Read Southern Rengma Naga APOSTELNYU THO 9 Bible Online

APOSTELNYU THO 9 - Southern Rengma Naga bible

APOSTELNYU THO 9

¹Ai Saul we Npugü le senthyükelonyu kesükedün lo anyugun dushvu titseo a-rikhen thyüo peshükeda gü ka gungü

²Kenikelo Tson gü zen kehü pechenyue lo tenunyue hyukelonyu tenlo njüo phin zen-o Jerusalem nyu gunla titseo, a-no tsügü rüla lesü thu pe Damaska nyu sinagog ka aphu nyu teshashü lotse hilo.

³Tson-o a-le gun kezhü ka gungü Damaska rünyi kho nni gunlo ntsin, tsangge keben nme le whütse tsüryüo a-te a-mhun gwen pe ben chvü tsela.

⁴Tsüselo a-le kazü nyu chetsü la, lo tsükatsü thakhwen nme le aka zo-o, “Saul, Saul! Nle nyuthyüo a nshwen hü nla?” tsonkethyü kezo khwen shalo.

⁵Tson-o a-le, “Npugü nle segü la?” tsonshü. Tsontsin tsügü le, “Ale Jisu, nle nshwen kehü gü tsüle.”

⁶“Ai nle solo njüo rünyi nyu yülo; lo ale nno thyü mvulo keshvu dan pe nka zoshü ti,” tsonshü.

⁷Ai a-zen-o njwen kegun nyu dan le temi nme-e hyumvuo a-khwen nti sha kethyü genyu anyugun dun thyüla.

⁸Tsüselo Saul le soryülo; tson-o a-pvünyu dan no a-ben sülo njüo a-zen-o Damaska nyu yüla.

⁹Tsükatsü a-le jonshen tha-e hyumvu lo tha tyütsü-e mvu tse bin tinla.

¹⁰Lo tsükatsü Anania tsekethyü senthyükelonyu nme le Damaska nyu bin; lo Npugü le a-ka, “Anania!” tson. Tsüselo a-le, “Whe, Npugü,” tsonshü.

¹¹Tsontsin Npugü le a-ka, “Nle solo-o gungü tsonda kenjü gü tse kehü tsongü nyu tsü Juda kanyu Tarsnyu nme a-zan le Saul tsekethyü gü tsü rüla ketso shü nye, kechamvule a-le hibin kelasi genyu.

¹²Lo a-ko Anania tsekethyü nme le a-no tha hyulo lotseo a-ben shwen pe a-ge keshü hyu hü laso.”

¹³Ai Anania le zonio, “NPugü, temi higü hile Jerusalem nyu ntemi kenshün nyu dan ge a-jvü gwamvu sa gunryü kethyü ale temi kechon ki ka a-rüla shalo.

¹⁴Lo a-le rünyi hinyu ko peshükedanyu dan ka nrüshvu kehünyu aphu tenlo titse kethyü ahza hilo laso,” tson.

¹⁵Ai Npugü le a-ka, “Nle gunlo, kechamvule ale a-kejü pe Juda kemvunyu lo kedanyu lo Israel nyenyu dan mhundyü nyu-e azan gü sen-o zoshü titse kethyü nme thyülo kelasi genyu.

¹⁶Tsüntimvule a-no azan nyu kenjünthyü sa mvulo keshvu dan-e ale tsin pe a-hiti,” tsonshü.

¹⁷Tsüselo Anania le gungü ka tsügü nyu yü; tson-o a-ben shwenpe a-ge shüo, “A sikezen gü Saul, Npugü Jisu le a-npvü tsonne nyu nteshakeshü gü, nno tha hyulo njüo Kenshün Kapu no nsüpvülo nrün genyu anishü le.”

¹⁸Lo tsonshü ntsin a-yhütyü ge thakü hontse kethyü dan me le nne tsüla, tson-o a-le tha hyulo; tsüselo a-le so-o baptaiz thyülo; tson-o a-le chvütyülo njüo nko nkinlo.

¹⁹Tsüselo a-le jon keshanyu Damaska nyu kebin senthyükelonyu dan zen bin.

²⁰Tson-o Jisu le Sunggigü Nyugü tsekethyü a-nyun kerhün thyüo zope sinagog ka nyu me senthyü sola.

²¹Lo tsükatsü a-jo keshanyu dan aphu anyugun dunthyüo, “Jerusalem nyu zan higü hi rüshvu kehünyu aphu nshwen kehü gü tsüle higü hi kemvu ole?”

