Read Southern Rengma Naga JOHAN 8 Bible Online

JOHAN 8 - Southern Rengma Naga bible

JOHAN 8

²Tson-o a-le lonyü nshwen Kershvuka nyu ni ryülo, lo temi kechon le a-ki ryü; tsüselo a-le solo njüo anyugun senthyü so.

³Lo tsükatsü lesükeshanyu ju lo Farisinyu dan le tenunyu nme le keyüla hüo ten zen ryü, tson-o anyugun le tsügi khipe anyugun dan nyu shülo njüo Jisu ka,

⁴“Senkethyü gü, tenunyu higi hile keyüla kebin agun le tenlo le.

⁵Lo tejvü nyu tso lope hihontse kethyünyu jon shvula lo tsekethyü Mosa le agun ka zo njü. Lo n we le nyu tsethyü zo tila?”

⁶Anyugun le Jisu nmu kelo rüchün-o a-semen-o jo higü zo. Ai Jisu le nkhüntsügü a-zenkero lope kazü nyu tha thu bin.

⁷Ai anyugun le a-ketso bin gwünzin kela genyu a-le nyiso gü anyugun ka, “Hagun dan nyu mu mvu shü kethyü gü no tso shwe teri pe tenunyu higi jon shü re.

⁸Tsonshü njüo nkhünni tsügü a-zenkero pe kazünyu tha thu ni tinla.

⁹Tson-o temi tsüdan le a-jo shashü ntsin peshü tsin gü le rio a-kekhin keti tsü mi meme tse chwila.

¹⁰Lo Jisu le nyiso gü tenugi ka, “Tenugi, anyugun le dikipon güla sela? Temi nme-e n nmu mvu ole?”

¹¹Tsontsin a-le, “Npugü, temi nme-e a nmu mvu,” tsonshü. Lo Jisu le, “A-ko n nmu loho; nle gunla chi. Hisiki we mu ninya gwün.”

¹²Lo Jisu le anyugun ka, “Ale kazü keben gü, temi lihigüe a sithen kehü gü le kezün nyu hü mvule kerhün keben gü hyulo ti.”

¹³Tsügenyu Farisinyu le a-ka, “Nle n npvü njün zohü nyo, njo tsüle a-ketsin mvu.”

¹⁴Jisu le anyugun ka, “Ale a npvü ajün zo hüe ajo tsü le a-ketsin, kechamvule ale dikipon ryü yo lo ale dikipon güla tiyo tsekethyü sha kehü genyu; ai hagun we ale dikipon ryü yo lo ale dikipon gun tiyo tsü sha hü mvu.

¹⁵Hagun we thyü ge kegwa keshvu ketso hünyo; awe temi nme-e ketso hü mvu.

¹⁶Lo ale me ketso hüe ale me ketso kethyü tsüle a-ketsin; kechamvule ale a npvü mvule a nikeshü gü Pvügü le azen kehü genyu.

¹⁷Tsüntimvule mihvu jo kezo le a-ketsin tsekethyü hagun jvü ka thu njü nyo.

¹⁸A npvü ajün kezo gü tsüle ale, lo a nikeshü Pvügü tse le ajün zo hünyo.”

¹⁹Tsügenyu anyugun le a-ka, “Npvü le dikipon bin nla?” Jisu le, “Hagun le a-e lo Apvüe sha hümvu. Hagun le a sha kethyü we a pvüe sha ti ata le.”

²⁰Jisu le Kershvuka nyu senthyü kebinka pisa pe shü kehü khin kho ka jo hi zoshü, ai a-gwünkho timvu zun kethyü genyu temi nme-e a-tenlo mvula.

²¹Tson-o a-le anyugun ka, “Ale tinla ti sele, lo hagun le a fü ti, ai hagun kemu nyu sila ti. Ale kegun bin nyu hagun le ryü loho.”

²²Tsügenyu Judanyu le, “Ale kegü bin ki hagun le gü loho, a-le tson kehü hile, a-le a-npvü a-dushvula ti ole?”

²³Tsontsin a-le anyugun ka, “Hagun le tesin gü, lo a we teso gü, lo hagun le kazü hinyu temi, ai awe tsangge ryü kethyü genyu.

²⁴Tsügenyu ale hagun ka zo, ‘Hagun le hagun kemu nyu sila ti,’ kechamvule hagun le ale tsügü tsekethyü tenyen kemvu we, hagun le hagun kemu nyu sila ti.”

²⁵Tsügenyu anyugun le a-ka, “Nle segü la?” Jisu le anyugun ka, “Ale a-kerika hagun ka zo keshü gü tsü.

²⁶Ale hagun rüla zo nrün lo ketso nrün kechon le bin nyo. Ai a nikeshü gü tsü le ketsin gü,lo ale a-ka nyu nyü kelo, ale tsü lope kazünyu ka zo hünyo.”

²⁷Anyugun le a-le anyugun ka Pvügü rüla pe zo keshü rüchünlo mvula.

²⁸Tsügenyu Jisu le, “Hagun le Temi Nyugü penso keshü ka hagun le tsügü tsü tsekethyü lo ale a npvü thame thyü hü mvu, ai Pvügü le a senthyü keshü hontse ale tsü zo kehü shalo ti.

²⁹Lo a nikeshü gü le azen hü; tsügü le akhipe ano a npvü hü mvu, kechamvule ale a-kenyü aphu thyü kehü genyu.”

³⁰A-le jo hi zo kebin ka temi kechon le a-tenyen lo.

