Read Southern Rengma Naga APOSTELNYU THO 23 Bible Online

APOSTELNYU THO 23 - Southern Rengma Naga bible

APOSTELNYU THO 23

¹Tsontsin Paul le kehun dan nri ryülo njüo, “Apvünyu ju, ale nthu keti hi-e anyu njüo Sunggigü mhundyü nyu yhun gunryü laso.”

²Tsonshü ntsin peshükedagü Anania le a-khoka kebin dan no Paul mün vüshü lotse zoshü.

³Tsontsin Paul le a-ka, “Nle hyu nchon kenjü kabon! Sunggigü le nvüshü ti. Nle tejvü nyu aketso titseo tejvü gwünrho-o meno avü ti ole!”

⁴Tsontsin tsünyu kebin dan le a-ka, “Nle Sunggigü peshükedagü kesü ti ole!”

⁵Tsontsin Paul le, “Apvünyu ju, ale a-no peshükedagü letse kethyü rüchün bin mvu. Tsonkemvu we, ‘Nle temi dan so keda thyü kehünyu ge jo gwakemvu zoloshvu,’ tsonkethyü thu kenjü genyu.”

⁶Ai Paul le kehun tsünyu temi le dan me le Sadukinyu, lo dan me le Farisinyu tse le kebin hyulo-o, a-le tsüdan dan myu nra sen-o, “Hire, apvünyu ju, ale Farisinyu lo Farisinyu nyu nme; lo meno aketso kebin hile kechamvule sidyüki rüla gü genyu, lo kesinyu le rhünniso kelo rüla genyu le.”

⁷Lo a-le tsonshü ntsin, Farisinyu lo Saduki nyu dan le kenyi sola. Tson-o kehun tsünyu tsü temi le dan hvu thyüla.

⁸Kechamvule Sadukinyu tsü le kesinyu le rhünnilo hü mvu letse hünyo; ai Farisinyu we hidan hi aphu bin kü letse kehü genyu.

⁹Tsontsin kevü keda nme le soryü la; tson-o Farisinyu kipon lesükesha tsin nyu peha le solo-o me zen kenyio, “Agun we temi higü kemu nme-e hyulo mvule. Kha, tselo Kapu, nmvue tsangge lokethyünyu nme le a-nthonshü ketsin letse yatselo!” tsonso.

¹⁰Tsüselo kevü tsüle gon salo la ntsin yie so kedagü le meno Paul süthü sürü kela nshvuo, shüpahünyu dan me no nshye gü me dan nyu tsü anyugun ronkemvu thyüo Paul ko zen-o shüpahü nyu bin ki nsin ryüla lotseo ahza hoshüla.

¹¹Lo tsüje Npugü le gunryüo a-khoka binlo-o a-ka, “Nnyun pechelo nye; nle Jerusalem nyu azan zokeshü hontse Rom ki-e azan zoshü mvulo shvu,” tson.

¹²Lo tsangbenlo ntsin Judanyu dan le tedorhünlo-o sen-o, anyugun le Paul dushvula kemvuthen we tyütsü loho letse sola.

¹³Lo anyugun tedo tsü kerhi temi dan tsüle temi henzi nyeki chon.

¹⁴Tson-o anyugun le peshükeda ju ki lo pelü dan ki gungü, “Agun le Paul dushvula kemvuthen tyütsü loho letseo keswe kerü nme pe agun phin pvü hüla sele.

¹⁵Tsügenyu hagun le gungü pelü ju kehun zen-o Paul ketso petsü sa kethyü rothyüo yieso kedagü no azen-o hagun ki nshyeryü lotse hilo chi; lo a-le nshyeryüo hi tikelo mhundyü agun le a-dushvula titse binla sele,” tsonshü.

¹⁶Ai Paul lüginyu nyu nme le mele a-tson khwen bin kela shalo njüo, a-le shüpahünyu bin ki yügü Paul ka zoshü.

¹⁷Tsüselo Paul le tsiso kedanyu nme kope a-ki shülo-o, “Nle ponyu higü hi zen-o yieso kedagü ki gü nye. Higü le a-ka jo nme zo titse hü nle,” tsonshü.

