Read Southern Rengma Naga APOSTELNYU THO 12 Bible Online

APOSTELNYU THO 12 - Southern Rengma Naga bible

APOSTELNYU THO 12

¹Lo tsügwünkho ka tsü Herod raja le kehun nyu temi peha nshwen sola.

²Tson-o a-le zhethon pe Johan tsagü Jakob dushvula.

³Lo tsügenyu Judanyu dan le anyugun sherhün kelo shao a-le Pitor ko tenlo. Lo tsükatsü le kebu no shükemvu tensü ketyü nga jon ka.

⁴Lo a-le a-tenlo ntsin khipe doka nyu shülao shüpahünyu mizi zi no keserio a-khwenlo lotse la; tson-o a-le nkenkechwi nga sika a-zen-o temi dan mhundyü nyu kegun rüchün bin.

⁵Tsügenyu Pitor khipe doka nyu shü njü; ai kehun le anyugun yhenthyüo Sunggigü ka kehithyü bin.

⁶Herod le a-zen chwiryü nrün mhundyü je Pitor le shüpahünyu mihvu janyu tegiron kenyhun pe a-dyü pvü tse zhü bin; lo rikhun nyu le kakhin mhundyü nyu doka khwen bin.

⁷Tsükatsü hire, Npugü lokethyünyu nme le gunryüo a-khoka binlo, lo doka tsünyu tsü keben nme le tha ben pe benchvü tsela; lo a-le Pitor chwenkenuo a-kesun shüo a-ka, “Nle whütse solo chi!” Tsontsin tegiron hvu tsüle a-ben ge nyhola.

⁸Tsüselo tsangge lokethyü gü tsüle a-ka, “Nsen philo lo nphaje ko pvülo!” tsonshü. Tsontsin Pitor le tsühontse thyülo. Tsüselo tsangge lokethyü gü le a-ka, “Nphi khibenlo njüo asithenlo!” tsonshü.

⁹Lo a-le chwigü a-sithenlo; ai a-le tsüle tsemin tha nme hyushü letseo tsangge lokethyü gü le thyükeshü tsüle a-ketsin nme tse kethyü rüchün bin mvu.

¹⁰Tson-o au kethen sen-o rikhun kerigü lo tsüsigü nkenlo ntsin nyida gü kipon tegi khenpvü nyu gunryülo; lo chwida khenpvü kekhin tsügü le a-npvü a-khinshye pe au tsüshü. Tson-o au le chwilo njüo tsonlu nme zen gunzhü; tsontsin tsangge lokethyü gü le a-khela.

¹¹Tsüselo Pitor le ntsenlo njüo a npvü a-nthon-o, “Ale ntsoka we Npugü le a-lokethyünyu nishüo Herod ben nyu lo Judanyu kendo aphu nyu akenilo laso tsekethyü sha tsentsülo laso!” tsonlo.

¹²Tson-o a-le jo tsüdan rüchün gunzhü ntsin gungü Johan Mark tsekethyü gü a-jvü kanyu gunryülo, ka tsünyu temi kechon le gungü tsünyu kequen-o hi kebin tenolo.

¹³Lo tsükatsü a-le chonrha kakhin gü kekhoshü ntsin Rhoda tsekethyü tenunyu nme le tsü nri titse chwiryü.

¹⁴Lo a-le Pitor khwen nyülo ntsin a-shekerhün pvüo kakhin gü shyeshü mvulao, kanyuki nton yügü Pitor le gunryüo kakhin mhundyü ka bin nle tse zoshü.

¹⁵Tsüselo anyugun le a-ka, “Nle nnu bin laso!” Ai a-le a-yhenthyü zoni kvuo tson ketsin thyü letse zo sola. Ai anyugun le a-men ado tse so.

¹⁶Ai Pitor le kakhin gütsü kekho bin; tsügenyu anyugun le kakhin shye chwigü a-hyulo-o anyugun dunthyüla.

¹⁷Tsükatsü a-le anyugun ka nra nyalo tseo ndo pe anyugun hishüo, Npugü le doka nyu a-zen chwiryü kelo rüla pe anyugun ka zoshü. Tsüntimvule a-le, “jo hilope Jakob lo a-pvünyu dan ka ko zoshü nye,” tsonshüo a-le kecha nme ki tinla.

¹⁸Tsüselo tsangbenlo ntsin Pitor le dikipon tinla yo tsekethyü zo-o shüpahünyu dan nyu kevü khe nti mvula.

¹⁹Tsükatsü Herod le Pitor fü kendio a-kekhwenyu dan ketsoketsü sao tsüdan dushvula lotse ahza hoshüla. Lo Tsükatsü Herod le Judia nyu Kaisaria ki gungü tsünyu bin.

²⁰Lo Herod le Tur lo Sidon nyu ge a-kenyü mvu sa hü; lo anyugun le kengüo jo me thyülo njüo raja gü gogü Blasta no anyugun jün zoshüo anyugun rünyi le raja gü rünyi nyu tha hyutyü kehü genyu raja gü zen-o kegwa thyüla titse hi.

²¹Lo jon tho keshü nme nyü Herod le a-raja kanyü pe a-nthyülo njüo raja bin ge dun-o anyugun ka tha zo.

²²Tsügenyu temi dan le sen-o, “A-khwen hile temi khwen mvule teronyu khwen so!” tson sola.

²³Tsüselo Npugü lokethyünyu nme le a-le Sunggigü shwen mvu kethyü genyu kenjün kethyü pe a-tsü whütse shü; tsontsin ntse le a-tyüo sila.

²⁴Ai Sunggigü jo we chvü gwen gwen tse pe meno sha gunla.

²⁵Lo Barnaba lo Saul au le tsünyu tha thyü penla njüo Johan Mark tsekethyü gü zen-o Jerusalem nyu nigun ryüla.