Read Southern Rengma Naga APOSTELNYU THO 25 Bible Online

APOSTELNYU THO 25 - Southern Rengma Naga bible

APOSTELNYU THO 25

¹Lo Festa le tsünyu gunryülo-o jonshen si nyü Kaisaria nyu Jerusalem ki nsin.

²Tsontsin peshükeda ju lo pelü ju le gungü Paul ge jokera kethyü rüla pe a-ka zoshü.

³Lo tsükatsü anyugun le a-no anyugun njün shüo Paul ko pe Jerusalem nyu shü shülo tse zoshü.; tson-o anyugun le tsonne nyu a-boshvu kela rüchün bin.

⁴Tson-e Festa le, “Kaisaria nyu Paul khin njü, lo a-ko thon sarimvu tse tsünyu nshye titse kethyü zola.

⁵Tsügenyu temi tsügü le kemu peha thyüla yatselo; hagun dan nyu kekvu kebin nyu no a-zen nshyegü, tsünyu no a-ge kenyonlo nye,” tson.

⁶Tson-o a-le jonryü sinkhe anyugun zen bin hüo Kaisaria nyu nshyela; lo tsüsi nyü jokekera bin ge binlo-o Paul zen ryülo tse ahza hoshü.

⁷Tson-o Paul le nshyeryü ntsin Jerusalem nyu kebin Judanyu dan le ryüo a-hunpvülo-o a-kemvu jokerü kechonki zope a-nmu so; ai anyugun jo nyu tsü rüla zoshü lomvu la.

⁸Tsükatsü Paul le a-npvü a-rüla zo-o, “Ale Judanyu jvü gü, nmvue anyugun Kershvuka, nmvue Kaisar-e shwinyü kemvu tho nme-e thyü shwimvu.”

⁹Ai Festa le Judanyu dan ka teshwen pvülo nyüo, Paul ka, “Nle Jerusalem nyu nsin-o meno a mhundyü nyu tha hidan hi ketso ti mon?”

¹⁰Ai Paul le, “Ale ntsoka-e Kaisar le me jokera kehü bin mhundyü nyu so bin nyo, lo tsünyu tsü ajokera kethyüi. Nko sha tsentsü bin ti, ale Judanyu mhundyü nyu we kemu nme-e thyü mvu.

¹¹Ale tejvü gü gwünrho kela nme thyü yatselo, nmvue ale sila kekü tho nme thyüla yatselo,ano si titse-e nmvu letse mvule; ai a nkhin kebin jo hidan hile ketsinkemvu jo nti genyu, temi nme-e akhipe anyugun ben nyu shülo nrün ndi. Ale Kaisar ki apil thyü niti.”

¹²Lo Festa le a-pelü ju zen-o kejo rhünlo-o, “Nle Kaisar ki apil thyüni titse bin laso; tsügenyu nle Kaisar ki gunlo mvulo shvu.”

¹³Lo tsühontse hü tseo jon keshanyu sika Rajagü Agripa lo Bernice au le Kaisaria nyu gunryüo Festa tenoshü.

¹⁴Tson-o au le jon kethonki tsünyu bin tinla; lo tsükatsü Festa le Paul rüla pe raja tsügü ka zo titseo,

¹⁵“Felika le temi nme khipe a-no hinyu dothyü bin nyo; lo ale nsin gü Jerusalem nyukebin ka peshükeda ju lo Judanyu pelü dan le temi tsügü rüla zo-o ano a-nkhin shülo tseo aka hiso.

¹⁶Lo tsükatsü ako anyugun ka, ‘Rom nyu jvü nyu temi nme-e temi nme zen kenyon kebin gü a-zen-o kenyon kebin nyu dan zen-o mhuntsun kehyu-o mele a-ge kenyon kebin genyu a-no a-npvü a-rüla kezo gwünkho nme-e hyulo mvu tseo a-khipe a-ge kenyon kebin nyu ben nyu shükela tsüle tejvü kemvu le,’ tson zoshü.

¹⁷Tson-o anyugun le gunryüo hinyu kequenlo ntsin, ale kesedunmvu shü tseo tsüsinyü jokekera bin ge binlo-o, temi tsügü zen ryülo tse ahza hoshü.

¹⁸Ai a-ge kenyon kebin dan le ryüo a-hunpvülo ntsin awe le anyugun le a-nmu kethyü jo gwakemvu zope a-nkhin chwiryü ti ado tse bin, tson-e tsühontse khe-e mvu.

¹⁹Ai anyugun le anyugun npvü anyugun nyünyü rüla lo Jisu letse kethyü si kela nme, Paul le tsügü le rhün hü zun letse kethyü rüla kezo nme genyu a-ge kenyon kehü nti le.

²⁰Lo ale tha tsüdan rüla tsü ketso kethyü ka, tedo sha ntsenlo mvulao ale a-no nsin gü Jerusalem nyu tha tsüdan rüla ketso tile nyu tsethyütiyo? tson-o a-ketso keshü ka, Paul le rajagü no jo hi kera titseo apil thyüni titse sola.

²¹Tsügenyu ale a-nipe Kaisar ki shüla kemvu jaka meno a-khipe bin ntselo tse ahza khishü njü le,” tsonshü.

²²Tsontsin Agripa le Festa ka, “Ako temi tsügü jo tsü shashü nyüle,” tson. Lo a-le, “Nle senduki a-jo shalo ti.”

²³Lo tsüsinyü Agripa lo Bernice au le au nthyü nzen salo-o yieso kedanyu dan lo rünyi tsünyi pelünyu dan zen-o raja bin nyu yülo ntsin Festa le ahza khishüo meno Paul zen gunryü

²⁴Tsontsin Festa le, “Rajagü Agripa, lo nthu gunryüo nzen-o hinyu kebin temi aphu-e hagun le temi higü hi hyu bin ti, a-genyu Judanyu aphu gunryüo a mhundyü ka kenyonlo laso; tson-o anyugun le Jerusalem nyue lo hinyue a-no rhün sin hü zümvu letse sen külo laso.

²⁵Ai tsükatsü ale shakelo le a-le sila kekü tho nme-e thyümvu, lo a-le rajagü ka apil thyüni titse kela genyu, ako a-nipe tsünyu shüla titse kethyü rüchün bin laso.

²⁶Ai ale a-rüla thu pe aso kedagü ka shüti tsekethyü tha sha ntsenlo mvu bin nyo. Tsügenyu ale a-zen-o hagun mhundyü nyu lo kechon le bin-e raja gü Agripa, nmhundyü nyu gunryü bin nle; kechamvule a-ketso petsülo kethyü siki nyu ale a-rüla tha peha thushülo kegwa hyulo ti ado tsekethyü genyu gwünzin le.

²⁷Dokethyü nyu nishü ti yatselo, mele a-ge kenyon kethyü tha kon nme-e zoshü kemvu le a mhundyü ka a-zümvu kethyü genyu,” tsonshü.