Read Southern Rengma Naga APOSTELNYU THO 26 Bible Online

APOSTELNYU THO 26 - Southern Rengma Naga bible

APOSTELNYU THO 26

¹Tsüselo Agripa le Paul ka, “Ntsoka we nle n npvü njo zoshü logwa so.” Tsonshü ntsin, Paul le a-ben shwen pen tse a-npvü a-rüla zo ti tseo:

²“Rajagü Agripa! Hire, Judanyu le a nkhin kethyü jo aphu genyu ale nthu nmhundyü nyu ajvü arüla zo titse so kelo hi ale asherhün sa bin nyo.

³Kechamvule Judanyu dan nyu tejvü le kehü tsü aphu lo kenyi kehü tsü aphu nle shakü kebin genyu. Tsügenyu nle a njünlo nyüo n shesela nyao ajo hi nyüshülo.

⁴“Ale sokerika nyu Jerusalem nyu lo a npvü atemi dan nyu a ncheka ryüo ntsoka keti arüla tsüle Judanyu aphu shakü bin nyo.

⁵Lo ale anyugun nyünyü kerü tsingü nyu Farisinyu thyü soryü kethyü anyugun le anyugun npvü tsü jün kezo fünyü yatselo, anyugun le arüla we sha keti bin nyo.

⁶Lo ale ntsoka Sunggigü le n pepvünyu ka zo kenjü sidyü gü genyu hagun no ntsoka aketso kebin gwünzin.

⁷Sunggigü le zo kenjü tsü hyukelo rüchün-o anyugun tsipwen tseryü kenyhunche dan tsüle khenyütse, keben kezün, anyugun yhenthyüo Sunggigü lothyü hünyo, lo hire, rajagü, sidyü tsügü tsü genyu Judanyu le nmhundyü nyu age kenyon kebin gwünzin le.

⁸Sunggigü le kesinyu thyü nrhünlo yatselo, hagun le nyu tsethyüo tsügü tsü tenyenlo nrün ndi le tsekethyü rüchün hü nla?

⁹“Nduka ako Nazaret Jisu zan tsügü shwinyü kemvu tho kechon thyü hüe tsüle njü letse kethyü rüchün sole.

¹⁰Lo ale tsüdan tsüle Jerusalem nyue thyüshwi so; lo ale peshükeda ju ka ahza hyulo-o kenshün nyu dan kechon ki ten pe doka nyu khin, lo anyugun dushvu kethyü ka-e ako akendo letse kethyü zoshü.

¹¹Tsüntimvule ale khenyütsen sinagog ka nyu yügü anyugun nthyü nnyü lo anyugun no Jisu nkhin titse kethyü ayhen thyü soryü; lo ale anyugun shwi pe akenyümvu sao gungü me rünyi ki-e anyugun nshwen nyhün sa tsehü.

¹²“Tson-o ale peshükeda ju ka anyugun jo lo hukum hyulo njüo Damaska nyu gun.

¹³Lo tsükatsü hire, rajagü, khenyüme nhenyu lvu ka tsü tsangge keben nme le yhüko nyeki-e benkvu kethyü nme le tsüryü, lo tsüle a lo azen kehünyu dan aphu gwün pe benchvü kelo tsü hyulo, lo tsükatsü agun aphu kazü nyu chekü tsüla ntsin,

¹⁴Ibrinyu khwen ki aka, ‘Hire, Saul, Saul! Nle nyuthyüo a nshwen hü nla? Nle thora kesü san gü nsü titse kethyü tsüle tsen sa tile nye,’ tson kethyü kezo khwen tsü ale shalo.

¹⁵Tsontsin ale a-ka, ‘Nle segü la, Npugü?’ tson-o ketsoshü. Lo Npugü le, ‘Ale nle nshwen kehü gü Jisu tsüle.