²²Ai Saul le a-jo kvusa tseo tsügü tsüle Khrista gü letse kethyü zo tsentsü pe me hio Damaska nyu kebin Judanyu dan jo gwünkemhen la.

²³Lo jon keshanyu tsühontse hü tseo Judanyu dan le Saul dushvu kela rhi sola.

²⁴Ai Saul le anyugun do tsü shalo la; tson-o anyugun le a-dushvu kela rüchün-o keben kezün chwida nyu a-tson khwen sola.

²⁵ai a-jo tenyen kelonyu dan le kezün ki a-khipe rokhu nme nyu shülo njüo chwida kepe nme ka a-nipe chwida ngwen zin shüla.

²⁶Tsüselo a-le Jerusalem nyu gunryülo ntsin senthyükelonyu dan zen kengü nyü so; ai anyugun le a-no senthyükelonyu nme letse tenyen mvuo anyugun aphu a-nshvu sola.

²⁷Ai Barnaba le a-zen-o apostelnyu dan ka gungü, a-le tsonne nyu Npugü hyu kethyü lo Npugü le a-zen kenthon kethyü lo a-le Damaska nyu Jisu zan sen-o peche sao me senthyü kethyü rüla pe anyugun ka zoshü.

²⁸Tsüselo a-le Jerusalem nyu anyugun zen-o nsin nshyeo peche sao Npugü zan nyu me senthyü tinla.

²⁹Tson-o a-le Griknyu khwen kezo Judanyu dan zen kenyi sola; ai anyugun le a-dushvu kela rhi sola.

³⁰Tsükatsü a-pvünyu ju le shalo ntsin anyugun le a-zen-o Kaisaria nyu nshyeo a-nipe Tarsnyu shüla.

³¹Lo Judia lo Samaria rünyi aphu nyu kehun le yhun bwen-o nkolo; lo Npugü shye nshvuo yhun lo Kenshün Kapu no a-nyun thyü keyhun-o chon lo.

³²Tsükatsü Pitor le lihiki ntsü sen-o Lidda nyu kebin kenshün nyu dan ka nshye.

³³Tson-o Aenea tsekethyü chen tetse a-zhü nyu zhü zin kehünyu nme hyulo; lo temi tsügü le terothonyu nme.

³⁴Tsükatsü Pitor le a-ka, “Aenea, Jisu Khrista le nthyü kesherhün shü bin nyo, lo nle so-o nzhü sülo chi,” tsonshü ntsin a-le sola.

³⁵Tsügenyu Luda lo Sharon kazü nyu kebin nyu aphu a-hyushüo ranio Npugü kipon gunryülo.

³⁶Lo Jopa nyu Tabitha tsekethyü senthyükelo tenunyu nme le hü; Griknyu khwen ki a-zan le Dorka; tenunyu tsügi le thatho kegwa kechon thyüo me che sashü hü.

³⁷Lo tsükatsü a-le ho-o sila; tson-o mele a-min süpe katsen tesoki shü njü.

³⁸Lo Luda le Jopa khonni kethyü genyu senthyükelonyu dan le Pitor le tsünyu bin tsekethyü shalo njüo mihvu nipe a-ki shüo a-hi tenge tseo,“Nle agun ki gunryü ntsüla nya nye!” tsonshü.

³⁹Tsontsin Pitor le so-o au zen gunla; lo a-le gunryülo ntsin anyugun le a-zen-o katsen tesogü ki nsin; lo tsükatsü maginyu aphu a-khoka bin-o, Dorka le anyugun zen kebin ka thyü kenjü mikerün lo phinya thyü kenjü khipe a-hio chü bin.

⁴⁰Ai Pitor le anyugun aphu no kamhun ki chwila njüo khosenlo-o kehithyü shüo ranigü “Tabitha, solo chi!” Tsonshü ntsin a-le a-yhütyü kho chwiryülo, tson-o a-le Pitor hyushü ntsin sogü dunlo.

⁴¹Tsontsin Pitor le a-ben keto pe a-tsüshü; tson-o a-sü solo; tson-o a-le kenshün nyu dan lo maginyu dan kolo njüo a-thyü nrhün pe anyugun tsüshü.

⁴²Lo Jopa nyu kebin nyu aphu tsü rüla sha Küla; tsügenyu temi kechon le Npugü tenyenlo.

⁴³Tsükitsü Pitor le jon kethon ki-e Jopa nyu Simon thyügi thyü kehünyu nme zen bin tinla.