¹⁸Tsügenyu tsiso kedagü le a-zen-o yieso kedagü ki gunlo-o, “Dogü Paul le akoshüo ano ponyu higü zen-o nki gunryülo tse zoshü le; a-le nka jo nme zoshü ti yale!” tson.

¹⁹Tsonshü ntsin yieso kedagü le ponyu tsügü ben nrhisülo njüo a-zen-o kecha nme ki gungü kebuo a-ketso-o, “Nle aka nyu zo titse hü nla?” tson.

²⁰Lo Ponyu gü tsüle a-ka, “Judanyu le nkuo nno Paul rüla ketso petsü sa nilo tseo senduki a-zen-o pelünyu ju kehun nyu nshyeryülo tsekethyü nka hi titseo tedo rhi bin laso.

²¹Ai nle anyugun jo zen nya nye; anyugun le mi henzi kela le Paul dushvula kemvuthen we tyütsü loho letseo keswe no anyugun phin pvüo a-tson khwen bin kelasi genyu. Lo anyugun le nka ahza hyukelo nrin-o ntsoka-e ndo sen-o khwen bin kelasi genyu.”

²²Lo yieso kedagü le ponyu gü no jo tsü lope a-ka kezo nyeki temi kechanyu nme ka-e zonyalo tse zolao a-no tinla.

²³Tson-o a-le tsüsika tsiso kedanyu mihvu kope a-ki shülo-o, “Hai le ntsoje tsangkezün tegi kenshen kevügü gwünkho ka shüpahünyu tsihvu, lo keru ge kebin shüpahü hentsenyü, lo mi kepen shüpahü tsihvu no Kaisaria nyu gun nrün genyu ndoshü chi.

²⁴Lo anyugun no Paul zen-o petsüsa tse Filika Ahng gü ki gunlo nrün genyu Paul no a-ge bin nrün keru-e ndoshü lotse zoshü.”

²⁵Lo yie so kedagü le lesü thu keshü le hihontse:

²⁶“Klaudia Lusia le ahng kegwa tsin gü Falika kelu sashü lenye.

²⁷Lo temi higü hile Judanyu no a-tenlo-o a-dushvula titse kebin ka, a-le Romnyu tsekethyü ale shalo-o shüpahünyu zen tsügü a-kenilo.

²⁸Lo anyugun le nyu genyu a-nkhin hü yo tsekethyü shalo nyüo ale a-zen-o anyugun pelü kehun ka nshye.

²⁹Lo ale shakelo le, anyugun le a-kenkhin le anyugun npvü anyugun jvü kipon tha rüla kenyi kethyü genyu le; ai a-dushvula kezü, nmvue a-no dothyü kezü tho nme-e hyulo mvu.

³⁰Lo mele higü hi shwinyü kemvu tedo rhi kebin ale shalo ntsin, a-ni whütse pe nki shübin nle nye; lo a-ge kenyon kebin nyu dan tsüno gunryüo nmhundyü nyu tha lihi-e zolo lotse kethyü zoshüla sele nye.”

³¹Tsontsin shüpahünyu dan le a-le zokeshü hontse Paul zen-o kezün ki Antripetri nyu gunla.

³²Ai tsüsinyü anyugun le keru ge kebin shüpahünyu dan no a-zen gunlo tse zolao kechanyu dan le shüpahünyu bin ki nigun ryüla.

³³Lo keru shüpahünyu dan le Kaisaria nyu gunryülo ntsin lesügü tsü khipe ahng gü tsüshü, lo Paul ko zen gü a-mhundyü nyu shüshü.

³⁴Lo a-le lesü tsügü swüshüo a-ka, a-le nyu nyu yo tsekethyü ketso shü.

³⁵Tson-o a-le Kilikianyu letse kethyü shalo-o a-le, “Nzen kenyon kehünyu dan le gunryülo yatselo, ale njo nyü sa shüti,” tsonshü. Tson-o a-le meno Paul khipe Herod ka nyu shü ntselo tse ahza hoshüla.