Read Southern Rengma Naga JOHAN 9 Bible Online

JOHAN 9 - Southern Rengma Naga bible

JOHAN 9

¹Tson-o a-le gun zhü ntsin n nyulo nyemhun nyu a-yhüpo kelanyu temi nme hyulo.

²Tsontsin Jisu le senthyükelonyu dan le a-ka, “Rabi, temi higü hile a-yhüpo-o nnyu kelo a-le le a-pepvünyu le mula ola?”

³Ai Jisu le anyugun ka, “Temi higü hi-e lo a-pepvünyu kemu genyue kemvu, ai a-ge Sunggigü tho thyü pe me teshashü titse kethyü genyu hihontse kethyü.

⁴Tsangben kebin ka ngun le a nikeshü gü tho thyü mvulo shvu; temi nme-e thame thyülo keho tsang kezün jon le ryüzhü nyo.

⁵Ale kazü nyu kebin ka ale kazü keben gü.”

⁶A-le tson zoshü njüo nsü pe kazü nyu nnyon kembe thyülo-o nnyon kembe tsü pe a-yhütyü yünshü, tson-o a-ka

⁷“Gungü Siloam zi nyu süla chi.” (Siloam a-kon le nikeshü.) A-le tsünyu gü süla ntsin tha hyulo njüo ryü la.

⁸Tsügenyu a-tsagü sikezen nyu lo a-le nduka shvutyü kehü kehyu nyu dan le, “Temi higü hile shvutyü kehü gü tsü mvu ole?”

⁹Peha le, “Hile tsügü tsüle,” kechanyu le, “Nmvu, ai tsügü au kenfü sa le.” Ai tsügü we, “Ale tsügü le.”

¹⁰Tsügenyu anyugun le a-ka, “Tsonlo nyu tsethyüo nyhütyü le tha ohyu chwiryülo la?”

¹¹Lo a-le, “Jisu tsekethyü temi nme le nsü pe nnyon kembe thyülo njüo pe ayhütyü hishüo aka, ‘Nle gü Siloam zi nyu süla chi’ tsonshü; lo ale gü süla ntsin ayhütyü le tha hyu chwiryülo le.”

¹²Tsontsin anyugun le a-ka, “Tsügü le dikipon bin nla?” Ai a-le, “Ale shamvu.”

¹³Anyugun le nduka a-yhütyü kepogü zen-o Farisinyu dan ki ryü.

¹⁴Lo Jisu le nnyon pe kembe thyü pe a-yhütyü thyü ngwa keshü nyü tsüle Sabbath jon.

¹⁵Tsügenyu Farisinyu dan ko a-le nyu tsethyüo tha hyulo yo tsekethyü a-ketso. Lo a-le anyugun ka, “A-le nnyon kembe pe ayhütyü hvu yün shüo ale gü süla ntsin ale tha hyulo le.”

¹⁶Tsügenyu Farisinyu peha le, “Temi tsügü tsü le Sunggigü kanyu ryü mvu, kechamvule a-le Sabbath zen hü kemvu genyu.” Ai kechanyu dan me le, “Temi kemunyu le nyu tsethyü tha ndun kethyü tho hihontse thyülo tila?” tson-o anyugun dan nyu kejo rhünlo mvula.

¹⁷Tsügenyu anyugun le a-yhütyü kepogü ka, “A-le nyhütyü thyü ngwa keshü genyu nwe a-rüla nyu tse thyü rüchün hü nla?” Tsügü le anyugun ka, “A-le sidyükeshanyu nme,” tsonla.

¹⁸Ai a-yhütyü po hüo tha hyunikelo rüla Judanyu le a-pvü lo a-jvü au ko zen ryü kemvuthen a-tenyen mvu.

¹⁹Tson-o anyugun le a-pvü lo a-jvü au ketso-o, “Higü hile hai le a-yhütyü kepo nnyu kelo gü tsüle, lo ntsoka we a-le nyu tsethyüo tha hyulo la sela?”

²⁰A-pvü lo a-jvü au le, “Higü le ayi nyu, a-yhütyü po-o nnyu kelo gü tsekethyü ayi le sha bin nyo.

