Read Southern Rengma Naga APOSTELNYU THO 17 Bible Online

APOSTELNYU THO 17 - Southern Rengma Naga bible

APOSTELNYU THO 17

¹Tsüsika au le Amfipoli lo Apolonia pvüthü gungü Thesalonia nyu gunryülo, lo tsünyu tsü Judanyu sinagog ka nme le bin.

²Lo Paul le a-jvü thyü kehü hontse a-le Sabbath gwünshen ge ketsin lesü nyu anyugun senthyü.

³A-le Khrista gü le kenjünthyü salo njüo kesinyu dan nyu rhünni solo mvulo keshvu zo tsentsü pe anyugun hishü. Tsüntimvule a-le, “Jisu, ale a-rüla zo pe senthyü kebin gü hile Khrista güle,” tson zo sinshü.

⁴Tsonshü ntsin anyugun dan nyu peha lo Griknyu kenshün nyu kechon, lo tenunyu sharhinyu kechon le Paul lo Sila au kipon la.

⁵Ai Judanyu dan me we anyugun yhüthyüo temi dan nyu serikemvu ketsin nyu zen ryüo temi kechon ko kequenlo njüo rünyi gwünkevü shü; tson-o anyugun le gü Jason ka rün-o au ten zen-o me sokedanyu mhundyü nyu gun ti tsekethyü rhi sola.

⁶Tson-o anyugun le gungü Jason ka nyu au hyulo mvula ntsin, anyugun le Jason lo ketenyen nyu peha nrhisü zen-o rünyi nyu keda thyü kehünyu mhundyü nyu gungü nra sen-o, “Temi kazü thyü kekhen kehü hvule hinyu gunryüo, Jason le au nsinlo.

⁷Lo anyugun hidan hi aphu a-zan le Jisu letse kethyü keda kecha nme le hü letse kethyü zo-o Kaisar le johokeshü zen hümvu,” tson zoshü.

⁸Jo tsüdan tsü shalo njüo temi dan-e lo rünyi nyu kedanyu dan-e tse anyugun nyun keyhunkerun sola.

⁹Ai Jason-e lo kechanyue tse anyugun sunka tha pe shülao jamin nyu anyugun hoshüla.

¹⁰Tsüsika ketenyen nyu dan le cho-o Paul lo Sila au nipe Berea nyu shüla; tson-o au le tsünyu gun kelo ka Judanyu sinagog ka nyu yü.

¹¹Temi tsüdan le Thesalonia nyu kebin nyu nyeki anyugun nyun njü kvu; kechamvule khenyütsen ketsinlesü jo tsüle a-zü le mvuyo tsekethyü rüchün-o anyugun nyun ketsin thyüo jo tsüdan zen kelo genyu.

¹²Tsügenyu anyugun dan nyu temi kechon, Griknyu tenunyu sharhi ju lo pechenyue sin-o temi kechon le tenyenlo.

¹³Ai Thesalonia nyu Judanyu dan le Paul le Berea nyu jolokegwa zope me hi keshü shalo njüo anyugun le tsünyu ko ryüo kerika hontse temi dan thyü kekhen shü lo anyugun nyun thyü nshvu shü.

¹⁴Tsonshü ntsin ketenyen nyu dan le kenyun khi-o Paul nipe a-no züda se kipon gunla lotse zoshü la; ai Sila lo Timothi au we tsünyu bin tinla.

¹⁵Ai Paul shwenshwi zen kegun nyu dan le a-zen gü Athen tishü, tsüsika Sila lo Timothi au no nshwe gunryülo tsekethyü Paul ka jo hyulo njüo anyugun le rani gunla.

¹⁶Tsüsika Paul le Athen nyu au khwen kebin ka rünyi tsünyu teromen thyü pe sü kenjü Paul le tsü hyulo njüo a-nyun kenjün thyü lola.

¹⁷Tson-o a-le khenyütsen sinagog ka nyu lo gungü tsünyu rüshvu kebin dan-e lo hakethyü bin nyu temi teno kelonyu zen kenthon sola.

