Read Southern Rengma Naga APOSTELNYU THO 27 Bible Online

APOSTELNYU THO 27 - Southern Rengma Naga bible

APOSTELNYU THO 27

¹Tsüselo agun le run ge Itali nyu kegun rhilo ntsin, mele Paul lo do kechanyu peha-e sin tse pe raja kedagü shüpahünyu dan nyu Julio tsekethyü tsiso kedanyu nme tenyen shüla.

²Tsüselo agun le Asia kazü terhon gun kezhü Adramutium run nme nyu yülo-o zü tson zen-o tsonchü shü. Tsükatsü Thesalonia rünyi nyu Makedonianyu Aristarka ko agun zen hü.

³Tson-o agun le tsüsinyü Sidon tilo; Tsontsin Julio le Paul shwinjün-o a-hoshü-o a-no a-pvü a-shen dan ki gungü rüyülo.

⁴Tsontsin agun mhundyü zin tsangnbu salo kela genyu agun le tsünyu zü tson zen-o Kupra pha kipon rhon gunryüla.

⁵Tsontsin Kilikia lo Pamfulia au mhundyü kipon kebin züda gü pvüthü sen-o Lukia kazü nyu Mura letse kethyü rünyi nme nyu gunryüla.

⁶Lo tsünyu tsü tsiso kedagü le Itali nyu gunkezhü Alekendrianyu run nme hyulo-o a-le agun no tsünyu binlo.

⁷Tson-o agun le nyazhü tse jon kechon ki tsonchü gungü tsensa tseo Knida rünyi tilo. Tsangkenbu genyu tsü tson gü nyu tsonchü sinshülo shvulao agun le run zen-o tin sen tse Kreta pha rhon gungü Salmuna mhundyü ntsen nyu gunlo.

⁸Tson-o agun le tsensa tse tsükho rhon sen tse run le kenshvu ndio sunlo kehü bin nme nyu ryülo; lo tsükho kenika Lesea rünyi gü tsü le bin.

⁹Züda nyu njwen lo keshvu gwünkho le ryü kemvuthen, agun le tsünyu binthon sa tinla, tson-o ntsoka we Nyen-o nga kehü Jon tsüe nken la. Tsügenyu Paul le jo hipe anyugun tsontin shü:

¹⁰“Hire, temi dan, anyunki kerüchün le nthu gwün ngun kenjwen le nshvusa, lo nke-e sa ti, ngun le tha pvü kehü lo ngun ntimvule, ngun phou-e sin-o nke lati,” tsonshü.

¹¹Ai tsiso kedagü le Paul jo nyeki run kethu kedagü lo run tsünyu npugü au jo tenyen kvula.

¹²Run kensen bin tsügü nyu tsüle tsangse ka bin kethyü le gwa sari kemvu genyu temi kechon gü le thyülo kegwathen gungü Foniko tilo-o tsangse ka tsünyu bin kelo rüchün-o tsünyu tsonchü shü titse kethyü a-kenyü külo la, Foniko tsüle Kreta nyu run kensen bin nme thyüo yhüko kechwi kipon ntsun-o tesozin-e lo tesinzin-e gunlo kegwa bin nme.

¹³Lo tesinzin kipon tsangnbu dindin gunryü ntsin anyugun kerüchün gü tsü thyülo la sele tseo anyugun run shwü lo-o run thu sen-o Kreta kho rhon gunzhü.

¹⁴Ai thonsari kemvu ka tsangkenbu terhi, a-zan le Eurakulon tsekethyü nme le ryüo agun whün lola.

¹⁵Tson-o run tsüno tsangkenbu ntsun gun loshvu lo la ntsin, agun run gü tsü hoshülao tsangkenbu no when sen tinla.

¹⁶Tsüselo agun le Kaude tsekethyü zükehun kazü keshe nme pha rhon gungü agun yhen thyüo run keshen gü nrhisü sen binlo.

¹⁷Tson-o meno tsügü nrhisü sen chwiryülo-o tedo kechon kie thyü run kedagü tsü phin nkolo; lo run when pe Surtis nyu shükela nshvuo meno run phi gü tsü süyhün sen tsenryü lao tsangkenbu no run gü when sen-o gunla la tse bin.

¹⁸Lo tsangkenbu no agun when rilo kela genyu tsüsinyü we meno run ge tha pvü kehü dan khipe shwenla latse lola.

¹⁹Tson hüo jonshen nyü we meno me ben lope run kanyü tsüe jün pe shwe sola.

²⁰Tson-o yhükoe hyumvu, lo shyenyüe hyumvu thonsa la, tsang-e nbu khe ntimvula ntsin, agun le rhünkelo nme-e tenyen mvula.

