Read Southern Rengma Naga APOSTELNYU THO 20 Bible Online

APOSTELNYU THO 20 - Southern Rengma Naga bible

APOSTELNYU THO 20

¹Lo Kekevü tsügü khe kela sika Paul le senthyükelonyu dan kope anyugun senthyüshüo Makedonia nyu gun titseo anyugun zen-o jochü pe ketsülo njüo kekho la.

²Lo tsüsika a-le rünyi tsünyu pvüthüo gun kezhü ka a-le anyugun thyü kepeche sashüo Grik kazü nyu nigun ryüla, lo tsünyu shyeshen binlo.

³Tsüsika a-le run nyu Siria nyu gun nyü so ntsin, Judanyu le a-ge tedo gwakemvu rhi kebin hyulo njüo, a-le rani sen Makedonia tson gun kela rüchün so.

⁴Tsükatsü Berea nyu Pura nyugü Sopetra, lo Thesalonia nyu Aristarka lo Sekunda; lo Derbe nyu Gaya, lo Timothi; lo Asia nyu Tukika lo Trofima tse nyugun le a-zen gun.

⁵Ai temi tsüdan tsü le agun mhundyü ri gungü Troa nyu agun khwen bin.

⁶Lo kebu no shükemvu tensü ketyü nga jon siki agun le Filipi nyu run ge külo-o jonpvün ki Troa nyu gunryülo, lo tsünyu jon tsenyü bin tinla.

⁷Tson-o Sabbath jon kerinyü agun le tensü boshwen tyüti tseo kequen kelo ka Paul le tsüsinyü tinla nyüo (tsüje) anyugun zen kenthon; lo a-le tsüje jozo pe tsanglvu tsangzü ki shü.

⁸Lo agun le kehun kebin katsen tesoki makemben-e kechon le bin.

⁹Tsükatsü Eutuka tsekethyü ponyu nme le kafüphe ntsen ka bin-o nnyü sa bin. Tson-o Paul le jozo thon khe bin ntsin a-le zhü sa tinlao ka heshen ki nto-o kazünyu chetsüla, tson-o a-penso shü ntsin si bin-o hyulo.

¹⁰Ai Paul le tesinki tsengü a-gwenlo njüo, “Hagun nyungwa mvunya, a-le rhün bin zunle.”

¹¹Tsüsika a-le tesoki rani kügü tensü boshwen tyüo jozo pe tsangkeben mün ki shü, tson-o tsünyu tinla.

¹²Lo anyugun le ponyu güle rhünni kelo genyu anyugun sherhün khe ntimvu la.

¹³Ai agun we Paul no Aso nyu run ge kükelo rüchün-o run ge tsünyu ri gunla. Tsüsika Paul le a-npvü tsonchüo tsünyu gunryü titse kethyü genyu.

¹⁴Tson-o agun le Aso nyu ryülo ntsin anyugun le a-zen-o run nyu binlo-o Mitulena nyu ryülo.

¹⁵Tson-o tsüsinyü ko tsünyu run ge külo-o gü Khio n tsento nyu gunlo, tson-o tsüsinyü agun le gü Samo tilo-o tsüsinyü Melita nyu ryülo.

¹⁶Lo Paul le Asia nyu a-gwünkho nkela mvu nrün genyu run ge Efesa nken gunla nyülo. Kechamvule a-le thyü logwa yatselo Pentikos jon ka tsü Jerusalem tila titseo cho kehü genyu.

¹⁷Tsüsika a-le Melita nyu me nipe Efesa nyu shüo kehun ketsen kehünyu dan koshü.

¹⁸Lo anyugun le a-ki gunryü ntsin, a-le anyugun ka,

¹⁹“Ale Asia nyu apha shweshü kerinyü nyu ryüo hagun zen kebin ka dihontse tsenyo sashü yo, lo ayhüphue che, lo Judanyu le a nden kebin ale kesemen kechon ki tenoe, Npugü lothyü hüo tikelo hagun ko sha bin ti.

