Read Southern Rengma Naga APOSTELNYU THO 11 Bible Online

APOSTELNYU THO 11 - Southern Rengma Naga bible

APOSTELNYU THO 11

¹Tsüselo Apostelnyu le Judia nyu kebin npvünyu dan le Judakemvunyue Sunggigü jo zen kelo shalo.

²Tson-o Pitor le Jerusalem nyu gunryülo ntsin a-girü kepvü dan le a-zen kenyi so.

³“Nle a-girü kemvunyu kanyu gungü anyugun zen-o tyütsü amon!” tson sola.

⁴Ai Pitor le tsü rüla nyu hontse layo a-keri tsin anyugun ka zo petsü sashü.

⁵“Ale himhundyü ki Jopa rünyi nyu hi kebin ka; ale pesi kebin ka tha nme hyu; tsügü tsü le phi kedaki tsekethyü thakhin nme a-qün pezi aphu ka tha pe dyüo tsangge tsüryü; lo tsüle tsüryüo atilo.

⁶Tson-o ale tsü nriryülo-o tha rüchün bin ntsin, tsünyu tsü kazü nyu npvü kehü nyunkhu phazi yi lo tehen thyü lo nyunkhu nyon kehü lo tegü dan tse bin-o hyulo.

⁷Tsüntimvule thakhwen nme shasin kelo le, ‘Pitor, nle so-o hidan hi dushvu tyülo,’ tsonshü.

⁸Ai ale a-ka, ‘Tsonlo shvule, Npugü! Ale thame ka-e tha kerhu nmvue nshünkemvu tsüpe amün nyu shü shwi hü kemvu genyu,’ tsonla.

⁹Ai tsükatsü ko tsangge tsü aka, ‘Sunggigü le thyü kenshün keshü tsü nle tsü zo nrhu nya chi,’ tsonni.

¹⁰Lo gwünshen ge tsühontse thyü; lo tsüsika tsü aphu khini sen-o tsangge küla.

¹¹Lo tsügwünkho ka tsü Kaisaria nyu mishen nikeshü dan tsü le aka gunryüo agun le kebin kagü mhundyü nyu binlo la.

¹²Tsüselo Kapu le ano kenyun sun nya tseo anyugun zen gunlo lotse zoshü. Lo ngun pvünyu mi tsero hidan hi ko azen gun; tson-o agun kethen-o temi gü kanyu yüryülo.

¹³Tsüselo a-le agun ka, himhundyü ki tsangge lokethyünyu nme le gunryüo a-ka nyu binlo njüo, ‘Nle me nipe Jopa nyu shüo Simon Pitor letse kehü gü ko zen gunryülo chi.

¹⁴A-le nka jo peha zoshü ti; jo tsügütsü genyu nko lo nkaminyue tse keni loti,’ tsonshü letse.

¹⁵Lo tsüsika ale jozo so ntsin nduka ngun ge keryü hontse anyugun ge ko Kenshün Kapu le tsüryü la.

¹⁶Tsükatsü Npugü le Johan le zü nyu baptaiz thyü, ai hagun we Kenshün Kapu nyu baptaiz thyü loti tsekethyü zo kenjü asi rüchünlo.

¹⁷Kha, nduka ngun le Npugü Jisu Khrista tenyenlo ntsin, Sunggigü le Kenshün Kapu kenrun nyu pe ngun ketsü gü nyu tsü pe anyugun ko tsü yatselo ale temi nyu tsekethyü letseo Sunggigü khinlo tila!” tsonshü.

¹⁸Tsügenyu anyugun ko jo tsü shalo njüo ntsema tseo Sunggigü shwen-o, “Sunggigü le a-npvü Juda kemvu nyue no kerhün nyu gunlo nrün genyu anyugun nyun thyükelu pe anyugun tsüshü laso!”

¹⁹Lo himhundyü Stefan genyu kenjünthyü sokeryü ka tin tsenchvü kegun ka anyugun le Sunggigü jo lope me senthyü sen-o Foenikia lo Saipros lo Antiok nyu gun, ai Judanyu nti ka ame kechanyu ka we zoshü mvu.

²⁰Ai anyugun dan nyu Saipros lo Siren nyu dan me le Antiok nyu gunryüo Npugü Jisu rüla zope Griknyue tesha shü.

²¹Lo Npugü kekvu le anyugun zen kehü genyu temi kechon ki le tenyenlo njüo ranio Npugü kipon gunryülo.

²²Tsüselo Jerusalem nyu kebin kehun dan le temi tsüdan rüla shalo ntsin anyugun le Barnaba nishüo a-no Antiok ki gun.

²³Lo a-le tsünyu gun ntsin gungü Sunggigü le a-npvü temi shwikenjün hyulo-o a-sherhün salo; tson-o a-le anyugun no anyugun nyun tsekho sen-o Npugü tenyen ton binlo lotseo anyugun nyun thyü kepeche sashü.

²⁴A-le temi kegwa nme lo Kenshün Kapu lo ketenyen-e pe a-sü kepvünyu nme; lo temi kechon le Npugü kipon ryülo.

²⁵Tsüselo a-le Saul füo Tars rünyi nyu gun; tson-o tsünyu a-hyulo ntsin a-zen-o Antiok nyu gunryü.

²⁶Tson-o au le tsünyu chen me laki kho kehun zen kengü bin-o temi kechon senthyülo; lo tsünyu senthyükelonyu lope Khristian tse kolo keri tsin thyü.

²⁷Lo tsükatsü Jerusalem nyu sidyükesha dan me le Antiok nyu ryü.

²⁸Lo anyugun dan nyu Agaba tsekethyü nme le Kenshün Kapu kekvu nyu soryüo anyugun mhundyü nyu solo njüo sidyü jo zo-o, Kazü aphu nyu chenda thyü pe ketetsin thyü gunryü titse zoshü. (Lo tsü le Klaudia le raja thyü ketse gwünkho ka tsü thyü ryü.)

²⁹Tsügenyu senthyükelonyu aphu tse thyülo kegwathen Judia nyu kebin anyugun pvünyu dan shweshwi shü nrün genyu tha khipe anyugun cheshü mvulo keshvu rüchünlo la.

³⁰Lo anyugun le tha khipe Barnaba lo Saul au tenyen shüo au no tsü sen gungü pelünyu ju ka shü.