Read Southern Rengma Naga APOSTELNYU THO 18 Bible Online

APOSTELNYU THO 18 - Southern Rengma Naga bible

APOSTELNYU THO 18

¹Tsüsika Paul le Athen nyu Korint ki gunryü.

²Lo tsükatsü a-le Judanyu a-zan le Aquila tsekethyü Pontu nyu yhun sokeryü nyu nme le tsü nyu bin-o hyulo. Klaudia le Judanyu aphu no Rom nyu tinla lo tsekethyü genyu temi tsügütsü le a-nu Priskila zen-o tsü mhundyü kheka Itali nyu gunryü bin; lo a-le au ka nyu gü.

³Lo au le phika kethyü nyu, lo Paul ko tsühontse kethyü nyu genyu a-le au zen bin-o anyugun kengüo tha thyü.

⁴Lo tsükatsü a-le Sabbath tsenyü sinagog ka nyu anyugun nthon-o Judanyu lo Griknyu thukeyhun sashü.

⁵Tsüselo Sila lo Timothi au le Makedonia nyu nshyekeryü ka, tsükatsü Paul le Jisu le Khrista gü tsekethyü pe Judanyu mhundyü ka zoshwi shü

⁶Ai anyugun le tsü shwinyü mvuo nkhin sola ntsin, a-le a-phi kesun-o anyugun ka, “Hagun zi no hagun npvü hagun pe ge gunryülo, awe le nshün le; lo nthu gerho nyu ale Juda kemvunyu ki gunla tiso.”

⁷Tson-o a-le tsünyu chwilo njüo Tita Justa tsekethyü Sunggigü rüshvu kehünyu nme ka nyu yüla; lo tsügü ka tsüle sinagog ka khoka bin hü.

⁸Lo sinagog ka tsügü ketsen kehü gü Krispa le a-nyu kaminyu aphu zen-o Npugü tenyenlo la; lo tsüntimvu Korintnyu kechon ki-e jo tsügü shao tenyenlo njüo baptaiz thyülo.

⁹Tsükatsü khejeme Npugü le a-npvü gunryüo Paul teshao,

¹⁰“Nle nshvu nya nye; lo jozo binlo, lo nma tse bin tinla nya. Kechamvule ale nzen hünyo, lo temi nme-e nbonshvula loho.

¹¹Lo tsüntimvule rünyi hinyu atemi thyünrün le kechon le kebin genyu.” Lo a-le tsünyu chenme-o shye tsero Sunggigü jo sen-o me senthyüo anyugun zenbin hü.

¹²Ai tsükatsü Galio le Akaya kazü nyu ahng thyülo ntsin Judanyu le kengüo nyun me thyülo njüo Paul shwirüchün-o a-tenzen-o jokera kehü bin mhundyü nyu gunlo-o,

¹³“Temi higü hile me thukeyhun pe meno njvü kemvu tedo keshün nme sen-o Sunggigü rüshvu tinlaso!”

¹⁴Tson-o Paul le jozo titse so ntsin Galio le Judanyu dan ka,

¹⁵“Jo kekenyon higü hile njükemvu nmvue serikemvu jo nme yatselo, hire, Judanyu dan, ale petsü sao hagun khwenyü shü kethyüi gwünkho; ai jo dan me genyu nmvue zan dan me genyu kenyi kethyü nme yatselo, hagun npvü hagun dan nyu keralo nye, ale jo tsühontse kethyü tsü kera kethyü le akendo mvu!”

¹⁶Tson-o a-le jokerabin nyu tsü anyugun hüla.

¹⁷Tsontsin anyugun aphu gungü sinagog kanyu keda thyü kehü gü Sosthene nrhisülo-o jokera kehü bin mhundyü nyu a-vü sala. Ai Galio le tsü nme-e rüchün pe a-nyun nkhi-e mvula.

¹⁸Tsükatsü Paul le kethonki tsünyu bin tse njüo a-pvünyu ju zen kekho la, tson-o tsünyu Aquila lo Priskila au zen-o run nyu küo Siria nyu gunla. Lo a-le a-jo nme genyu himhundyü a-npvü Kenkrea nyu a-pe thula.

¹⁹Tson-o anyugun le Efesa nyu gunryükelo ka a-le au khipe tsünyu shüla. Ai a-we sinagog ka nyu yügü Judanyu zenkenthon.

²⁰Lo anyugun le a-no anyugun zen bin sinshülo tse zo ntsin, a-le nmvula.

²¹Tson-o a-le anyugun zen kekho lati sele tseo, “Sunggigü kendo yatselo, ale hagun ka nigunryü ti,” tson-o Efesa nyu run ge külo-o tinla.

²²Tson-o a-le Kaisaria nyu chwilo ntsin a-le chwigü kehun nyu kelushü njüo Antiok nyu nshyela.

²³Lo jon keshanyu tsünyubin tseo a-le Galatia kazü lo Frugia pvüthü sen-o senthyükelonyu aphu nyun thyü kepeche gunla.

²⁴Tsükatsü Alekandria nyu yhun sokeryü nyu a-zan le Apola letse kethyü jozo kesha lo ketsinlesü swü sa kethyü Judanyu nme le Efesa nyu gunryü.

²⁵Temi tsügü le himhundyü ki Npugü le me senkethyü jo shalo, lo a-le Johan baptism nti shao a-nyun ketsin thyü lo a-yhen thyüo jozo lo Jisu rüla zope me hi; lo sinagog ka nyue peche sao me senthyü.

²⁶Ai Priskila lo Aquila au le a-jo shashüo a-zen-o au ki ryülo, tson-o au le Sunggigü rüla zo tsentsü sin pe a-hishü.

²⁷Tsüsika a-le Akaya kazü nyu gun nyülo ntsin, a-pvünyu ju le a-nyun thyü peche nishüo senthyükelonyu dan no a-zenlo lotse kethyü lesü thu pe a-tsü sinshü. Lo a-le tsünyu ryülo ntsin a-le Sunggigü shwikenjün genyu tenyen kelonyu ge thakegwa kechon ki thyüshü.

²⁸Kechamvule a-le süda mhundyü nyu a-jo kvu sao Jisu le Khrista gü le tsekethyü ketsinlesü nyu pe Judanyu dan jo gwün kemhenla.