²⁰Lo ale hagun no sha hü yatselo gwa nrün dan khipe hagun ka zo, nmvue süda dan nyue nmvue ka aphu nyue hagun senthyü mvu lamvu.

²¹Ale anyun kelulo-o Sunggigü kipon gunkelo, lo Npugü Jisu Khrista-e tenyen kelo rüla pe Judanyu lo Grik nyu dan nyu zoshwi shü.

²²Ai ntsoka we hire, ale a npvü akapu no akekheni sen-o Jerusalem nyu gun ti tse bin nyo.

²³Lo Kenshün Kapu le rünyi aphu nyu mele aten pe do kethyü lo ano kenjünthyülo nrün genyu akhwen kebin kezo nyeki, age nyu nyu le gunryü tiyo ale tsü shabin mvu.

²⁴Tson-e Sunggigü le ashwikenjün jolokegwa gü zoshwishü lotse Npugü Jisu ka lotho kethyü hyukelo gü lo ano thyülo tsekethyü atho aphu thyü penlo yatselo aphou hi we le a mhundyü ka tha lihi kemvu sele.

²⁵“Lo hire, ale hagun dan nyu Sunggigü keda rüla zope senthyü keshü dan hagun le tsü senlo. Lo ntsoka we ale sha tsentsü bin laso, hisiki temi nme-e amhun hyunilo hoso, tsekethyü.

²⁶Tsügenyu ale nthu hagun mhundyü nyu zoshwishü bin nle nye, lo temi lihigüe gwamvula yatse-e age kemvu sele nye.

²⁷Kechamvule Sunggigü tedo aphu pe hagun ka zo tepen-o akekhenilo la kemvu genyu.

²⁸Hagun le Npugü le a-npvü a-zi pe heikelo kehun gü leyilo tseo Kenshün Kapu le hagun no tsügü kekhwen dan thyü bin kela dan tsü aphu genyue hagun le petsü sa bin lo nye.

²⁹Ale tinkela siki teken a-jvü gwakemvu dan le hagun dan nyu yüryü ti, lo hagun dan gü hi tepen shü loho kethyü genyu.

³⁰Lo hagun dan nyue senthyükelonyu peha nsü pe a-sithen lo nrün genyu joketsin kemvu kezoe peha le soryü titse kethyü ale shabin laso.

³¹Tsügenyu ale chenshen jaka tsünyu sunhala mvutse khenyütsen keben kezün ayhüphu cheo hagun senthyü pe tilo kethyü, tsü rüchünlo-o petsü binlo nye.

³²“Lo ntsoka we ale hagun khipe hagun thyü nbwen nnye pe a-kenya khipe nshünlo kelanyu dan nyu hagun tsülo kegwa gü Sunggigü, lo a-le temi shwikenjün jogü tenyen shü güzhü laso.

³³Ale temi nme-e seki raka, nmvue suna, nmvue phinya-e tepen gunryü mvu.

³⁴Lo tsüle hagun le hagun npvüe sha bin ti. Ale aben hihvu hi lope tha thyüo ale lo azen kehünyu ju genyu sen mvulo keshvu fülo lotse ryü.

³⁵Ale hagun no hagun yhenthyüo a-kekvu kendinyu chelo nrün, lo Npugü Jisu le a-npvü, ‘Khikelo nyeki pe me ketsü we gwakvu,’ tsonkethyü a-jo zo keshü rüchünlo lotse kethyü genyu ale tha hidan hi tsin pe hagun hishü le nye.”

³⁶Lo a-le jo tsü zoshüo nkhün tsügü khosenlo-o anyugun aphu kengüo kehithyü shü.

³⁷Tsontsin anyugun aphu Paul gunda süralo njüo a-mbo-o chükü sola.

³⁸A-le anyugun ka, “Hagun le a-mhun hyu sinlo ho sele,” tse kezo genyu anyugun nyungwa mvu kvula; tson-o anyugun le a-zen npha gü a-no run ge küla.