²¹Ai a-le nyu tsethyüo tha hyulo yo agun le shamvu, nmvue segü le a-yhütyü hvu thyü ngwashü yo ayi le sha mvu. Hagun npvü a-ketsolo ta; a-le peshü laso, a-le a-npvü a-rüla zoshü ti.”

²²A-pvü lo a-jvü au le Judanyu kenshvu genyu jo higü zola; kechamvule Judanyu le temi lihigüe temi tsügü le Khrista tsekethyü zolo kehunka nyu hüla titse kethyü kenthon kebin genyu.

²³Tsügenyu a-pvü lo a-jvü au le, “A-le peshü laso, hagun npvü a-ketsolo ta,” tsonla.

²⁴Tsontsin anyugun le a-yhütyü kepogü ko zen ryüo a-ka, “Nle Sunggigü shwenlo nye, temi tsügü tsüle kemunyu nme tsekethyü agun le sha bin nyo.”

²⁵Ai a-le, “A-le kemunyu le nyu tsethyü yo ale shamvu; ai awe le tha nme shabin nyo, tsüle ale a yhütyü po hü, ai ntsoka we tha hyulo laso.”

²⁶Tsügenyu anyugun le a-ka, “A-le nge nyu thyüshü la? A-le nyu tsethyüo nno tha hyu chwiryülo la?”

²⁷A-le anyugun ka, “Ale ngüka hagun ka zoshü so, ai hagun le nyülo mvu; hagun le nyu genyu sha nilo nyü hü nla? Hagun ko a-sikethen nyu thyü nyü hü ole?”

²⁸Tsüselo anyugun le a-kesüo, “Nwe a-sikethen nyu, ai agun we Mosa sikethen nyu.

²⁹Sunggigü le nduka Mosa ka tha zokeshü agun le shabin nyo; ai tsügü we dikipon ryü yo agun le shamvu.”

³⁰Ai a-le anyugun ka, “Ayhütyü hvu thyü ngwa shüe hagun le a-le dikipon gunryü yo tsekethyü sha kemvu tsü le tha ndun kethyü nme.

³¹Sunggigü le kemunyu khwen nyü hü mvu, ai temi lihigüe Sunggigü rüshvu lo a-kenyü thyü kehünyu khwen nyü hünyo, tsekethyü ngun-e shabin nyo.

³²Kazü thyülo keri kanyu ryüo ntsoka keti temi nme-e a-yhüthyü po-o nnyu kelonyu yhütyü thyü ngwa keshü mi sha hümvu.

³³Temi tsügü le Sunggigü kanyu ryü mvu yatselo a-le thame tsü thyülo ho.”

³⁴Anyugun le a-ka, “Nle kemunyu ge n nnyu kelo le, nle agun senthyü ti ole?” tson-o anyugun le kehun kanyu a-hüla.

³⁵Jisu le anyugun le a-hüla tsekethyü shalo, tson-o Jisu le a-hyulo njüo, “Nle Sunggigü Nyugü tenyenlo semon?”

³⁶A-le zoshü, “Npugü, a-le segü la? Ano a-tenyenlo nrün genyu aka zoshü ta.”

³⁷Jisu le a-ka, “Nle a-hyu loso, lo nzen kenthon kebin gü tsüle,” tsonshü.

³⁸Tsontsin a-le, “Npugü, ako tenyenlo so.” Tson-o a-le Jisu rüshvu sola.

³⁹Jisu le zo, “Hyuhü kemvunyu no hyulo nrün genyu lo hyu kehünyu no a-yhütyü pola nrün genyu, me kegwa keshvu sha titseo ale kazü hinyu ryü.”

⁴⁰Lo tsüka a-zen kehü Farisinyu dan le jo tsü shalo njüo a-ka, “Agun ko agun yhütyü po ole?”

⁴¹Jisu le anyugun ka, “Hagun yhütyü po yatselo hagun kemu ndi lati. Ai ntsoka we hagun le, ‘Ale hyu hünyo,’ tson hü; tsügenyu hagun kemu le bin zun.”