Read Southern Rengma Naga APOSTELNYU THO 10 Bible Online

APOSTELNYU THO 10 - Southern Rengma Naga bible

APOSTELNYU THO 10

¹Lo Kornelia tsekethyü temi nmele Kaisaria nyu bin hü. A-le Italia shüpahünyu tsi so kedanyu nme thyühü.

²Lo a-le a-nyu kaminyu aphu zen-o Sunggigü shye nshvuo tha-e pe me tsü chonsa. Lo Sunggigü ka hizin bin kehü temi kentsen kenshün nme thyü hü.

³A-le khenyüme ngwün ki tegi kenshen kevü gwünkho ka tsemin ki tha nme hyu tsentsü shü; tsügü tsü le Sunggigü lokethyünyu nme le a-ka, “Kornelia!” tsonshü.

⁴Tsontsin a-le tsügü nri tonlo njüo nshvuo, “Nyu tsethyü la, Npugü?” tson-o ketso. Tsontsin tsügü le a-ka, “Nkehi lo ntho kekenjü le sha kügü Sunggigü ti laso.

⁵Lo nle me nipe Jopa nyu shüo, Simon a-zan kechagü le Pitor tsekethyü gü tsü ko zen gunryülo nye.

⁶A-le Simon thyügi thyü kehünyu, a-ka le züda khoka kebin nme ka nyu bin nle nye,” tsonshü.

⁷Lo tsangge lokethyü gü a-zen kenthon kethyü gü le tinla ntsin, a-le a-gonyu mihvu lo shüpahünyu a-lo thyüzin kehü kentsen keserinyu nme sin-o kolo.

⁸Tson-o a-le anyugun ka jo tsü aphu zo tsentsü shü njüo anyugun nipe Jopa nyu shü.

⁹Lo tson-o anyugun le tsüsi nyü gungü rünyi kho nni kelo ka Pitor le nhenyu kehi gwünkho ka hi titse ka soki kü.

¹⁰Lo tsükatsü nnyon-o chvütyü nyüla; ai mele ketyüketsü ndo ketseka a-le pesi la.

¹¹Tsükatsü a-le tsangko keshü lo tha khin phi keda qünzi kethyü hontse pe kazü nyu hokeshü hyulo.

¹²Lo tsünyu tsü nyukhu phazi kepvü lo kazü nyu nyon kehü nyukhu lo tegü dan aphu bin.

¹³Lo thakhwen nme le a-ka gunryüo, “Pitor, nle so-o dushvu tyülo gwün chi!”

¹⁴Ai Pitor le, “Tsonshvu le, Npugü, ale thame ka-e tha kezükemvu lo tha nshün kemvu nme-e tyüshwi hümvu le!”

¹⁵Tsüselo thakhwen tsügü le a-ka, “Sunggigü le thyü kenshün keshü gü nle zo nrhu nyalo!” tson zola.

¹⁶Lo tsühontse gwünshen ge thyü; tson-o thakhin tsügü sen-o tsangge kü nila.

¹⁷Tsügenyu Pitor le tha kehyu tsüle a-kon le nyu yo tsekethyü rüchün pe a-dun thyü bin ntsin, hire, Kornelia le nikeshü temi danle Simon ka ketso gunryüo chonrha ka bin.

¹⁸Simon Pitor tsekethyü gü tsüle gunryüo tsünyu bin le mvuyo tsekethyü me ko-o ketso bin.

¹⁹Lo Pitor le tha kehyu gü rüchün kebin ka Kapu le a-ka, “Hire, mishen le nfü hü nle.

²⁰Tsügenyu nle so-o thame rüchün kesedun nyao nshye gü tsüdan zen gunlo; kechamvule ale anyugun nikeshü genyu,” tsonshü.

²¹Tsüselo Pitor le temi tsüdan ki nshye gü, “Hire, hagun le fü kehü gü tsüle ale le; lo hagun le nyu genyu gunryü la?”

²²Tsügenyu anyugun le, “Kornelia, shüpahü tsiso keda thyü kehü, temi kenshün lo Sunggigü shye nshvu kehünyu, lo Judanyu aphu mhundyü ka teshwen pvü kehünyu nme, Sunggigü le a-lokethyü kenshün nyu nme no a-ka zoshü njüo a-no me nipe nkoshüo nzen-o a-ka nyu gunryüo nka jo nyülo lotse zoshü le,” tsonshü.

²³Tson-o a-le anyugun ko zen yügü anyugun nsinlo. Tson-o a-le tsüsinyü anyugun zen gun la; lo tsükatsü Jopa nyu kebin a-pvünyu ju peha le a-zen gun.

²⁴Lo tsüsinyü anyugun kengüo Kaisaria nyu yülo. Tsükatsü Kornelia le a-shvu a-nyenyu dan kokü zen gungü a-ka nyu kequen sen-o anyugun khwen bin.

²⁵Tson-o Pitor le kanyu ki yü ntsin Kornelia le a-zen keteno-o a-pha nyu nkhüntsülo njüo a-rüshvu sola.

