Read Southern Rengma Naga APOSTELNYU THO 1 Bible Online

APOSTELNYU THO 1 - Southern Rengma Naga bible

APOSTELNYU THO 1

¹Hire, Theofilo, ale kerigü ka tharüla thu keshügü, tsüle Jisu le a-npvü kejükelo apostelnyu dan ka Kenshün Kapu zen-o jo hoshüla njüo

²a-le tsangge kükela nyü keti, a-le tha thyü lo me senthyü lo binzen kelo dan rüla.

³A-le kenjünthyü kela siki, a-le rhünni so kela siki jon henzi jaka anyugun yhühyu thyüo a-rüla kechon tsin pe anyugun hio Sunggigü Keda rüla pe anyugun kazo.

⁴Lo a-le anyugun zen kehun-o anyugun nthon kethyü ka, “A-le anyugun no Pvügü le zope bin kenjü tsügü hyulo kemvuthen Jerusalem nken tin nyalo tse zoshü. A-le zo kethyü le, jo tsügü tsü rüla hagun le himhundyü shalo laso.

⁵Johan le zü nyu me baptaiz thyü; ai hagun we hisiki jon thon sari kemvu ka Kenshün Kapu nyu baptaiz thyü ti.”

⁶Tsügenyu anyugun le gungü kequen kelo ka, “Npugü, nle hijon ka Israelnyu raja khipe tsü nishü ti ole?” tson-o ketso so.

⁷Tsüselo a-le anyugun ka, “Pvügü le a-npvü a-kekvu lope thyü kenjü tsügwünkho to gü hagun no sha loho.

⁸Ai Kenshün Kapu le hagun ge gunryü keloka hagun le kekvu hyulo ti; tson kelo siki hagun le Jerusalem nyu, Judia lo Samaria lojvü aphu nyu, lo kazü keniketi ki-e ajün zoshü loti,” tsonshü.

⁹Tsüselo a-le jo tsü zoshü kela sika anyugun le a-nri kebin ka a-zen-o tsangge küla, lo tsükatsü nmhu le gunryüo anyugun yhühyu ka a-sun pvü tinla.

¹⁰Lo a-le tson kükela anyugun le tsangge nrio anyugun yhü sükelamvu kebin ka, hire, temi mihvu le phi kechon sen-o anyugun khoka binlo; tsüntimvule tsühvu le anyugun ka,

¹¹“Hire, Galil temi dan hagun le nyuthyüo tsangge nri bin nla? Hagun khoka Jisu zen-o tsangge kü kela hihontse, lo a-le tsangge kü kela kehyu hontse, tsühontse niryü ti,” tsonshü.

¹²Tsüselo anyugun le Oliv kazüthun Jerusalem khokeni ka kebin, Sabbath jon nyü tsonchü lo kegwa khoka ranio Jerusalem nyu ryüla.

¹³Tson-o anyugun le nyida gü nyu ryülo ntsin anyugun kebin ka kahe teso ki tsü küla; lo tsüdan tsüle: Pitor lo Johan lo Jakob lo Andria, Filip lo Thoma, Bartholomia, lo Mathi, Alfia nyugü Jakob, Simon a-yhen kethyü gü, lo Jakob nyugü Juda.

¹⁴Anyugun tsü aphu lo tenunyu dan me ko lo Jisu a-jvü Maria, lo Jisu sikezen nyu dan ko sin tse kengü nyun me thyüo hi anyugun yhen thyü bin.

¹⁵Lo tsügwünkho ka temi tsio nki le gunryüo kehun kebin gwünkho ka, Pitor le a-pvünyu dan nyu solo njüo.

¹⁶“Apvünyu ju, Jisu tenkelo dan zen gü tsin keshü gü Judas rüla nduka Kenshün Kapu le David mün nyu zokeshü tsü Ketsinlesü jo tsü thyü penlo mvulo shvu.

¹⁷Lo a-ko pe ngun sin-o swülo laso, lo lotho hinyu hi kerika nyu a-zan le bin laso.”

¹⁸(Lo temi higü we a-gwakemvu chün pe lobu nme heilo, tson-o a-pe pvü teso tsügü shwenren kebun la njüo a-vü a-ri aphu nso chwiryüla.

¹⁹Lo a-rüla tsü le Jerusalem nyu kebin nyu aphu shakü, tsügenyu ngun khwen ki lobu tsügü lope Akeldama, a-kon le, “Tezi low gü.”)

²⁰“Lo lühin lesü nyu thu kenjü le, ‘A-bin no nrunla; lo temi nme-e no tsünyu bin nya.’ Hihontse kethyü ko thu sin njü, ‘Lo me kechanyu no a-kam senlo,’

²¹“Tsügenyu Npugü Jisu le Johan Baptaiz kethyü gerhonyu binzen keri thyü sogü a-zen-o tsangge kükela nyü keti,

²²lo a-le ndan nyu nsin nshye kehü ka nzen zin kehünyu nme no nzen-o a-le rhünni keso rüla zoshü mvulo shvu.”

²³Tsügenyu anyugun le Josef a-zan le Barsaba letse lo Justa-e letse kehü gü lo Mathia au mihvu kolo.

²⁴Lo tson-o anyugun kengüo Npugü ka kehi thyüo, “Hire, temi aphu nyun shakehü Npugü, nle temi hihvu digü no Judas le hisiki binlo nrün lotho bin nyu gun nrün genyu khekela lotho higü hi lo apostel tho nyu a-sun thyülo nrün nkendo yo tsin pe agun hishü ta,” tson-o hishü.

²⁶Tson-o anyugun le tsühvu zan thu shüo kejü, tsontsin Mathia zan le chwiryülo, tsügenyu a-swü pe tseryü nmeche dan sinlo.