Read Southern Rengma Naga APOSTELNYU THO 2 Bible Online

APOSTELNYU THO 2 - Southern Rengma Naga bible

APOSTELNYU THO 2

¹Lo pentekos jon le gunkeryü nyü anyugun aphu gungü bin nme ka kehun bin ntsin.

²Tsangge tsangkenbu terhi kethyü khwen hontse kethyü khwen nmele whütse gunryüo anyugun le kebin ka nyu tsü süpvülo la.

³Tsontsin mah le temi yi hontse kethyü dan me le tsükeryü hyulo; lo tsüle ko kezen gungü anyugun nme me pe ge kü külo la.

⁴Tsüselo anyugun aphu Kenshün Kapu no anyugun süpvüo Kapugü le anyugun no zolo tsekethyü hontse, anyugun le me rünyi khwen kechacha kethyü zo sola.

⁵Tsügwünkho katsü tsang hensin keyhun temi aphu dan nyu Judanyu ntsen seri kehünyu aphu gunryüo Jerusalem nyu kequen bin.

⁶Temi tsüdan aphu thakhwen tsü shalo ntsin dan me thyü gunryüo kequenlo la; lo temi tsüdan le ketenyen nyu jule anyugun khwen ki jozo külo kela genyu anyugun dunthyü la.

⁷Tson-o anyugun aphu anyugun dunthyüo, “Hire, jozo kebin hidan hi aphu Galilnyu nti mvu ole!

⁸Tsonlo ngun le nyu tsethyü anyugun mün nyu nrünyi khwen kezo sha pe hihontselo la?

⁹Anyugun peha le Perthianyu, lo peha le Medianyu, lo Kapodokianyu, Pontu lo peha le Elimitnyu, peha le Mesopotamianyu lo Judia lo Asianyu.

¹⁰Frugia lo Pamfulianyu, Ijiptnyu, lo Kurin rünyi teki kebin Libianyu, lo peha le Judanyu lo Judakemvunyu le gunryüo Judanyu jvü zen tinkela Rom nyu gunryü kebin tesin dan,

¹¹lo peha le Kretanyu lo Arabnyu, anyugun lihigüe temi hidan le a-rünyi khwen ki Sunggigü le ndun kethyü tho thyükeshü rüla nyü külo bin!”

¹²Tson-o anyugun aphu anyugun dunthyüo khinyu khinyu ka, “Hile nyu tsethyüo hihontselo la?”

¹³Ai kechanyu peha le anyugun shwünyüo, “Anyugun le vain zü keshün tsüpvüo nzeü nle, tse zo sola!”

¹⁴Ai Pitor le tseryü nmeche dan zen-o jozo sen-o temi dan ka, “Hire, Judia temi dan lo Jerusalem nyu kebin nyu aphu, hagun le akhwen hi nyülo njüo jo hidan shalo nye.

¹⁵Temi hidan hile hagun kerüchün hontseo nzeü bin mvule; tsangben chwikeryü le ntsoka tegi kevü kenshen nti bin zun kethyü genyu.

¹⁶Ai hi rüla nduka Joel sidyükeshagü no zo njü:

¹⁷‘Sunggigü le zoshü le, jon kekhin ki ale Akapu run pe temi aphu ge shüti. Lo hagun nyenyu peche-e tenu-e sidyükesha jo zoti; lo hagun dan nyu ponyu dan le tsemin ki tha hyuti, lo hagun dan nyu kethen nyu dan le a-min shati.

¹⁸Tson ketsin thyüti, tsükatsü ale akapu run pe agonyu peche tenu aphu ge shüti, tsontsin anyugun le sidyükesha jo zoti.

¹⁹Lo ale tsangge ndun kethyü dan me, lo tsang hensin kazü soge thazansü dan me thyüshü ti. Tezi lo mah lo mah kekhu no nmhu thyükelo;

²⁰Npugü keben jon keda gingvü kethyü gü le gunkeryü mhundyü yhüka le zünla ti, lo shye le tezi ngwa lati.

²¹Tson-o temi lihigüe Npugü zan sen-o hi kelo gü kenilo ti,’ tson.

²²“Hire, Israelnyu dan, hagun jo hidan hi nyülo nye! Hagun ko shabin ti, Nazaret Jisu le hagun dan nyu Sunggigü le a-zen-o temi le thyülo keho ndun kethyü tho dan lo thazansü aphu thyü kelo dan genyu a-npvü tsü tsin tsentsü pe hagun hishü so.

²³Sunggigü le nchwenyu tson-o rhi to sen kehügü hontse, a-tenlo njüo hagun npvü tejvü sen kemvunyu no krus ge a-hü lao a-dushvu laso.

²⁴Ai Sunggigü le kesi kenjün kethyü nyu a-kenishü lao a-thyü nrhünlo laso; kechamvule tsügü tsü no a-khin sen binlo keho genyu.

