Read Southern Rengma Naga APOSTELNYU THO 15 Bible Online

APOSTELNYU THO 15 - Southern Rengma Naga bible

APOSTELNYU THO 15

¹Tsüsika Judia nyu kebin temi dan me le nshyeryüo Antiok nyu kebin npvünyu ju senthyüo, “Mosa jvü hontse hagun ko hagun girü kemvu we kenikeloi ndi,” tson sola.

²Tsügenyu Paul lo Barnaba au le tsüdan zen kenyio anyugun jo kerhün khemvula ntsin Paul lo Barnaba au no temi peha zen nilo njüo Jerusalem nyu nsin gü apostelnyu lo kehun pelü dan ka tsü rüla ketsolo tseo kenthonlo.

³Tson-o kehun le anyugun zen gungü tsonki shü njüo, anyugun le Fonikia lo Samaria pvüthü sen-o Juda kemvunyu le nyunkelu kelo rüla pe meka zoshü; tson-o anyugun genyu ketenyen nyu aphu no sherhün salo.

⁴Tson-o anyugun le Jerusalem nyu gunlo ntsin kehun gü lo apostelnyu dan lo kehun pelü dan le anyugun zenlo. Tsontsin anyugun le Sunggigü le anyugun zen hüo tha lihi thyükelo aphu pe zoshü.

⁵Ai tenyenkelo Farisinyu dan nyu peha le, “Juda kemvunyue no anyugun girü lo anyugun ko no Mosa jvü zenlo tse zo kethyüi le!” tson sola.

⁶Tsüselo apostelnyu lo kehun pelü dan le gungü kequenlo njüo tsürüla kenthon.

⁷Tson-o anyugun le kenthon salo ntsin, Pitor le anyugun ka, “Hire, apvünyu ju, hagun ko sha bin ti, Sunggigü le amün nyu Juda kemvunyue no jolokegwa gü shalo njüo tenyenlo nrün genyu hagun dan nyu nduka nyu akejülo laso.

⁸Lo me nyun-e sha kehügü Sunggigü le age thyükeshü hontse Kenshün Kapu khipe anyugun tson tsinshü laso.

⁹Tson-o A-le ketenyen sen-o anyugun nyun thyü nshün shüo tsüdan lo ngun tse thyü pe kekho mvu laso.

¹⁰Kha, tson yatselo hagun le ngun-e lo ngun pvünyu dan ko tse pvülo ho kela gü gunda kekhen pe senthyükelonyu gunda ka shüo nyuthyüo Sunggigü kenyükemvu thyü ti ola?

¹¹Tsonkethyü gü mvule ngun-e tsüdan hontse Npugü Jisu le shwikenjün genyu kenikelo hyulo titse kethyü tenyen bin nyo.”

¹²Tsontsin temi tsüdan le nyü tseo, Sunggigü le Paul lo Barnaba au zen hüo Juda kemvunyu dan nyu tha zansü lo ndun tho thyükeshü au le sogü tsü rüla zokeshü khwen nyü bin.

¹³Lo au le zothüshü ntsin James le niso gü,

¹⁴“Hire, apvünyu ju, hagun ko akhwen nyülo! Sunggigü le a-npvü Juda kemvunyu dan nyu temi dan me kope A-zan shwenshü ti tseo anyugun ka gunri kethyü rüla Simon le zoshü so.

¹⁵Lo sidyükeshanyu dan le kezoe tsü zen-o kerhün, lo tsü rüla le,

¹⁶‘Hidan sika ale niryüo David then nrho kela gü thyüni ti. Lo ale a-ketun kenren thyünilo njüo, tunso nipe shü loti.

¹⁷Kechamvule temi kecha le bin sin kethyü dan genyu, lo Juda kemvunyu azan kolo kelanyu aphu no Npugü fülo nrün genyu.

¹⁸Kazü thyülo nyekanyu tha tsüdan thyü pe me tesha keshü, Npugü le tsühontse zohü nyo,’ tsonkethyü thu njü.

¹⁹“Tsügenyu akerüchün le, ngun le temi Juda kemvunyu dan nyu rani sen-o Sunggigü ki ryü kelanyu dan kevü nyalo tsekethyü.