³¹Lo Jisu le Judanyu tenyenlo kelanyu dan ka, “Hagun le ajo nyu bin hü lo hagun le ale senthyü kelonyu ketsin.

³²Lo hagun le ketsin gü shalo ti, lo ketsin tsügü le hagun hoshü lati.”

³³Anyugun le a-ka, “Agun le Abraham nyenyu, lo agun le thame kae medo thyühü mvu. Nle nyuthyüo, ‘Hagun hoshü lati,’ tsekethyü zohü nla?”

³⁴Jisu le anyugun ka, “Ale hagun ka zo tsentsü shüti le, temi lihigüe mu kehünyu le kemu do so.

³⁵Lo do tsüle me ka nyu bin zin hü mvu; ai nyutsin nyu we bin zin hünyo.

³⁶Tsü genyu Nyugü le hagun hoshü selo, hagun ho tsin thyüshü lati.

³⁷Ale hagun le Abraham nyenyu tse kethyü sha bin nyo, ai ajo le hagun ge a-bin kendi genyu hagun le adushvu lati tseo a fü hünyo.

³⁸Ale Apvü zen hüo ale anpvü hyukelo pe zo hünyu; hagun ko hagun pvügü ka nyu nyülo yo tsü thyü hünyo.”

³⁹Anyugun le a-ka, “Abraham le agun pvü le.” Jisu le anyugun ka, “Hagun le Abraham nyenyu yatselo hagun le Abraham tho thyü hü ti.

⁴⁰Ai hagun le ale Sunggigü kanyu shakelo ketsin gü pe hagun ka zo keshü gü a hi-e dushvula titseo afü hünyo. Abraham le hihontse hü mvu.

⁴¹Hagun we hagun pepvünyu dan tho hontse thyü hünyo.” Lo anyugun le a-ka, “Agun le keyüla nyu ge agun nnyu kelonyu mvu; agun le agun pvü nme le bin nyo, lo tsüle Sunggigü.”

⁴²Jisu le anyugun ka, “Sunggigü le hagun pvügü yatselo, hagun le aso loti, kechamvule ale Sunggigü kanyu chwiryü lo ryü kethyü genyu. Ale a npvü akanyu ryü mvule, a-le a nikeshü genyu.

⁴³Hagun le nyuthyüo ajo shalo hü mvu la? Hagun le ajo nyü hü lokeho le?

⁴⁴Hagun le hagun pvü tero gwakemvu gü kanyu, lo hagun le hagun pvü kenyü gü thyü nyü hünyo. A-le sokerika nyu me dukeshvu nyu nme, lo a-ge ketsin kendi genyu a-le ketsin nyu bin hümvu. A-le kenku jo zo solo a-npvü a-ka nyu zo chwiryü hünyo; kechamvule a-le kenkunyu lo a-le kenkunyu pvü genyu.

⁴⁵Ai ale ketsin gü kezo genyu hagun le a tenyen hümvu.

⁴⁶Hagun segü le kemu zope a njü logwa la? Ale jo ketsin zo hü yatselo hagun le nyu thyüo a tenyen hü mvula?

⁴⁷Sunggigü ka chwikeryü nyu le Sunggigü jo nyü hünyo. Hagun we Sunggigü kipon kemvu genyu tsügenyu hagun le tsünyü hümvu.”

⁴⁸Judanyu dan le a-ka, “Nle Samarianyu nme lo nle tero gwakemvu gü zen hü kethyü agun le zo tsentsü la mvu ole?”

⁴⁹Jisu le, “Ale tero gwakemvu zen hü mvu, ai ale Apvü shwen hünyo; lo hagun we A-shwen hümvu.

⁵⁰Lo tson-e awe a npvü a zan fü hümvu; fü kehü lo ketso kehü nme le bin nyo.

⁵¹Ale hagun ka zo tsentsü shüti, temi lihigüe ajo zen hülo tsügü le thame kae kesi hyu loho.”

⁵²Judanyu le a-ka, “Nle tero gwakemvu nme zen kehü agun le shalo laso. Abraham-e lo sidyükeshanyue sila so; lo nle zokeshü, ‘Temi lihigüe ajo zen hü yatselo tsünyu le thame kae kesi hyulo ho.’

⁵³Nle agun pvü Abraham nyeki gon ole? Abraham lo sidyükeshanyue sila so; nle segü letse hü nla?”

⁵⁴Jisu le anyugun ka, “Ale a npvü a zan zope gon yatselo, a zan kezo tsü le a-kenrun. A zan zo pe gon kehü tsüle Apvü. Hagun le tsügü lope hagun Sunggigü letse kehü gü tsü.

⁵⁵Lo hagun we Sunggigü sha mvu, ai awe a-sha bin nyo. Lo ale a-shamvu, tson zo yatselo ako hagun hontse kenkunyu thyü lati. Ai ale a-sha bin nyo, lo a-jo zen hünyo.

⁵⁶Hagun pvü Abraham le nduka a jon gü hyukelo rüchün pe a-sherhün-o tsü hyulo laso.”

⁵⁷Tsügenyu Judanyu le a-ka, “Lo nle Abraham hyu la?”

⁵⁸Jisu le anyugun ka, “Ale hagun ka zo tsentsü shüti, Abraham nnyu kelo mhundyü ki ale hü laso.”

⁵⁹Tsügenyu anyugun le tso lope a-jon titse sola. Ai Jisu le a npvü kebuo Kershvuka nyu chwila.