Read Southern Rengma Naga JOHAN 7 Bible Online

JOHAN 7 - Southern Rengma Naga bible

JOHAN 7

¹Tson-o Jisu le Galil lojvü nyu ho tinla; Judanyu dan le a-dushvula titse a-fülo kela genyu a-le Judia lojvü ki hünyü mvula.

²Lo tsüle Judanyu le Then nyu bin-o Nga kehü jon kho nnila.

³Tsügenyu a-sikezennyu dan le a-ka, “Nle senthyükelonyu dan no nle thyükehü ntho hyulo nrün genyu Judia lojvü ki gun lochi.

⁴Temi lihigüe a-zan no chwilo nyülo kebuo thame thyü hü kemvu genyu, nle tha hidan thyü kebin si genyu kazü aphu no shalo chi.”

⁵(Lo tsüle a-sikezen nyu dan-e a-tenyen kemvu genyu.)

⁶Tsügenyu Jisu le anyugun ka, “A gwünkho we timvu zun; ai hagun gwünkho we tizin bin hünyo.

⁷Kazü le hagun ntsüla loho; ai ale a-tho le gwamvu letse zo keshügenyu a ntsü kehü gwünzin.

⁸Hagun nga ka gun lo nye, a we a jon le ryü mvu zun kethyü genyu gunlo ho.”

⁹Tson-o a-le anyugun ka jo tsü zo shüla njüo Galil lojvü nyu bin tinla.

¹⁰Ai a-sikezennyu dan le nga nyu gunla ntsin a-le ndo mvule kebuo nga nyu gun.

¹¹Lo Judanyu dan le nga ka tsü a-füo,“A-le dikipon bin nla?”

¹²Tson-o temi dan le a-rüla zo pe keyhun kerun sola. Peha le, “A-le temi kegwa nme le,” tse. Lo kechanyu le, “Nmvu, a-le temi sa kehü gwünzin,” tson sola.

¹³Ai Judanyu kenshvu genyu temi nme-e a-zan zoshwi shü mvula.

¹⁴Ai nga lvuka Jisu le Kershvuka nyu gü me senthyü.

¹⁵Tsügenyu Judanyu dan le anyugun dunthyüo, “Temi higü hile lesüka nyu kegun gwünsha mvulo nyu tsethyüo lesü shalo la?”

¹⁶Jisu le anyugun ka, “ale pe senthyü kehü hile a jo mvule a nikeshü gü jo.

¹⁷Temi lihigüe Pvügü kenyü thyü hü yatselo jo tsüle Sunggigü kanyu chwiryü le anpvü akanyu chwiryü yo tsü shaloti.

¹⁸Temi lihigüe a-npvü a-kanyu tha zo kehünyu le a-npvü a-zan kechwi fü hü nyo, ai lihigüe a-nikeshü gü zan fü kehünyu le, tsüle a-ketsin,lo ketsinkemvu nme-e a-nyun ka ndi.

¹⁹Mosa le tejvü gü khipe hagun tsüshü mvu ole? Ai hagun temi nme-e tejvü tsü thyü lo zen hümvu. Hagun le nyu genyu adushvu kela ndo hü nla?”

²⁰Temi dan le, “Nle tero gwakemvu gü zen kehü hile la? Segü le n dushvu kela ndo hü nla?”

²¹Jisu le anyugun ka, “Ale tha nme thyüshü ntsin hagun we tsü le hagun dunthyü kü.

²²Mosa le gikerü jvü khipe hagun tsüshü (tsüle Mosa kanyu mvule hagun bon nyu kanyu) lo hagun le Sabbath jon nyü me girü hü nyo.

²³Hagun le Mosa jvü gwünrho lalo kenshvu genyu Sabbath jon nyü me girü hü yatselo; ale Sabbath jon nyü me thyü ngwa keshü genyu hagun le a genyu hagun kenyü mvu ole?

²⁴Tegwen ki kehyu gü ge kegwa keshvu rüchün mvule a-ketsin gü nyu rüchün lo nye.”

²⁵Tsügenyu Jerusalem nyu peha le, “Temi higü hile anyugun le dushvula titse fü kehü gü kemvu ole?

²⁶Liki li, a-le lihontse tha zo bin nyo, lo temi nme-e a-ka thame zo bin kemvu le. A-le Khrista gü tse kethyü sharhinyu dan le shalola ketsin ole?