¹⁶Ai nle solo,kechamvule ale gunryüo ntesha keshü le ale nno nduka tha hyukelo dan-e lo hisiki ale tha zope nhishü nrün dan-e zoshwishü lo jo tsü sen-o me senkethyü nme thyülo nrün genyu gunryüo ntesha shü bin nle.

¹⁷Lo ale Israel nyu temi dan nyue lo Juda kemvunyu dan nyue nkenilo ti.

¹⁸Lo ale Juda kemvunyu no kezün nyu ketu sen-o keben nyu chwiryülo nrün, lo satan kekvu nyu Sunggigü kipon chwilo nrün, lo anyugun no anyugun kemu jülo nrün genyu, lo a-tenyenlo-o nshünlo kela nyue sin zen-o kenya hyulo nrün genyu anyugun yhütyü thyü nben shülo tseo ale n nipe anyugun ka shüti.’

¹⁹“Tsügenyu hire, rajagü Agripa, ale tsangge tha shakelo tsü zen mvula hümvu le.

²⁰Tsonkethyü gü mvule ale tha tsüdan rüla zope Damaska nyu kebin nyu teshashü teri, lo tsüsika Jerusalem nyu kebin nyu, lo Judia nyu kebin nyu aphu ka zo sinshü; lo tsüntimvule Juda kemvunyu no a-nyunkelulo-o Sunggigü denzin gunryülo nrün genyu ale tsüdan rüla zo sin pe anyugun hishü so.

²¹Tsügü tsü genyu Judanyu dan le atenlo njüo adushvula titse kethyü anyugun yhenthyü kebin gwünzin le.

²²Tsonkethyü nyu tsüe Sunggigü le anopen kelo genyu ale nthu hi-e so-o keshanyu ka-e sidyükeshanyu lo Mosa nyugun le anyugun keyhun siki thyü kehü dan kezo nyeki jo kecha nme-e zo-o tsüdan jünzo shwi mvu.

²³Lo tsügü tsü le Khrista le kenjünthyü mvulo keshvu, lo a-le kesinyu dan nyu rhünniso kelo kerigü thyüo a-npvü a-temi dan lo Juda kemvunyu ka-e jolokegwa keben gü pe teshashü mvulo keshvu jo le.”

²⁴Lo Paul le a-npvü a-rüla zoshü ntsin, Festa le nra sen-o a-yhenthyüo, “Hire, Paul, nle nnu bin laso! Nle lesü swü chonri kethyü genyu nnu bin laso!” tson sola.

²⁵Ai Paul le, “Hire, kegwa tsingü Festa, ale nnu mvu; tsonkethyü gü mvule ale joketsin lo kentsen nyu jozo bin nyo.

²⁶Lo raja güe jo hidan hi shabin ti, ale a-ka akethüla mvutse zo bin nyo; tsüntimvule jo hidan hile a-le shakemvu jo nme-e kemvu letse kethyü ale rüchün tsentsü bin nyo; kechamvule tha hidan hi me kendi bin ki thyü kemvu genyu.

²⁷Hire, raja gü Agripa, nle sidyükeshanyu jo tenyen hü nmon? Nle tenyen kehü ale sha laso!”

²⁸Tsontsin Agripa le Paul ka, “Nle lonitse ano khristian thyü tinla titse kethyü ndo bin nle?”

²⁹Tsüselo Paul le, “Nne metse lo tsen metse, n npvü mvule nthu ajo nyü kebin hidan aphu-e no ale dothyü kebin gü hihontse mvuo a-hontse thyü külo lotse kethyü ale Sunggigü ka akapu rüshvu bin nyo!”

³⁰Tsontsin raja tsügü lo rünyi tsünyu ahng gü lo Bernice lo anyugun zen kebin nyu dan-e tse, anyugun npvü kecha nme ki gungü kenthon-o,

³¹“Temi higü le sila lo kegwa nmvue meno a-phin kezü tho nme-e thyü mvule.”

³²Tsontsin Agripa le Festa ka, “Temi higü hile Kaisar ki apil thyüni kemvu we le a-hoshü la-e gwa le,” tsonshü.