Read Southern Rengma Naga APOSTELNYU THO 13 Bible Online

APOSTELNYU THO 13 - Southern Rengma Naga bible

APOSTELNYU THO 13

¹Tsükatsü Antiok nyu sidyükeshanyu lo senkethyü nyu: Barnaba lo Nager tsekethyü Simeon, lo Kurin nyu Lukia, lo menyu leyi pe Herod sikezen nyu thyükelo Manaen, lo Saul tse le bin.

²Lo anyugun le Npugü lothyü, lo nyen-o hi kebin ka Kenshün Kapu le, “Hagun le Barnaba lo Saul au nikho pe akipon shüo ale au no tha nme thyülo tseo au kokelo gü thyülo chi,” tsonshü.

³Tsügenyu anyugun le nyen-o hi lo anyugun ben shwen pe au ge shüo au nishü la.

⁴Lo Kenshün Kapu le au nishü ntsin, au le Selukia nyu gun-o tsünyu run ge Saipros nyu gun.

⁵Tson-o au le Salami nyu kebin ka Sunggigü jo pe sinagog ka nyu me senthyü shü; lo tsükatsü Johan Mark zen-o au che hü.

⁶Lo au le tsünyu ntsü sen-o zükehun kazü tsünyu tsü aphu ka gungü Pafa tilo; au le tsünyu tsü Barjesu tsekethyü Judanyu sidyükesha ketsin kemvu temvunyu nme hyulo.

⁷A-le rünyi tsünyu keda thyü kehü gü Sergia Paul tsekethyü tha keshanyu nme zen bin hü. Temi tsügü le Barnaba lo Paul au kozen a-ki gülo-o Sunggigü jo gü nyülo nyü sola.

⁸Ai Eluma temvu gü le kedagü kerüchün thyü kelula nyüo au ntsun sola.

⁹Ai Saul, Paul-e letse kehü gü le Kenshün Kapu no a-süpvüo temi tsügü nri ryülo njüo,

¹⁰“Hire, Kenkukenru, lo nshün kemvu aphu pe nsüpvü kehügü satan nyugü, Ketsin aphu shwirüchün kehü gü. Nle Npugü tson kenjü thyü nshvu kehü gü khela loho le?

¹¹Lo hire, Npugü ben le nge bin laso, lo nle gwün gwa nyhütyü pola-o yhüko keben hyulo mvu lati so, tsonshü.” Tsonshü ntsin tha kezün nme le ryüo a-yhütyü sunlo la. Tsüselo a-le temi peha no a-ben sülo lotseo nsin nshye sola.

¹²Lo kedagü tsüle tha tsühontse kethyü tsü hyushüo a-dunthyüo Npugü jo gü tenyenlo.

¹³Tsükatsü Paul lo a-pvünyu dan le Pafa nyu run zen sen-o Pamfilia kazü Perga nyu gunlo; tson-o tsünyu tsü Johan le anyugun khela njüo Jerusalem ki rani gunla.

¹⁴Lo anyugun le Perga nyu tsonchü shüo gungü Pisidia kazü Antiok tilo; tson-o anyugun le Sabbath nyü tsüdan sinagog ka nyu yügü binlo.

¹⁵Lo tejvü lo sidyükesha lesü swü keshü sika kehun ka tsünyu tejvü sen kehü dan le me nipe anyugun ka, “Agun pvünyu dan, hagun le temi nyun thu keyhun keshü jo le bin yatselo zoshü ta,” tsonshü.

¹⁶Tsügenyu Paul le solo njüo a-ben shwen lo-o jo zo so: “Israel temi dan, lo Sunggigü shye nshvu kehü dan: hagun ajo nyüshü ta!

¹⁷Israel nyu hidan hile Sunggigü le sokerika nyu ngun pepvünyu kejülo, lo anyugun le gungü Ijipt lojvü ki yhun kehü ka temi hidan hi no me nyeki gwakvu, lo a-ben kekvu lope tsünyu tsü anyugun zen chwiryülo.

¹⁸Tson-o chen henzi kho a-le tehen nyu anyugun nthon ryü.

¹⁹Tsüsiki a-le Kanan kazü nyu temi tsipwen tsenyü nkelao anyugun no kazü tsünyu chen tsizio henpvü laki kho tsünyu yhun.

²⁰“Lo tsüsiki Samuel sidyükeshagü le soryü kemvuthen a-le temi ketso kehü dan me no anyugun so keda thyü gunryü.

²¹Tson hüo anyugun le raja nme hi sola; tsügenyu Sunggigü le Benjamin tsipwen nyu nme Kish nyugü Saul no chen henzi anyugun raja thyü.

²²Lo tsüsika a-le raja tsügü hüla njüo David no soryüo anyugun raja thyü. Sunggigü le a-rüla zo-o, ‘Ale akerüchün gü nyu hontse temi nme le akendo aphu thyü nrün gü Jesse nyugü David hyulo laso,’ tson zo.

²³Temi tsügü tsipwen nyu Sunggigü le zo kenjü gü kenikelo gü Jisu no Israel nyu ka yhun ryü.

²⁴Lo a-le gunryü nrün Johan le nchwenyu Israel nyu aphu mhundyü nyu nyunkelu kelo baptism zo pe me senthyü.

²⁵Tson hüo Johan le a-tho tsüthyü penlo gü kezhü ka a-le, ‘Hagun we ale segü letse rüchün hü nla? Ale hagun le khwen kebin tsügü mvu, tson la! Ai hire, temi nme le asiki ryü zhü; ale a-phaje kephin-e shwelo kümvu!’ tson sola

²⁶“Apvünyu ju, Abraham tsipwen dan, lo hagun dan nyu Sunggigü shye nshvu kehü dan, nthu kenikelo jo tsügü khipe hagun ka shülo bin nle.

