Read Southern Rengma Naga APOSTELNYU THO 16 Bible Online

APOSTELNYU THO 16 - Southern Rengma Naga bible

APOSTELNYU THO 16

¹Tsüselo a-le Derbe lo Lustra hvu nyu gun ntsin; hire, senthyükelonyu a-zan le Timothi tse kethyü nme le tsünyu bin; a-le Judanyu tenunyu tenyenlo kelanyu nme nyu; ai a-pvü we Grik nyu.

²Timothi tsügü tsü le Lustra lo Ikonia nyu kebin npvünyu ju le a-zo ngwasa kehünyu nme.

³Lo Paul le a-zen hü nyülo; lo tsükipon keyhun Judanyu dan genyu a-le Timothi girü. Kechamvule anyugun aphu a-pvü le Griknyu tsekethyü sha kü kebin genyu.

⁴Lo au le rünyi nyu gunkeryü ka Jerusalem nyu kebin apostel nyu lo kehun pelü dan le anyugun no zen hülo tse keshü dan jo tsü pe anyugun ka zoshü.

⁵Tson-o kehun dan le anyugun ketenyen nkolo njüo khenyütsen mele anyugun sin gwen gwen tselo la.

⁶Tsüsika Kenshün Kapu le au no Asia nyu jo gü sen-o zomvu kela genyu, au le Frugia lo Galatia kazü pvüthü gunzhü.

⁷Tson-o Musia mhundyü ki gun kezhü ka au le Bithumia nyu gun nyü bin.

⁸Ai Jisu Kapu gü le au no gun mvula; tson-o au le Musia nrhi sen tse Troa nyunshye la.

⁹Lo tsükatsü khejenyu Paul le tsemin ki tha nme hyu; lo tsügü tsü le Makedonia nyu nme le a-hi tenge tseo, “Makedonia nyu gunryüo agun keche shü lo!” tsonshü.

¹⁰Tsügenyu Paul le tsü hyushü ntsin, Sunggigü le ano Makedonia nyu ka jolokegwa gü pe me senthyüshülo tseo ako bin nyo, tsekethyü rüchünlo njüo a-le tsü nyu kegun rhilo.

¹¹Tsügenyu a-le Troa nyu tsonchü nzhü sen tse Samothra nyu gunlo njüo tsüsinyü Neapoli nyu.

¹²Lo tsünyu tsü gungü Romnyu le rünyi thyükelo Makedonia nyu rünyi kegwagü Filipi tilo. Tson-o a-le jon keshanyu rünyi tsünyu tsü binlo.

¹³Lo tsükatsü Sabbath jon nyü a-le chwida ngwen ki chwigü, züri se nme ka kehi kethyü rüchün-o gungü tsünyu kebin ka tenunyu dan me tsünyu ryü kelo dan zen kenthon.

¹⁴Lo a-zan le Ludia tsekethyü Thiatira nyu phi kemeren jwen kehü, Sunggigü rüshvu kehünyu nme le a-khwen nyü bin. Npugü le tenunyu tsügi nyun thyükeyhun sashü njüo a-no Paul le jozo keshü dan tsü nyü kegwa thyü külo.

¹⁵Tson-o a-ko lo a-kaminyu aphu anyugun baptaiz thyülola ntsin a-le a-ko tenge tseo, “Hale ano Npugü ketenyen nyu letse yatselo aka nyu ryüo tsünyu binlo ta,” tson-o a-le a-hoshü mvu ketsin thyülo la.

¹⁶Tsüsika agun le kehikethyü bin nyu gunkezhü ka temvunyu kapu zen kehü lünyu nme le ryüo a zen ketenolo; a-le a-temvu genyu a-npunyu no chwisa lohü.

¹⁷Tenunyu tsügi le Paul lo agun sithen nra sen-o, “Temi hidan hile aphuso keda ketsingü Sunggigü gonyu dan le, hidan hile kenikelo tsongü zope hagun hi kehünyu dan le!” tson zoshü. Tson-o a-le jon kethon ki-e tsühontse hü tinla.

¹⁸Ai Paul le a-le a-kevü sarilo kela genyu rani gü tsügi kapugü ka, “Ale Jisu Khrista zan sen-o nno a-ge chwiryüla lotse zoshü le,” tsonshü ntsin a-le tsü gwünkho ka tinchwila.

