Read Southern Rengma Naga APOSTELNYU THO 19 Bible Online

APOSTELNYU THO 19 - Southern Rengma Naga bible

APOSTELNYU THO 19

¹Lo Apola le Korint nyu kebin ka Paul le rünyi tesozin kipon Efesa nyu gunryüo senthyükelonyu dan me hyulo, tson-o a-le anyugun ka,

²“Hagun le Khrista tenyen kelo ka Kenshün Kapu hyulo ole?” tson ketsoshü. Tsontsin anyugun le a-ka, “Nmvu, Kenshün Kapu le hü tsekethyü agun le sha-e mvu le.”

³Tsügenyu a-le, “Tson yatselo hagun le nyu baptism zen-o baptaiz thyülo la?”

⁴Tsontsin anyu le a-ka, “Johan baptism le.” Tsontsin Paul le, “Johan we temi dan no a-siki ryü kezhü gü Jisu tenyenlo lotse kethyü zo-o nyunkelukelo baptism sen-o me baptaiz thyü kehü gwünzin.”

⁵Lo anyugun le jo tsü shalo ntsin Npugü Jisu zan nyu baptaiz thyülo.

⁶Tson-o Paul le a-ben shwen pe anyugun ge shü ntsin, Kenshün Kapu le anyugun ge gunryülo. Tsüselo anyugun le meno shalo keho jozo lo sidyükesha joe zolo la.

⁷Lo temi tsüdan le temi tseryü kenyhun che kho.

⁸Tsükatsü a-le sinagog kanyu yüo shye shen kho peche sao Sunggigü keda rüla tsü zope me nthon, lo me thukeyhun sa.

⁹Ai peha we a-nyun rüo tenyen mvuo temi dan mhundyü nyu kenikelo tsongü shwi nyü mvu so ntsin, a-le anyugun nrhila; tson-o senthyükelonyu keni kecha thyülo-o khenyütsen Turani lesüka gü nyu tsü me zen kenthon sola.

¹⁰Lo chenhvu tsü tson thyü zin gunlo; tsügenyu Asia nyu kebinnyu aphu Judanyue lo Griknyue tse Npugü jo shalo.

¹¹Lo tsükatsü Sunggigü le Paul no nduntho mele thyülo hü kemvu dan me thyü.

¹²Tson-o mele a-kesü kela a-ben keshon phi nmvue phi kecha-e sen gungü kehonyu ge shülo a-keho le ndila, tsüntimvule gwakemvu kapu dan-e me ge chwila.

¹³Ai njwen kehü Judanyu temvu kehü dan me le Npugü Jisu zan sen-o gwakemvu kapu le a-ge kebin nyu danka, “Ale Paul le zope me senthyü kehü gü Jisu zan sen-o hagun ka zoshü le nye,” tson sola.

¹⁴Tsükatsü peshükeda thyü kehü dan so kedagü Judanyu, Skiva tsekethyü nme le a-nyenyu pechenyu mitsenyü le tsühontse kethyü thyü hü.

¹⁵Ai gwakemvu kapugü le anyugun ka, “Ale Jisu sha lo Paul-e sha; ai nle segü ola?” tson sola.

¹⁶Tsontsin gwakemvu kapu le a-ge kehügü le when chwigü anyugun jon-o anyugun nyeki kvulo-o anyugun ka tsüle nrun lo jünpvü tse tinla.

¹⁷Lo tsü rüla le Efesa nyu bin kehü Judanyu lo Griknyu aphu sha gunla; tson-o anyugun aphu nshvu pe ketetsin thyüo Npugü Jisu zan zope gon sala.

¹⁸Lo ketenyen nyu dan nyu temi kechon ki-e gunryüo a-npvü a-tho tsü zoshwi lo zope me tesha tse sola.

¹⁹Tsüntimvule henkeshwi lesü shao a-henshwi kehünyu dan nyu temi kechonki-e anyugun henkeshwi lesü sen gunryüo kequenlo njüo temi aphu yhühyu ka khipe ro küla; lo lesü tsü dan min rüchün gungü shakelo le raka yie henpvün min kho.

²⁰Npugü jo gü le tsü tsü laki kvu sogü temi nyeki kvulo.

²¹Lo tha tsüdan thyü khekela siki Paul le Makedonia lo Akaya tse pvüthü sen-o Jerusalem nyu kegun rhio, “Ale tsünyu gun kelo siki we ale Rom nyue gun mvulo shvu.”