²⁷Lihi thyüe nle temi higü hile dikipon gunryü yo tsü shabin nyo; ai Khrista le gunkeryü we a-le dikipon gunryü yo temi le tsü shalo ho.”

²⁸Lo Jisu le Kershvuka nyu me senthyü nra sen-o, “Hagun le asha lo ale dikipon ryü yo tsüe sha, ale a kendo thyü ryü mvu, a nikeshügü tsüle ketsin, lo hagun le a-sha hümvu.

²⁹A we le a-shabin; kechamvule ale a-kanyu chwiryü, lo a-le a nikeshü genyu.”

³⁰Tsüselo anyugun le a-ten kelo ndo sola; ai a-jon le ryü mvu zun kethyü genyu temi nme-e a-ben shwenpe a-ge shümvu.

³¹Lo temi kechon le Jisu tenyenlo njüo anyugun le, “Khrista le keryü ki a-le temi higü le thyükeshü nyeki nduntho thyü chonshü ti le nyu tsethyü yo no?” tson sola.

³²Farisinyu le temi dan le Jisu rüla zo sa kehü shalo; tsüselo peshünyu lo kedanyu lo Farisinyu tsele a-tenlo lotseo lonyu nishü.

³³Lo Jisu le, “Ale jon keshanyu ka hagun zen sin bin tseo a nikeshü gü ki gun lati.

³⁴Hagun le a fü ti, lo a kebin bin nyu ryü loho.”

³⁵Tsügenyu Judanyu dan le anyugun npvü kenthon-o, “Temi higü hile nle a-hyu loho letse, lo a-le dikipon güla ti ole? A-le gü Griknyu senthyü tinla ti ole?

³⁶A-le hagun le a fü ti, lo a hyu loho, lo hagun le a kebin bin ki ryü loho, tson kehü jo hile nyu la?”

³⁷Lo nga kekhin nyü Jisu le solo njüo jozo tetso-o, “Temi lihigüe teri kehünyu no ryüo tsülo lo.

³⁸Temi lihigüe a tenyen kelo gü we ketsin lesü nyu kezo hontse a-ge kerhün züle tsun chwiryü ti.”

³⁹A-le a-tenyen kelo nyu no hyulo nrün Kapu gü rüla zoshü; lo Jisu le zankechwi thyülo kemvu zun genyu Kapu güe khishü mvu zun.

⁴⁰Tsügenyu temi tsüdan peha le jo tsü shalo njüo, “Higü hile sidyükeshagü ketsin!”

⁴¹Lo kechanyu le, “Hile Khrista gü!” Ai peha le, “Kha, Khrista le Galil nyu chwiryü ti ole?

⁴²Khrista le David nyenyu lo David le nduka kebin rünyi Bethlehem nyu chwiryü titse Ketsinlesü le zoshü njü mvu ole?”

⁴³Tson-o a-genyu temi dan no danhvu thyüla.

⁴⁴Tson-o peha le a-tenlo nyü so; ai temi nme-e a-ge a-ben shwenshü mvula.

⁴⁵Lo Lokethyünyu dan le peshükeda ju lo Farisinyu dan ka ryü, lo tsüdan le anyugun ka, “Hagun le nyuthyüo a-zen ryü mvula?”

⁴⁶Lo lokethyünyu dan le,“Temi nme-e a-hontse jo zolo mvu!”

⁴⁷Tsügenyu Farisinyu dan le anyugun ka, “Me no hagun sala ole?”

⁴⁸“Kedanyu nmvue Farisinyu peha le a-tenyenlo la ole?

⁴⁹Ai tejvü sha hükemvu temi higü hile kesenkesü pvü tin laso!”

⁵⁰Lo anyugun dan nyu temi nme nduka Jisu ki gunkeryü gü Nekodema le anyugun ka,

⁵¹“Ngun jvü le mejo shamvu lo metho shalo rimvuo me nkhin hü ole?”

⁵²Anyugun le a-ka, “Nko Galilnyu ole? Swü gun yatselo, Galil nyu sidyükeshanyu nme-e soryü mvu tsekethyü nle sha loti.”

⁵³Tson-o anyugun le anyugun ka ki gunla.