¹⁹Ai a-npunyu le a-ge a-kechwi ndikela shalo njüo anyugun le Paul lo Sila au tenlo njüo au nrhisü zen-o hakethyü bin nyu kedanyu dan mhundyü ka gunla.

²⁰Lo anyugun le au zen-o Jokera kehünyu mhundyü nyu gunlo ntsin anyugun le,

²¹“Temi hihvu hile Judanyu le, lo au le ngun Romnyu no tejvü kemvu thyü lo zenlo tseo tsü pe me senthyüo rünyi gwün kevü sarilo laso.”

²²Tsontsin temi dan le aphu kengüo au ge anyugun kenyümvu lola. Lo Jokera kehünyu dan le au ge au phinya yhola njüo thün pe au vülo tse hukum khishüla.

²³Tson-o anyugun le au vü salao au zen gü doka nyu khinlao doka kekhwenyu no au khwen petsü sa binlo tse zoshü la.

²⁴Lo a-le ahza tsühontse kethyü hyulo njüo au zen gü doka kaqünki khinla, tson-o sen pha kekhin pe au pha khenla.

²⁵Ai khejenyu tsangluka Paul lo Sila au le kehi thyü lo lüthyü tseo Sunggigü shwenshü, lo tsükatsü donyu dan le au khwen nyü bin.

²⁶Lo tsükatsü kazü nni pe ketetsin thyü gunryüla, tson-o doka tsü sükenun pe ketetsin thyüla. Tsontsin doka kakhin aphu kenihela; lo tsünyu kebin nyu aphu anyugun kephin le shwe küla.

²⁷Tsontsin doka kekhwen kedagü le chonsoryüo doka kakhin kenihe kenjü hyulo njüo, do dan tsüle tinla so tsekethyü rüchün-o a-npvü a-zhethon süthope a-dushvula titse sola.

²⁸Ai Paul le nra a-yhenthyüo, “Nle n npvü ndushvula nya chi, agun aphu hinyu bin kü bin zun le,” tsonshü.

²⁹Tsontsin doka kekhwen gü le nton gungü mah khilo njüo nshvu pe dündün tse Paul lo Sila au mhundyü nyu nkhüntsü gü zhülo la.

³⁰Tson-o a-le au zen chwiryüo, “Keda hvu, kenilo nrün genyu ano nyuthyülo mvulo shvula?” tson.

³¹Tsontsin au le, “Npugü Jisu tenyenlo, tsonlo yatselo nko, lo nkaminyue sin-o kenilo ti.” Tson-o au le Npugü jo lope a-ka, lo a-ka nyu kebin nyu aphu ka zoshü.

³²Lo tsüsika tsüje tegikevüja tsügü ka a-le au zen gü au kevüshvu tsü sü küla.

³³Tson-o anyugun nyu kerhün thyü a-nyu kaminyu aphu Jisu zan nyu baptaiz thyü kü lola.

³⁴Tsontsin a-le au zen gungü ketyüketsü pe au tsüo a-nyu kaminyu aphu zen-o Sunggigü tenyenlo njüo anyugun shekerhün thyü tinla.

³⁵Lo tsangbenlo ntsin Jokera kehünyu dan le rikhunyu nishüo, “Temi tsühvu tsü no tinla lo!” tsekethyü zola lotse kethyü zoshü.

³⁶Tsontsin doka kekhwen kedagü le Paul ka, “Jokerashü kehü dan le hai no tinla lotse kethyü jo le gunryü bin nle; lo tsügenyu hai le chwio hai nyun bwen nyetse gunlo nye.”

³⁷Ai Paul le tsüdan ka, “Anyugun le ajokera mvuo, ale Romnyue, süda dan nyu avüo akhipe doka nyu shülao; ntsoka kebuo ahoshü nila titse hü nle? Tson loho le; anyugun no anyugun npvü gunryüo ahoshülo.”

³⁸Tsontsin rikhunyu dan le jo tsü sen gü jokerashü kehü dan ka zoshü; lo tsüdan le au le Romnyu tsekethyü shalo ntsin nshvu sa lola.

³⁹Tson-o anyugun le ryüo au ka anyugun shwikenjün hi sola. Tson-o anyugun le au zen-o kamhun ki chwio au no anyugun rünyi nken tinla lotse hi tenge tse sola.

⁴⁰Tsüselo au le doka nyu chwilo njüo Ludia ka nyu yüo au pvünyu ju hyulo ntsin anyugun nyun thyü kepeche sashüo tsünyu tinla.