²⁰Lo tsonkethyü gü mvule ngun temi tsüdan no teromen kezü genyu nshünmvu kela nyu, lo keyüla kethyü nyu, lo nyukhu kecheshvu ketyü nyu, lo tezi ketyü nyu anyugun kekhenilo lotse kethyü thu pe anyugun ka keshü le gwa ti ado tse rüchün bin nyo.

²¹Tsügü tsü le nduka nyu rünyi aphu nyu Sabbath tsenyü sinagog ka nyu Mosa jvü gü tsü swüo zope me senthyü tin kela si genyu,” tsonshü.

²²Tsontsin apostelnyu dan lo kehun ketsen kehü nyu dan lo kehun kebin nyu aphu sin tseo jo tsüle anyugun kenyü kü lola njüo anyugun dan nyu temi kejü pe Paul lo Barnaba au sinshü njüo nipe Antiok nyu shü titse zoshü; lo anyugun le ketenyen dan nyu Barsaba letse lo Juda letse kehügü lo Sila au kejülo.

²³Tson-o anyugun le lesü thu pe tsühvu ben nyu shü; lo lesü tsünyu: “Apostel nyu, lo kehun ketsen kehünyu, lo npvünyu dan le, hagun Juda kemvunyu Antiok, lo Siria, lo Kilikia rünyi dan ka kebin nyu dan npvünyu ju kelushü.

²⁴Agun dan nyu agun ketsomvu tseo temi peha le hagun ka gunryüo jo peha pe hagun nyun thyü nshvushüo hagun no hagun nyun keyhunkerun bin laso; tsekethyü shalo.

²⁵Tsügenyu agun le kejorhün-o temi hihvu nipe ngun pvünyu hvu:

²⁶Barnaba lo Paul, Npugü Jisu Khrista zan genyu au phou-e tepen hü kemvu hvu no zen-o hagun ki gunlo tsekethyü le agun kendo kü.

²⁷Tson-o agun le Juda lo Sila au nishü le nye. Lo au le au mün-e pe agun joe zosin pe hagun hishü tile.

²⁸Tsügenyu Kenshün Kapu güe lo agun ko tse hagun no tha lope thamen kezü rüshvu kela lo tezi ketyü nyu, lo nyukhu kecheshvu ketyü nyu, lo keyüla kethyü nyu tsü, hagun kekhelo mvulo shvu tsekethyü nyeki hagun no tha thyü kerü kecha thyülo tse kethyü tsüle agun kendo mvu.

²⁹Hagun le jo tsüdan tsü zen binlo yatselo gwati. Hagun kegwagü thyü binlo,” tsonshü.

³⁰Tson-o anyugun le kekho-o Antiok nyu nshye; tson-o kehun gü ko kequenlo njüo lesü gü khipe anyugun tsüshü.

³¹Lo anyugun le lesü tsügü swüo anyugun nyun thyü kepeche keshü jo gü genyu anyugun sherhün sala.

³²Lo Juda lo Sila au ko au npvü sidyükeshanyu thyüo jo kechon zope npvünyu ju senthyü shü.

³³Tson-o au le jon keshanyu tsünyu bin-o npvünyu ju zen kengü gwa hü tseo anyugun kekhoni la njüo au nikeshü dan ki nigunla.

³⁴Ai Sila we tsünyu bin tinla.

³⁵Lo Paul lo Barnaba au ko Antiok nyu bin tinla, lo tsünyu me kechanyu kechon zen sin-o Npugü jo zope mehi lo me senthyü bin tinla.

³⁶Lo Jon keshanyu sika Paul le Barnaba ka, “Je, nnyi kengüo nduka jolokegwa zope me senthyü kenjü rünyi dan ki nigungü npvünyu ju le dihontse bin yo le nrishü tile je.”

³⁷Tsontsin Baranaba le Johan Mark, tsekethyü pe au sin-o gun nyü so.

³⁸Ai Paul we Johan Pamfulia nyu au khelao rani kelagü no au zenni kethyü tsüle gwa ado tse mvula.

³⁹Tson-o au tsügü genyu kenyi sa lao au kekhola; lo Barnaba le Mark zen-o run nyu Kupra ki gunla.

⁴⁰Ai Paul we Sila kejülo njüo au pvünyu ju no au khipe Npugü le shwikenjün nyu shüo gunla.

⁴¹Tson-o a-le Siria lo Kilikia pvüthü sen tse gungü kehun dan senthyü kegwa thyüshü.