²¹Lo temi dan le tyütsü mvu thonrila kethyü genyu Paul le anyugun dan nyu solo njüo anyugun ka, “Hire, temi dan, hagun le ajo zen-o Kreta nyu run thu sen-o tsonchü shü mvulo gwa nrün; tsonlo kenshvu, nmvue kenke hihontse kethyü hyulo ho atale.

²²Ai ntsoka we ajo zen-o hagun nyun pechelo, run nti a-me hagun temi nme-e nkela loho.

²³Kechamvule ale a-hon lo ale a-rüshvu kehügü Sunggigü lokethyünyu nme le nje tsüryüo akhoka dun-o aka,

²⁴‘Nshvu nya chi, Paul, nle Kaisar mhundyü nyue gunti,’ tson hü nle. Lo tsüntimvule hire, Sunggigü le ngenyu nzen-o run nyu kehünyu aphu-e no nkela loho letse bin laso.

²⁵Tsügenyu hire, temi dan, hagun nyun peche binlo nye. Sunggigü le aka zokeshü gü tsü thyüpen shü titse kethyü ale tenyen hünyo.

²⁶Ai ngun hoshü pe zükehun kazü nme nyu shüla logwa,” tsonshü.

²⁷Lo Andria züda nyu tsangkenbu no agun when pe lukipon hikipon shü shü tseo jonryü peziche je tsanglu khoka run kethunyu dan le anyugun npvü tin kelo rüchün-o zü kentsun ndoshü ntsin ni nki ndolo.

²⁸Lo nken khe npha gü ndo nishü ntsin ni tseryü pvün nti le kebin hyulo.

²⁹Lo run tsüno gungü züda seki senkelo nshvuo run sikipon tegi thün pezi dyüsen pe shweshüo, tsangben kelo nrin keho thyü bin.

³⁰Lo run kethunyu dan le anyugun npvü tinkela rüchün-o tegi thün dyü pe run mhundyü keshü rothyüo run keshegü khipe züda nyu shwenshü la.

³¹Tsüselo Paul le tsiso kedagü ka, “Temi hidan le run nyu bin kemvu we hagun le rhün keloi kemvu le.”

³²Tsonshü ntsin shüpahünyu dan le sogü run keshen gü kesenron duthü shüo no züda nyu chetsüla.

³³Tson-o tsangben chwiryü zhü ntsin Paul le temi aphu no tyütsü külo lotseo, “Hagun le tyütsümvu kela le nthu jonryü peziche thyü laso.

³⁴Tsügenyu hagun le ajo zen-o tyütsülo; tsonlo yatselo hagun le rhün loti; kechamvule hagun temi nme pe shüntsü nme-e nkela loho kethyü genyu.”

³⁵Lo a-le tson zoshüo tensü khisen-o temi aphu mhundyü nyu Sunggigü shwen shü; tson-o tyü tinla.

³⁶Tsüselo anyugun aphu anyugun nyun peche külo-o tyütsü kü tinla.

³⁷Lo agun run nyu kehünyu aphu kesin le temi tsihvuo hentsenyü-o tsero.

³⁸Tson-o anyugun le tyütsü salo ntsin anyugun thoe khipe züda nyu shwen shülao run khvü kenshen lo.

³⁹Tson-o tsangben chwiryülo ntsin agun le kazü tsügü shalo mvula. Ai agun le a-se lizin hizin züjen hyushüo agun run gü tsü khun pe tsünyu shü logwa tile mvuyo tsekethyü kenthon.

⁴⁰Lo anyugun le tegi thün kedyü tsü duthü pe züda nyu shülao run sükezelo kehü kanyü dan shwü shü, tson-o run mhundyü zin phikeden gü sen kügü den shüo run no kazü kesin kipon gunlo.

⁴¹Ai anyugun le tin sen-o züda kenren nme nyu gunlao run no dyükenbe nyu jenphün pvülo la. Tson-o run mün keri kipon nnun mvutse bin tinla ntsin zükentyü gwakemvu genyu run si kipon bose bore küla.

⁴²Tsüselo shüpahünyu dan le do dan le züvüo tinkela nshvuo tsüdan dushvu kela rüchün so.

⁴³Ai tsiso kedagü le Paul kenilo nyüo tsüdan khinla; tson-o a-le zü vü keshanyu no zünyu tsü when tsenlo-o kesin ki chwilo lotse, lo kechanyu no san pon ge, lo peha no run ketse ge-e chwilo lotse hukum hoshü.

⁴⁴Tson-o anyugun aphu kesin ki chwi külo.