Read Southern Rengma Naga APOSTELNYU THO 22 Bible Online

APOSTELNYU THO 22 - Southern Rengma Naga bible

APOSTELNYU THO 22

¹“Apepvünyu dan, lo apvünyu dan, ale ntsoka hagun ka akenjü zoshü titse kebin hi nyülo re,” tsonshü.

²Tson-o a-le anyugun ka Ibrinyu khwen ki jozo keso shalo ntsin ngüka nyeki nramvu kvula. Tsüselo a-le anyugun ka:

³“Ale Kilikia kazü Tars rünyi nyu nnyukelo nyu Judanyu nme; lo ale rünyi hinyu hi Gamaliel no asenthyüo npepvünyu jvü ketsin gü tsü swüo peshülo. Lo ale nduka we nthu hagun hihontseo Sunggigü lothyü hü nle tseo ayhen thyü soryü.

⁴Lo ale Kenikelo Tson nshwen-o boshvula titse sole, tson-o tenu-e peche-e ten pe phinlo-o khipe doka nyu shüla titse hü.

⁵Lo tsügü tsüle peshükeda ju, lo pelü ju kehun aphu tsü sha bin ti. Lo ale tsüdan no lesü thu pe aben nyu shüo ale tsü sen-o Damaska nyu kebin npvünyu ju ki gun-o rünyi tsünyue temi peha le bin yatselo ten zen-o Jerusalem nyu gungü anyugun lope doka nyu shüla titse kethyü tsüle akendo thyü sola.

⁶“Lo tsükatsü ale Damaska khonni gun zhü ntsin, nhenyu luka tsangge keben nme le whütse tsüryüo aje pvülo.

⁷Tsontsin a-le chetsüla; lo tsükatsü, ‘Hire, Saul, Saul, nle nyuthyüo a nshwen hü nla?’ tson kethyü thakhwen nme sha.

⁸Tsontsin ako a-ka, “Npugü nle següla?’ tson-o ketso shü. Lo a-le aka, “Ale Nazaretnyu Jisu, nle a-nshwen kehü gü tsüle!” tsonshü.

⁹Lo tsükatsü azen kehünyu dan ko keben tsü we hyu, ai a nthon kebinkhwen gü tsü we nyülo mvu.

¹⁰Lo tsükatsü ale a-ka, ‘Npugü, ano nyuthyülo mvulo shvula?’ tsonshü ntsin a-le aka, ‘Nle so-o Damaska nyu yülo, tsonlo yatselo nno thyü titseo ndo kebin dan tsünyu tsü aphu zokü pe nhishü ti.’

¹¹Lo tsükatsü keben kekvu gü genyu ayhütyü le tha hyulomvu lao azen kehünyu dan no aben sülo-o azen-o Damaska nyu yü.

¹²“Lo tsükatsü tejvü kipon nshün kehünyu nme Anania tsekethyü Judanyu nme, rünyi tsünyu teshwen kepvünyu nme le ryüo akhoka binlo-o aka,

¹³‘Asikezen gü Saul, n yhütyü no tha hyunilo,’ tsonshü. Tsonshü ntsin ayhütyü le tha hyulo njüo a-hyulo.

¹⁴Tsüselo a-le aka, ‘Npepvünyu Sunggigü le nno a-kendo shalo lotse kethyü lo Kenshün Kapu hyulo lotse kethyü, lo a-mün nyu chwikeryü a-khwen gü tsü nyülo lotse kethyü ndo sen hü laso.

¹⁵Kechamvule a-le nno temi aphu mhundyü nyu nle kesha kehyu tsü aphu zo pe a-rüla zoshwishü nrün genyu.

¹⁶Lo nle nyuthyüo ntsoka-e sun bin nla? Solo-o baptaiz thyülo, tson-o a-zan nyu nkapu rüshvuo nkemu dan tsü sükü la.’

¹⁷“Lo Tsükatsü ale Jerusalem nyu nigun gü Kershvuka nyu hi kebin ka, ale pesilo la; lo tsükatsü ale A-hyu, lo A-le aka,

¹⁸‘Nle whütse Jerusalem nken chwilo; kechamvule anyugun le nle ajün zoshwi keshü gü tenyenlo keho genyu,’ tsonshü.

¹⁹Tsontsin ale a-ka, ‘Npugü anyugun ko shabin ti, ale sinagog ka aphu nyu n ketenyen nyu ten pe do thyü, lo anyugun vü tson soryü.

²⁰Tsüntimvule njün kezo gü Stefan dukeshvu ka-e anyugun zen-o kenyunrhün-o anyugun khoka bin-o a-dukeshvunyu dan phinya khwen bin.’

²¹Tsüselo Npugü le aka, ‘Tsonchü shü, kechamvule ale n nipe a-mah kephoun hyukemvu bin ki Juda kemvunyu ki shüti tse kebin genyu,’ tsonshü.”

²²Lo anyugun le a-jo tsü keti nyülo, tsüselo nra sen-o, “Temi hontse kethyü nyu we no kazü nyu yhun bin nya; a-no yhun hü zümvu.”

²³Lo anyugun le nra sen-o anyugun phi-e rho pe shwen, lo kenphü khü pe shwen tse so ntsin, yie so kedagü le meno a-zen-o shüpahünyu bin ki gunla lotse ahza khishü.

²⁴Tson-o mele nyu genyu a-ge a-kenyümvu-o sen pe hitsüki thyü bin yo tsekethyü shalo kenyü genyu meno a-vüo ketso petsü sa lotse kethyü zoshü.

²⁵Tsontsin me le ron lope a-phinlo ntsin Paul le tsiso kedagü ka, “Rom nyu-e hagun le a-kemu shalo kemvu ka a-vü kethyü tsüle tejvü ole?”

²⁶Lo tsükatsü tsiso kedagü le jo tsü shalo njüo, gungü yieso kedagü ka, “Nle dihontseo hihontse bin nla? Temi higü hile Romnyu nme hile la?” tson.

²⁷Tsontsin yieso kedagü le gunryüo a-ka, “Nle Romnyu ole? Aka zoshü ta.”

²⁸Tsüselo Paul le a-ka, “Ele!” tsonshü. Tsüselo yieso kedagü le a-ka, “Awe Romnyu thyükelo le raka kechon lope hei-o thyülo le.” Tsüselo Paul le a-ka, “Awe a nnyulo nyemhun ka nyu Romnyu lenye!” Tsonshü ntsin a-ketso titse kebin nyu dan aphu tin bula.

²⁹Lo yie so kedagü ko Paul le Romnyu letsekethyü sha kelo ka, a-le Paul ten pe phin kethyü genyu nshvu rila.

³⁰Lo tsüsinyü Judanyu le nyu genyu Paul nkhin yo tsekethyü sha tsentsülo nrün genyu, yieso kedagü le Paul shwüshülao peshükesha ju lo pelü kehun aphu no ryüo kequenlo lotse zoshü. Tson-o a-le Paul zen nshye gü a-khipe anyugun mhundyü nyu shüshü.