Read Southern Rengma Naga APOSTELNYU THO 6 Bible Online

APOSTELNYU THO 6 - Southern Rengma Naga bible

APOSTELNYU THO 6

¹Tsükatsü senthyükelonyu le chon chwiryülo ntsin Grik jokezo Judanyu dan le Ibrinyu le khenyütsen tha kenjün kethyü ka anyugun maginyu ju phin rüchün mvula latse kethyü genyu tsüdan ge kenyo sola.

²Tsontsin tseryü kenyhun che dan le senthyükelonyu dan ko zen ryüo anyugun kho ka shülo njüo anyugun ka, “Agun we Sunggigü jo lope me senkethyü khelao ketyüketsü kenjün pe me ketsünyu thyü tinla zümvu.

³Tsügenyu hagun dan nyu me mhundyü nyu teshwen kepvünyu Kenshün Kapu lo thakesha no sükepvü nyu mi tsenyü kejülo, lo temi tsüdan no lotho tsügü thyülo tile nye.

⁴Ai agun we kehi kethyü nyu lo Sunggigü jo sen-o me senkethyü nyu ketukerü mvu tse bin ti.”

⁵Tsüselo anyugun aphu jo tsügü le anyugun kenyü küla; tson-o anyugun le ketenyen lo Kenshün Kapu le kesü thyü pvü kehü, Stefan tsekethyü nme, Lo Filip, lo Prokora, lo Nikonor, lo Timon, lo Parmena, lo Antioknyu le Judanyu jvü zentin kela Nikola tse kejülo.

⁶Tson-o tsüdan zen-o apostelnyu dan ka gunryü; tson-o anyugun le kehithyü shüo anyugun ben shwen pe tsüdan soge shüshü.

⁷Tsüselo Sunggigü jo le chvü gwen gwen tse soryüla; lo senthyükelonyue Jerusalem nyu chonsa soryüla; lo peshünyu dan-e kechonle ketenyen gü jo kezen nyu thyü tinla.

⁸Tsükatsü Stefan le shwikenjün lo kekvu no a-süpvüo temi dan nyu tha ndun kethyü keda lo thazansü dan thyü.

⁹Ai Libertin sinagog tsekethyü dan me, lo Alekandria nyu, lo Kilikia nyu, lo Asia nyu tse peha le soryüo Stefan zen kenyi sola.

¹⁰Ai Stefan le a-thakesha lo Kapu kekvu sen-o jozo kethyü genyu anyugun le a-nnyi loho la.

¹¹Tsontsin anyugun le me rhikeyhun shüo meno gunryü, “A-le Mosa lo Sunggigü nkhin kethyü jo kezo agun le sha le,” tsonkethyü zo lotse zoshü.

¹²Tson-o anyugun le temi dan lo pelü dan lo thakeshanyu dan ketsun shüo tsüdan no gunryüo Stefan tenlo njüo a-zen-o pelünyu dan kehun nyu gunryü.

¹³Lo anyugun le kenku jünkezo dan me koshüo tsüdan no gunryüo, “Temi higü hile kenshün bin higü lo Mosa jvügü kenkhin le tümvu shü.

¹⁴Lo agun le a-jo shakelo le Nazaretnyu Jisu tsüle bin higü hi nke lati, lo Mosa tejvü pe nke tsügüe thyü kelula ti, tson zohü nyo.”

¹⁵Tsükatsü kehun tsünyu kebin nyu aphu anri ryü pvü kebin ka, a-mhun le tsangge lokethyünyu mhun hontse chwiryü kela hyu.