Read Southern Rengma Naga APOSTELNYU THO 14 Bible Online

APOSTELNYU THO 14 - Southern Rengma Naga bible

APOSTELNYU THO 14

¹Tsüsika Ikonia nyu au le kengüo Judanyu sinagog ka nyu yü kethyü ka au jo genyu Judanyue lo Griknyue temi kechon le tenyenlo.

²Ai tenyen kemvu Judanyu dan le Juda kemvunyu pvü keyhun shüo anyugun no ketenyen nyu shwi rüchün lola.

³Tsügenyu au le kethon ki-e tsünyu bin-o Npugü zan sen-o jozo au yhenthyü binlo; lo A-le au no thazansü lo ndun kethyü tho thyü lotseo kekvu pe au tsüo A-le me shwikenjü jo gü rüla zoshü.

⁴Ai tsünyu temi dan le danhvu thyüla; tson-o dan me le Judanyu kipon lo danme le apostelnyu kipon tse bin lola.

⁵Ai Judanyu lo Juda kemvunyu dan le anyugun so kedanyu dan zen sin-o au swetsü lo tso pe au jon titse gunryü kezhü au le shalo.

⁶Tsügenyu au le tin sen-o Lukaonia, Lustra, lo Derbe rünyi nyu lo tsüte tsümhun rünyi thyü kebin nyu gunla.

⁷Tson-o tsünyu jolokegwa zope me senthyü hü tinla.

⁸Tsükatsü Lustra nyu temi nme le nnyulo nyemhun nyu aphu gwamvuo thame ka-e tsonchülo shwi hü kemvu terothonyu nme le bin.

⁹Temi tsügü le Paul le me senkethyü khwen nyü bin; tsontsin temi tsügü le Paul no a-thyü ngwa keshü tenyen kebin a-le hyulo-o a-nri tonlo njüo nra a-yhenthyüo,

¹⁰“Nle soryüo npha hvu khi pe rhunlo chi!” tsonshü. Tsontsin a-le nkvu whütse soryüo tsonchü tinla.

¹¹Tsontsin temi dan le Paul tho tsügü tsü hyushü njüo nra pe ketetsin thyüo Lukaonia nyu khwen ki, “Teronyu le temi rhenrhü thyüpvü gunryüo ndan nyu hü laso!”

¹²Tson-o anyugun le Barnaba no Jupiter thyü, lo Paul le jozo chon kethyü genyu a-no Merkuri thyü tse sola.

¹³Lo tsükatsü rünyi tsügü mhundyü nyu kebin kershvuka gü nyu teromen nme no Jupiter letse kehü gü peshü gü le methu tse lo nyekepun sen-o chwida nyu ryüo temi dan zen-o au rüshvu nyü sola

¹⁴Ai apostel Barnaba lo Paul au le jo tsü shalo ntsin au le phinya sürhen-o temi dan nyu nton gungü nra sen-o;

¹⁵“Hire, kedanyu dan, hagun le nyuthyüo hihontse kethyü thyü hünla? Agun-e temi hagun hontse kethyü nyu dan me le la; lo hagun no tha lihi kemvu hinyu hi ranio tsang lo kazü lo züda lo tsünyu kehü aphu thyü keshü gü rhünzin kehü gü Sunggigü ki ryülo lotse kethyü jolokegwa sen-o hagun ki keryü gwünzin lela.

¹⁶A-le nduka we temi aphu no a-npvü a-kendo nyu hü kü.

¹⁷Tson-e a-le tsangge tsang no ritsüryüo tha no a-sha nshalo kegwa gwünkho thoshüo ketyüketsü lo temi kenyü thyü pe temi kesükela thyüshüo thakegwa thyüo a-npvü a-jün zoshü hü,” tsonshü.

¹⁸Tson-o a-le jo tsüdan tsü pe anyugun ka zo-o temi tsüdan no au rüshvu nyalo tsekethyü khin rüsa tseo khinla.

¹⁹Ai Antiok lo Ikonia nyu Judanyu danme le tsü nyu ryüo temi dan ketsun shüo tsüdan no tso pe Paul jon-o a-le sila sele tse lao a-nrhisü sen chwigü anyugun chwida ngwen ki shüla.

²⁰Ai tsükatsü senthyükelonyu dan le a-hunpvü bin ntsin a-le so-o rünyi tsünyu tinni yüla; tson-o tsüsinyü Barnaba zen-o Derbe nyu gunla.

²¹Lo au le rünyi tsünyu-e jolokegwa zope me hishü njüo temi no senthyükelo thyü nchonlo, tson-o au le Lustra lo Antiok ki nigunla.

²²Lo rünyi tsüdan ka anyugun no ketenyen nyu ketu nya binlo tse lo nne kenjün kethyü aphu nyu Sunggigü keda nyu yü mvulo shvu tsekethyü zope senthyükelonyu thu keyhun, lo anyugun nyun thyü kepeche shü.

²³Tsüntimvule au le kehun aphu nyu kehun ketsen nrün nyu kejü küshüo nyen lo kehithyüo au le anyugun khipe anyugun le tenyen kelogü Npugü ben nyu shüla.

²⁴Tsüsika au le Pisidia kazü pvüthüo Pamfilia nyu ryüla.

²⁵Lo tsüsika au le Perga nyu Sunggigü jo zope me hishüo Atalia nyu nshyela.

²⁶Tsüselo tsünyu run nyu yülo njüo Antiok ki nigun la. Rünyi tsünyu himhundyü mele au khipe Sunggigü shwikenjün nyu lotho thyü lotse zoshü; lo au le thatho tsügü tsü thyü penla.

²⁷Tson-o au le tsünyu gunlo ntsin rünyi tsünyu kehun ko kequen shüo Sunggigü le au zen-o tha thyükelo aphu lo A-le Juda kemvunyu genyue ketenyen kakhin nme khinshye keshü, jo tsü aphu pe anyugun ka zoshü.

²⁸Tson-o au le tsünyu senthyükelonyu dan zen-o bin thonsa tinla.