²⁵Tsühontse David le a-rüla kezo le, ‘Ale a mhundyü ka Npugü hyu zin gunryü; ano nnu loho letse kethyü genyu, a-le anjüzin bin hünyo.

²⁶Tsügenyu anyun-e bwen, lo asherhün-o lüthyü gunryü le. Tsüntimvule tenrenla lo kegwa ahi-e adyü ben-o tin lati,

²⁷kechamvule nle akapu no Hades hensin bin loho; nle ntenyen kehü ngogü no sika nyu tenla loho.

²⁸Nle kerhün tson dan tsin pe ahishü laso, nle ano nyhühyu ka akenyüri tsin hü tinla tiso.’

²⁹“Hire, apvünyu dan, ale ngun bon David rüla hagun ka zo tsentsü pe tishüe shvu mvu ado. A-le sila njüo meno a-sun laso, lo a-sika le ntsoka-e ndan nyu bin nyo.

³⁰Lo a-le sidyükeshanyu-e thyü sin-o a-tsipwen nyu nme no a-keda bin ge bin titse kethyü Sunggigü le swe-o a-ka zo letse kethyü-e shalo.

³¹David le nchwenyu Sunggigü le siki nyuthyü shüti yo hyu, lo tson-o a-le Khrista le rhünni keso rüla hihontse zo, “A-khe pe Hades hensin shü loho; lo a-phou güe no sika nyu tenren loho.’

³²Sunggigü le Jisu tsügü tsü thyü nrhünlo laso, lo agun hidan hi aphu jo tsügü jün kezo nyu nti.

³³Tson-o a-le Sunggigü ben njüzin no a-thyü ngonlo njüo Pvügü kanyu Kenshün Kapu khishü titseo zo kenjü gü tsü hyu kelo siki a-le ntsoka sha lo hyu kebin dan hi khipe hagun tesha shü.

³⁴Lo David we tsangge kümvu; ai a-le a-npvü zo kethyü le, ‘Npugü le a Npugü ka: ale n shwikerüchün nyu no

³⁵npha bin thyüla kemvuthen, nle anjüzin bin tse nye,’ tsonshü.

³⁶“Ts'ügenyu hagunle krus ge a-hü kela Jisu tsügü tsü, Sunggigü le a-thyü pe a-no Npugü lo Khrista gü thyülo kela Israel nyu aphu no tsü sha tsentsü lonye!”

³⁷Tsügenyu anyugun le jo tsügü shalo ntsin rüchün pe anyugun nyun gwün sen tselo njüo Pitor lo apostel kechanyu dan ka, “Npvünyu dan, agun no nyuthyülo mvulo shvu la?” tson-o ketso sola.

³⁸Tsüselo Pitor le anyugun ka, “Hagun kemu jülo nrün genyu hagun nyun kelulo njüo Jisu Khrista zan nyu baptaiz thyülo nye; tsonlo yatselo hagun le Kenshün Kapu jochü hyulo ti.

³⁹Kechamvule zo kenjü jo gü tsüle hagun lo hagun nyenyu dan, tsüntimvule rünyi nithen ki kebin, Npugü Sunggigü le ko zen a-ki gunryü nrün nyu aphu genyu-e le.”

⁴⁰Lo tsüdan ntimvule a-le jo kecha-e kechon pe sin-o anyugun senthyüo, “Hagun ntso ntsenyü temi nzhü kemvunyu dan ge petsü salo nye.”

⁴¹Tsüselo a-jo le a-kenyü kelonyu aphu baptaiz thyü külo; lo tsünyü temi yieshen laki kho pe anyugun sinlo.

⁴²Tson-o anyugun apostelnyu dan le anyugun senkethyü jo nyu lo kepvüshen kethyü nyu, tensü boshwen kethyü ka lo kehi kethyü ka khela mvu shü tse binlo.

⁴³Lo tsügwünkho ka tsü temi aphu nshvu küla, lo apostelnyu dan no me mhundyü nyu ndun kethyü tho lo tha zansü kechon thyülo.

⁴⁴Lo tsükatsü ketenyen nyu dan le kengü dan me thyüo anyugun hon aphu kerhün pe nme thyülo.

⁴⁵Tson-o anyugun le anyugun ka, low, lo anyugun hon jwen sen gunryüo senyu no dikho kho hyulo zü yo tsü rüchün-o kenjün külo hü.

⁴⁶Lo Khenyütsen nyunme thyüo Kershvuka nyu lo kaho ki-e tensü boshwen tyü zin tinla.

⁴⁷Tson-o anyugun le Sunggigü shwen-o temi aphu mhundyü nyu teshwen pvü tseo anyugun shekerhün thyü tinla. Lo Npugü le khenyütsen kenikelonyu no anyugun sinlo lotse zin tinla.