¹⁸Lo thakesha Epikuri lo Stoik tsekethyü temi danhvu dan nyu peha le a-zen kenyi sola. Peha le a-ka, “Jokhin gü hile nyu zonyü bin nla?” Lo kechanyu we a-le me senkethyü genyu a-ka, “A-le shakemvu tero dan me zope me senkethyünyu nme hile la,” tsonshü. Anyugun le hi zoshü kechamvule Paul lo Jisu lo rhünni keso rüla pe senthyü kethyü genyu.

¹⁹Tson-o anyugun le a-nrhisü zen-o Areaopaga tsekethyü bin nme ka gü, “Nle jokeshün zope senthyü kehü hile nyu yo tsekethyü zope agun hishü timon?

²⁰Nle jokeshün dan me sen ryüo agun no shalo; tsügenyu jo hile jo nyu tse kethyü yo agun le shalo nyü bin nyo.”

²¹(Athen nyu aphu lo tesin le ryüo tsünyu yhun tinkela nyue sin tseo, thame thyümvu tse tha keshün nme kezo khwen tsünyü bin-o a-gwünkho nkela latse kehü ale akon zoshü tile.)

²²Tsükatsü Paul le Areaopaga chvü nyu solo njüo, “Hire, Athen nyu dan, ale tha kehyu aphu ge shakelo le hagun le tsenyü tsenyü thyü petsü sa kehü dan me le.

²³Ale ntsü kegun ka hagun le tha rüshvu kehü dan nri kegun ka, kershvubin nme ge, ‘Shakemvu Tero Nme genyu,’ tsonkethyü zan nme-e thu sin pe bin njüo hyulo. Kha, hagun le shamvuo rüshvu kehü gü tsü ale tsin pe hagun hishü tile.

²⁴Kazü lo tsünyu kehü aphu thyükeshü Sunggigü, a-le tsang lo kazü hvu so Npugü genyu temi ben lope kethyü kershvuka nyu bin hü mvu.

²⁵Lo a-le tha nme rhodyü kebin hontse meno me ben pe a-leyi-e hümvu; kechamvule a-le a-npvü kerhünron lo kehen aphu khipe temi lihigüe tsüshü kehü genyu.

²⁶A-le nchwe nyu ngun no yhun nrün gwünkho lo bin nrün bin aphu rhishü njüo kazü aphu nyu binlo lotseo temi nme ge temi keyhun aphu thyüshü.

²⁷Lo ngun no Sunggigü füo kese gun yatselo a-hyulo ti, tsekethyü rüchün, ai a-le ngun lihigüe zen-o nithen hümvu,

²⁸kechamvule nle a-genyu rhün lo nnun lo yhun kehü genyu, lü kethunyu peha le, ‘Nle a-ge yhun soryü,’ tsonkethyü zo njü hü. Lo hagun dan nyu lüthu kehünyu peha le, ‘Ngun ko A-nyenyu dan,’ tsonkethyü thu njü.

²⁹Lo nle tsügenyu Sunggigü ge yhun soryü yatselo, nle Sunggigü lope temi thakesha temi do pe thyükelo suna nmvue raka nmvue tsomen kezü dan hontse letse kethyü rüchün hü zümvu.

³⁰Sunggigü le temi thasha kemvu gwünkho ka we hyu-e hyukemvu hontseo khela so; ai ntsoka we a-le temi aphu no lihiki hüe a-nyunkelulo lotse zoshü laso.

³¹Tson-o a-le nchwenyu kejü sen hü kela nme no a-kezü nyu kazü gü zen-o jokera titse kethyü khenyü me jon kejü to sen bin laso. Tsügenyu a-le kesinyu dan nyu a-thyü nrhün pe temi aphu hi tsentsü shü laso,” tsonshü.

³²Lo anyugun le kesinyu le rhünni keso rüla shashü ntsin peha le a-shwinyü sola; ai peha we, “Agun le jo hidan rüla khenyü me nka nyü nishü ti,” tson.

³³Tson-o Paul le anyugun dan nyu tinla.

³⁴Ai temi peha le a-zen hüo tenyenlo. Lo tsüdan nyu Areaopega Dionisius, lo Damari tsekethyü tenunyu nme, lo kechanyu dan me-e anyugun zen sin hü.