi.

⁴⁴Temi nme-e a nikeshü gü Apvü le zen ryü kemvu we aki ryü loho; lo ale jon kenkhin nyü tsügü kenilo ti.

⁴⁵‘Lo anyugun aphu Sunggigü no a-senthyü loti,’ tsonkethyü sidyükeshanyu le thu njü nyo. Temi lihigüe Pvü gü khwenyüo shakelonyu le aki gunryü hünyo.

⁴⁶Sunggigü kanyu keryü gü kemvu we temi nme-e Pvü gü hyu mvu, ai tsügü we Pvügü hyu.

⁴⁷Ale hagun ka zo tsentsü shüti le, tenyen kehü nyu le kethonthen kerhün le bin laso.

⁴⁸Ale kerhün tensü gü.

⁴⁹Hagun pvübon nyu le tehen nyu manna tyü, lo anyugun le sila.

⁵⁰Higü we meno tyüo sila hü kemvu tsangge tsükeryü tensü gü.

⁵¹Ale tsangge tsükeryü kerhün tensü; lihigüe tensü higü tyülo, a-le kethonthen rhünlo ti; kazü thyü nrhünlo titse kethyü genyu ale khishü nrün gü tsüle athyü.”

⁵²Tsügenyu Judanyu dan le kenyon so, “Temi higü hile nyu tsethyüo a-thyü pe nno tyülo gwa tila?” tsonso.

⁵³Tsügenyu Jisu le anyugun ka, “ale hagun ka zo tsentsü shüti le, hagun le Temi Nyugü thyü tyü lo a-zi tsü kemvu we kerhün le hagun nyun nyu ndi.

⁵⁴Temi lihigüe athyü tyü lo azi tsü kehünyu le kethonthen kerhün le bin laso, lo ale kenkhin ketsin nyü tsünyu keni loti.

⁵⁵Kechamvule athyü le me chvü ketsin gü lo azi le meno tsü kehü ketsin gü genyu.

⁵⁶Temi lihigüe athyü tyü lo azi tsü kehünyu le anyun ka bin hünyo, lo ale a-nyun ka bin hünyo.

⁵⁷Rhünkehü Pvügü le a nishü lo ale Pvügü genyu rhün kehü hontse, temi lihigüe athyü tyü kehünyu le a genyu rhünlo ti.

⁵⁸Hile tsangge tsükeryü tensü. Hagun bon nyu le nduka tyüo sikela hontse mvu; temi lihigüe tensü hi ketyü gü le kethonthen rhünlo ti.”

⁵⁹A-le Kapernaum nyu me senkethyü ka anyugun Kershvuka nyu jo hi zo.

⁶⁰Tsügenyu senthyükelonyu kechon le, “Jo tsü kesha ka jo hile jo kerü nme. Segü le nyülo gwa tila?”

⁶¹Ai senthyükelonyu le jo tsü kenyon kethyü Jisu le shalo njüo anyugun ka, “Hagun kerüla ole?

⁶²Tson yatselo Temi Nyugü le nduka a-bin ge kekü hyulo nyu tsethyü mon?

⁶³Kerhün khishü kehügü le Kapu gü, thyü gü le thame thyü loho, ale hagun ka zokeshü jo hile Kapu lo kerhün jo le.

⁶⁴Ai hagun dan nyu temi peha le tenyen mvu bin nyo.” Jisu le sokerika nyu tenyen kemvunyu le senyu yo; lo a-ten pe me ben nyu shü nrün gü tsüle segü yo a-le sha kebin genyu.

⁶⁵Higenyu a-le, “Apvü gü kanyu kekvu khishü kemvu we temi nme-e aki ryülo ho.”

⁶⁶Jo tsügü genyu a-le senthyükelonyu kechon le ranila, lo a-zen sin mvula.

⁶⁷Tsügenyu Jisu le tseryü kenyhun che dan ka, “Hagun ko tin lati ole?”

⁶⁸Simon Pitor le a-ka, “Npugü, agun no segü ki gü mon? Nle kethonthen kerhün jo sen hünyo.

⁶⁹Tsüntimvule agun le nle Sunggigü kanyu chwikeryü Kenshün gü letse kethyü tenyenlo njüo shalo laso.”

⁷⁰Jisu le anyugun ka, “Ale hagun tseryü kenyhun che dan kejülo mvu ole? Ai hagun dan nyu nme le Satan.”

⁷¹Tsüle a-le Simon nyugü Iskariot Judas rüla tsü kezo; kechamvule tseryü kenyhun che dan nyu Judas le Jisu ten pe me ben ka shü nrün genyu.