²²Tson-o meno a-lothyü kehü dan nyu Timothi lo Erasta au nipe Makedonia nyu shüla njüo a-le jon keshanyu Asia nyu bin tinla.

²³Lo tsükatsü kenikelo tsongü rüla kevü khe ntimvu lola.

²⁴Lo a-zan le Demetria tsekethyü raka gi chakehünyu nmele a-raka gi tsü sen-o Diana kerüshvu ka nyu thamen keshashanyu thyüo a-zen-o chakehü nyu no chwisa loho.

²⁵A-le a-pvünyu tsüdan lo tha tsühontse kethyü tho thyü kehünyu dan kecha-e ko kequenlo njüo, “Hire, temi dan hagun ko shabin ti, ngun le thatho higü genyu nnya hünyo.

²⁶Lo hagun ko sha lo hyu bin ti, Efesa nyu nti mvule Asia kechaki-e Paul tsekethyü temi higü le me rhio temi kechon thyü nshvu sen-o temi ben no kethyü hidan hile teronyu kemvu letse kethyü zo tin laso.

²⁷Lo meno ntho higü hi rühvu mvu kela ntimvule, Asia aphu nyu lo kazü aphu nyu rüshvu kehü Diana tero kedagi zan tsü nkela njüo a-kershvuka-e no tha lihi mvu kela nshvulo laso.”

²⁸Tsontsin anyugun le jo tsü sha pe anyugun kenyü mvu salo njüo, “Efesa nyu terogi Diana tsüle keda tsinle,” tson sola.

²⁹Tson-o rünyi tsünyu tsü le temi le ntun nbün sola; tson-o anyugun kengüo jo me thyü gungü Paul zen-o njwen kehü Makedonia nyu Gaya lo Aristarka au sü zen-o kekecho bin ki gunla.

³⁰Lo tsükatsü Paul le temi dan nyu tsü gü nyü so ntsin, senthyükelonyu dan le a-hoshü mvula.

³¹Lo Asia nyu kedanyu peha ko azen-o kepvüshen hüo me nipe a-ki shüo a-no kekecho bin nyu gun nya lotse sola.

³²Temi tsüdan le nra sen sen-o peha le jo nme lo kechanyu le jo kecha nme tse zo-o sen sola; lo temi dan nyu temi kechon ki-e anyugun le nyu genyu gungü tsünyu kequen bin yo tsekethyüe shamvu lola.

³³Lo Judanyu dan le Alekander kejü pe temi dan mhundyü nyu shüshü. Tsontsin Alekander le temi dan mhundyü nyu a-ben shwen pen-o, Judanyu jün zoti tse so.

³⁴Ai anyugun le a-le Judanyu tsekethyü shalo njüo, anyugun aphu khwen me thyülo-o tegi kevüja kenyhun kho nra sen-o, “Efesanyu tero Diana Tsüle keda tsin le!” tson sola.

³⁵Tsükatsü rünyi tsünyu rüla thu kehü gü le temi dan ka, “Hire, Efesa temi dan, tero kedagi Diana kershvuka gü lo tero Jupiter ka nyu chetsü keryü men kezü gü Efesanyu rünyi le khwen kehü segü le shamvu bin nla?

³⁶Lo tsüdan tsü le ketsin le tse kethyü hagun le sha kethyü we hagun le ntsema tse kebin kho. Lo hagun le hagun nyun keyhunkerun-o tha thyüzü kemvu thyü mvue gwa le la.

³⁷Lo hagun le temi mihvu zen gunkeryü, au le kershvuka nyu tha seketyünyu nmvue ngun tero gü kenkhin nyu kemvu.

³⁸Lo Demetria lo a-zen-o thathyü kehünyu temi peha ge jo kekenyo peha le bin yatselo, jokera kehü ka dan-e khinshye binnyo, lo jopen shü kehü nyu ko bin tse kethyü genyu anyugun no gun gü tsüdan ka kenyonlo.

³⁹Lo tsonmvuo hagun le thakecha peha kenyon nyü yatselo tejvü ka zen-o süda kehun gü no kerala chi.

⁴⁰Tsonmvuo nthu a-kon kendi ka kenyon kebin hi genyu we süda le ngun nmu sokeryüe nshvu; lo temi hidan hile ryüo kequen kelo rüla me le ngun ketso soryüe ngun le thame zolo nrün ndi lati.”

⁴¹Lo a-le jo tsühontse kethyü zoshüo temi dan no tinla.