²⁷Lo Jerusalem nyu yhun kehünyu dan lo anyugun so kedanyu jue a-sha mvu lo Sabbath jon tsenyü sidyükeshanyu lesü swü hüe sha hü kemvu genyu a-rüchün kenshvu nyu tsüdan thyü penlo laso.

²⁸Tsüntimvule anyugun le a-dushvu kezü tho nme-e hyulo mvu tse anyugun le Pilat ka a-dushvu lalo tsekethyü hukum hilo.

²⁹Tson-o anyugun le a-rüla thu kenjü aphu thyü pen küla njüo, san gü ge a-süshye sen tsenryüo a-pen gungü sika nme nyu shü njü.

³⁰Ai Sunggigü le kesinyu dan nyu a-thyü nrhünlo laso.

³¹Lo tsüsiki a-le tsang keben jon kechon ki-e Galil nyu a-zen-o Jerusalem nyu gunkeryü nyu dan ntsoka temi dan mhundyü nyu a-rüla zo kehünyu dan zen-o kesha kehyu shü.

³²Lo nduka nbon nyu dan ka zo kenjü gü, Sunggigü le anyugun nyenyu dan kanyu Jisu tsügü thyü nrhünlo njüo jo tsügü thyü penlo, agun le nthu jolokegwa tsügü sen-o hagun ka ryü bin nyo.

³³Jo higü rüla le lühin lesü kenyhun gü ka, ‘Nle a nyu so; ale nthu n nnyulo so,’ tson kethyü thu njü.

³⁴Lo Sunggigü le kesinyu dan nyu a-thyü nrhün kelo le a-no tenren nila mvu titse kethyü genyu le, lo a-le tsü rüla-e, ‘Ale David tsü nrün jochü Kenshün lo hyulo tsentsü titse kethyü dan khipe ntsü ti,’ tson kethyüe a-le zo njü.

³⁵Tsügenyu a-le lühin lesü kecha nme nyue, ‘Nle nkenshün gü khipe no tenren kela thyü loho,’ tsonkethyü zo njü.

³⁶David le Sunggigü kendo zen-o a-npvü a-temi dan lothyü hüo sila; tson-o a-khipe anyenyu dan sin-o sunla, tson-o tenren la.

³⁷Ai Sunggigü le a-thyü nrhün kelo gü we tenrenla mvu.

³⁸Tsügenyu apvünyu ju, hagun shalo nye. Temi tsügü ge kemu keni nikeshü jo pe hagun senthyü hünyo.

³⁹Tsüntimvule a-genyu tenyenlo kehü nyu aphu Mosa jvü nyu zhülo keho tha kechon ka-e nzhü nilo hünyo.

⁴⁰Tsügenyu hagun le sidyükesha lesü nyu,

⁴¹‘Hire, hagun me ntsü kehünyu dan! Hagun dunthyüo nkela chi! Kechamvule ale hagun keyhun ka peha le hagun ka zohüe hagun le tenyen loho, thatho tson kethyü nme thyü kehü genyu!’ Tson kethyü zo kenjü dan no hagun ge ryü mvu nrün genyu hagun petsü sa bin lo nye.” tsonshü.

⁴²Tsüselo anyugun le chwi kezhü ka hisigü Sabbath jon nyü ko jo tsüdan zonishü lotseo a-ka hiso.

⁴³Tson-o kehun kekho la ntsin Judanyu dan nyue lo Judanyu jvü zen kehü rünyi kechanyu kenshün nyu dan nyu temi kechon le Paul lo Barnaba au sithen tinla. Lo tsükatsü au le anyugun zen kenthon-o Sunggigü le temi shwikenjün nyu binzin hü lotse anyugun thu keyhun sinshü.

⁴⁴Tsüsigü Sabbath jon nyü rünyi tsünyu temi aphu gunryü bu khetselo njüo Sunggigü jo nyü titse ryüo kequenlo.

⁴⁵Ai Judanyu dan le temi dan hyushü ntsin, anyugun yhüthyü sa lola njüo Paul le kezo jo tsüle a-kemvu letseo nkhin sa lola.

⁴⁶Ai Paul lo Barnaba au le jozo peche sao, “Sunggigü jo lope hagun ka zo terishü kethyüi; ai hagun le jo higü hi kenila njüo kethonthen kerhün hyulo kümvu letse kela genyu, hire, agun le Juda kemvunyu ki gunla ti sele nye.

⁴⁷Npugü le agun ka kezo le: ‘Ale nno Juda kemvunyu keben nme thyü nrün genyu nkhikholo laso; tson-o nno kazü keni keti aphu ki-e me kenikelo nme thyü ti,’ tson zo hünyo.”

⁴⁸Tsüselo Juda kemvunyu we jo tsügü shalo ntsin anyugun shekerhün thyüo Sunggigü jo gü shwen sa sola; lo a-no kethonthen kerhün hyu tsentsülo titse kehünyu aphu jo tsügü tenyenlo.

⁴⁹Lo Npugü jo le rünyi tsüte tsümhun kebin aphu nyu sha gunla.

⁵⁰Ai Judanyu dan le tenunyu teshwen kepvü kenshün nyu lo rünyi tsünyu pelü dan ketsun shüo, tsüdan no Paul lo Barnaba au nshwen lotse kethyü thu keyhun shüo au hü pe a-nyu rünyi tsü nken chwila.

⁵¹Ai au le au phaje ge kemphü kekhü pe anyugun kipon shülao Ikonia nyu gunla.

⁵²Tson-e senthyükelonyu dan we anyugun shekerhün thyüo Kenshün Kapu no anyugun kesü thyü pvü tse bin tinla.