²⁶Ai Pitor le a-pensolo njüo a-ka, “Nle solo chi; ako temi nme le.”

²⁷Tson-o a-le Kornelia zen kenthon-o kanyu ki yü ntsin temi kechon le gunryüo kequen kebin hyulo.

²⁸A-le anyugun ka, “Judanyu nme-e gungü rünyi kechanyu zen-o kepvüshe-o kengü dan me thyü kehü nmvue tsünyu ka gun kethyü tejvü kemvu hagun le shabin ti; tson yatse-e Sunggigü le ano temi nme-e no rhu, nmvue nshün mvu tsekethyü zo nyalo tse kethyü tsin pe ahishü laso.

²⁹Ale tsügenyu mele ako gunryü ntsin thame ka-e nmvu tse mvuo gunryü laso. Tsügenyu hagun le nyu rüchün-o akoshü yo aka zoshü gwünlo.”

³⁰Tsontsin Kornelia le, “Nthu jonshen so, ale nhenyu tegi kenshen kho ka kehi gwünkho ka aka nyu hi kebin ka, hire, temi nme le phi kechon ben-o ryüo akhoka binlo njüo aka,

³¹‘Kornelia! N kehi tsü nyülo laso, lo nle tha pe metsü mejün keshü dan sha kügü Sunggigü tila so.

³²Tsügenyu nle me nipe Jopa nyu shüo Simon Pitor letse kethyü gü, ko zen-o nki gunryülo chi. A-le gungü züda khoka Simon thyügi thyü kehü gü ka nyu bin nle nye,’ tson sola.

³³Tsügenyu ale kenyunrhüo me nipe nki keshü ka nle gunryü kethyü genyu gwasa le. Lo agun le nthu Npugü le nka zokeshü nyü titse gunryüo Sunggigü mhundyü nyu dun kü bin nle.”

³⁴Tsüselo Pitor le anyugun ka, “Sunggigü le temi nme-e rühvu kecha thyühümvu.

³⁵Ai temi tsipwen lihigüe a-she nshvuo yhun nshünlo kehünyu a-le tsünyu shwi a-kenyü hü ketsin tsekethyü ale rüchünlo laso.

³⁶Sunggigü le Israel nyenyu dan no aphu sokebin Npugü Jisu Khrista kanyu kegwa thyü kela jolokegwa kezo gü shalo laso.

³⁷Hagun ko sha bin tiso, jo tsügü tsüle Johan Baptaiz kethyü siki Galil nyu zo chwilo njüo Judia aphu nyu zo gun kelagü tsüle.

³⁸Tsügü tsüle Sunggigü Kenshün Kapu lo kekvu khipe a-ge shüo a-kejülo kela gü Jisu rüla le; a-le liki hiki gungü thakegwa thyü, lo tero gwakemvu gü no nchün ndü zen kehünyu aphu thyü kesherhünlo; kechamvule Sunggigü le a-zen kehü genyu.

³⁹Lo a-le Judanyu kazü aphu lo Jerusalem nyu thathyü keshü tsü aphu rüla kezonyu tsü le agun hile; mele tsügü tsü pe sen ge hüo dushvula.

⁴⁰Ai Sunggigü le jonshen nyü a-thyü nrhünnilo njüo a-no me yhühyu thyü.

⁴¹Temi aphu mvule Sunggigü le nduka a-rüla kezo kejükelo agun npvü yhühyu thyüshü; lo agun le a-le kesinyu dan nyu rhünni keso siki-e a-zen-o ketyüketsüe thyü le.

⁴²Tson-o a-le agun no me mhundyü nyu Sunggigü le kesinyu lo kerhün nyu jo kera kethyü gü thyü titseo kejü keshü gü tsüle a-le tsekethyü zo pe me hi lo a-rüla zoshü lotse zoshü.

⁴³Tsüntimvule a-tenyen kelonyu aphu a-zan nyu kemu jülo titse kethyü sidyükeshanyu aphu a-rüla zo gunryü le.”

⁴⁴Tsüselo Pitor le jo tsü zo ketseka jo tsü keshanyu aphu ge Kenshün Kapu le gunryülo.

⁴⁵Tsükatsü Pitor zen gunkeryü a-girü kepvü tenyelo kela dan le Kenshün Kapu le Juda kemvunyu kechon so gunryü kela hyu pe anyugun dun thyüla.

⁴⁶Kechamvule anyugun le Juda kemvunyu dan le khwen sha hü kemvu khwen zo-o Sunggigü shwen sabin kela sha kelo genyu.

⁴⁷Tsontsin Pitor le, “Ngun hontse Kenshün Kapu hyukelo dan hi baptaiz thyü nyalo tsekethyü temi peha le zü khinlo gwa ole?”

⁴⁸Tson-o a-le anyugun no Jisu Khrista zan nyu baptaiz thyülo lotse kethyü anyugun ka zoshü; lo anyugun le a-no jon keshanyu anyugun zen binlo tse tenge tse sola.