Read Southern Rengma Naga APOSTELNYU THO 24 Bible Online

APOSTELNYU THO 24 - Southern Rengma Naga bible

APOSTELNYU THO 24

¹Lo jon pvün siki peshükedagü Anania le pelü ju peha lo Tertula tsekethyü ukilnyu nme tse zen nshyeryüo ahng gü mhundyü nyu Paul shwinyükemvu jozo sola.

²Lo Paul ko zen ryü ntsin, Tertula le Paul nkhin titseo: “Hire, kegwa tsingü Felika! Agun le ngenyu yhun bwen kebin gwünzin le. Nkesha kegwa genyu tejvü gwakemvue thyü pe gwasalo laso.

³Agun rünyi aphu ka tha tsühontse kethyü genyu agun le agun sherhün sa bin hünyo.

⁴Ai ano nkevü rila mvu nrün genyu nle agun njünlo agun jo keshanyu nyüshü ta.

⁵Temi higü hile me kevü keben sari kethyü, lo kazü aphu nyu Judanyu dan nyu n rajagü shwirüchün kehü lo Nazaretnyu dan nyu me nsü nshvu kehü nme tsekethyü agun le shalo laso.

⁶Tsüntimvule a-le agun Kershvuka-e bo nrhula titse so; ai agun le a-tenlo laso. Tsügenyu agun le agun jvü ka a-jün kera nyü bin nyo.

⁷Ai yie so kedagü Lusia le nshyeryüo agun ronkemvu thyüo agun ben nyu a-zenlo la.

⁸Lo a-nmu kehünyu no nkigunryü lotse ahza khishü laso. Nko a-ketso petsü sashü yatselo, agun le nyu genyu a-nmu hü yo tse kethyü aphu sha külo ti.”

⁹Tsüselo Judanyu dan ko a-jo pen-o jo tsüle a-ketsin letse zo kü sola.

¹⁰Tsüselo ahng gü tsüle Paul no jozo shü lotseo benzü shü, tsontsin Paul le zo-o, “Nle temi hidan so keda thyü kelo le chen kethon ki thyü bin kelasi genyu ale tsü shalo njüo a-sherhün-o nmhundyü ka arüla zoshü titse bin nyo.

¹¹Nko shalo ti, ale rüshvu titseo Jerusalem nyu kensin le jonryü kenyhun nyeki sinmvu zun.

¹²Lo tsü jaka ale Kershvuka nyu-e lo sinagog nyue nmvue rünyi nyue temi nme-e zen kenyi hü nmvue temi gwünkevü hüo meno ahyulo mvule.

¹³Lo ntsoka akemvu zope anmu kebin hile anyugun temi nme-e zoshwi keshüi ndi.

¹⁴Ai anyugun le ale thyüzü letse kethyü tsüle kenikelo tsongü zen-o agun pepvünyu le Sunggigü rüshvu kehü, jo higü hi sen-o nka zomvulo nrün ndi; tson yatse-e tejvü nyu kehünyu lo sidyükeshanyu lesü nyu thu kenjü tenyen küo.

¹⁵Sunggigü kipon sidyü nme le bin letse kethyü temi hidan hi hontseo ako tsü rüchün hünyo. Tsü gü tsü le kenshün nyu metse lo nshün kemvunyu metse rhünni keso nme we bin ti.

¹⁶Tsügenyu Sunggigü kipon-e lo temi kipon-e nnyun no nzhülo nrün genyu ako ayhen thyüzin gunryü laso.

¹⁷Lo chenhvu chenshen tsünyu bin mvula njüo mele tha khipe atemi dan ketsü lo a npvü agenyu-e kershvu thyü nrün dan sen-o Jerusalem nyu nsin.

¹⁸Lo tsükatsü mele ale Kershvuka nyu athyü nshün keloe hyulo; ai tsükatsü le temi kechon ki-e hümvu, nmvue kevü kethyüe ndi.

¹⁹Ai Asia ki Judanyu dan me le gunryü bin; temi tsüdan tsü le age tha zo ti yatselo, nmvue ale pelü ju mhundyü nyu kebin ka ale,

²⁰kesinyu le rhünni keso rüla kezo genyu hagun mhundyü nyu nthu aketso bin tse kethyü,

²¹lo ale anyugun dan nyu bin-o nra sen keshü ajo tsügenyu kemvu we akemu kecha le bin yatselo temi hidan no anyugun npvü zolo nye,” tsonshü.

²²Ai Felika le Kenikelo Tson gü rüla sha dinlo njüo, hisikinyu kera titseo anyugun ka, “Lusia yie so kedagü le nshyeryü yatselo ale hagun jokera ti.”

²³Tsonlao a-le tsiso kedagü no a-khipe bin ntselo tse zoshü, ai a-no do kechanyu hontse mvuo a-pvü a-shen dan-e no a-che lo a-lo thyü kemvu thyüla nyalo tse anyugun ka zoshü.

²⁴Ai Jon keshanyu sika Felika le a-nu Drusila Judanyu lü tsügi zen-o nshyeryü; tson-o Paul koshüo a-ka, Khrista Jisu ketenyen rüla nyü.

²⁵Tsükatsü Paul le Kenshün lo n npvü n kekhenilo mvulo keshvu lo hisiki Sunggigü le nketso nrün rüla dan tsin tsentsü pe a-zenshü ntsin Felika le nshvu rilo lao, “Nle nthu gwün le tin tselo, ale akerüyü gwünkho hyulo yatselo nko nishü ti.”

²⁶Tsüntimvule a-le Paul no raka-e pe a-tsü nrün hontseo a-ko whü shüshü tseo a-nthon thon tse zin hü.

²⁷Tson hüo chenhvu thyüla ntsin Porkia Festa tsüle gunryüo Felika sun thyülo la; ai Felika le Judanyu kenyü thyü nyüo Paul khipe doka nyu shüni la.