Read Southern Rengma Naga ROMNYU 10 Bible Online

ROMNYU 10 - Southern Rengma Naga bible

ROMNYU 10

¹Apvünyu dan, Israel nyu dan genyu anyun leho lo Sunggigü ka hikehügü tsüle, anyugun no kenilo nda tsekethyü genyu le!

²Kechamvule anyugun le Sunggigü kipon anyugun nyun rhünsa kehü ale anyugun sha bin nyo, ai anyugun le ketsin gü tsü sha tolo mvu laso.

³Kechamvule anyugun le Sunggigü kipon keryü kentsen gü tsü shamvu lo anyugun npvü anyugun hon gü thyü pe nko binlo titseo anyugun le Sunggigü kentsen gü hensin bin mvukela genyu.

⁴Kechamvule temi ligühigüe tenyen kelogü no ntsenlo nrün genyu Khrista le tejvü gü thyüpen keshü gü so.

⁵Tsühontse Mosa ai thu pe bin njü, “Temi ligühigüe tejvü nyu thu pe bin kenjü kentsen keseri jo dan thyülo zen kehünyu le tsügü genyu rhünlo ti.”

⁶Ai ketenyen genyu chwikeryü kentsen gü le hihontse zo hünyo: “Nle n npvü nnyun ki, segü le tsangge külo gwa tila?” (a-kon le segü le Khrista zen tsenryü mon).

⁷Nmvu ai, “Segü le tekhwün kentsun gü nyu yü mon?” (a-kon le segü le kesinyu dan nyu Khrista zen soryü mon), tsonkethyü zo nyalo.

⁸Ai kentsen tsügü le nyu zoni hü nla? Jo tsügü le nkhoka bin, nmün nyu bin, lo nnyun ki bin nyo, tsüle ale sen-o me senthyü kehü ketenyen jo gü le.

⁹Tsüle, “Jisu lope Npugü,” letse kethyü nmün nyu zoshwilo, lo Sunggigü le kesinyu dan nyu a-thyü nrhünnilo la tsekethyü nnyun nyu tenyenlo yatselo nle kenikelo hyu loti.

¹⁰Kechamvule ntsenlo nrün genyu temi le anyun pe tenyenlo hü, lo kenikelo hyulo nrün genyu a-mün pe zoshwilo kehü genyu.

¹¹Ketsinlesü le hihontse zo hünyo: “Temi ligühigüe a-tenyen kelogü le kejopvüla loho.”

¹²Judanyue lo Juda kemvunyue kecha thyülo ho, kechamvule Sunggigü le temi aphu so Npugü lo a-le kenya khipe a-ka hi kehü dan aphu tsü kehü genyu.

¹³Ketsinlesü le hihontse zo hünyo, “Temi ligühigüe Npugü zen sen-o hi kehü gü le kenilo ti.”

¹⁴Ai anyugun le dihontse tenyen kemvu gü ka hilo mon? Lo anyugun le dihontse a-khwen nyülo kemvugü tenyenlo mon? Lo mele zope nsenthyü shü mvu yatselo dihontse a-khwen nyülo mon?

¹⁵Lo lilonyu nishü mvu yatselo dihontse jolo gü pe senthyü shü lo mon? Tsüdan rüla thu pe bin kenjü le hihontse, “Jolokegwa sen keryü nyu pha le ditsüki thyü zegwa la?”

¹⁶Ai temi aphu Jolokegwa tsügü tsü senlo mvu laso. Kechamvule Isaya ko zo, “Npugü segü le agun jo tenyenlo la?”

¹⁷Tsühontse senkethyü jo kenyü nyu ketenyen le chwiryü hü lo senkethyü jo kenyü tsüle Khrista rüla jün kezo.

¹⁸Ai ale shünshü kebin le, anyugun le nyülo mvu le? Anyugun le nyülo laso- kechamvule ketsinlesü le hihontse zo: “Anyugun khwen le kazü aphu sha gun laso; lo anyugun jo le kazü keni keti nyu sha gun laso.”

¹⁹Lo ale shüni ti, Israel nyu le tsü shamvule? Mosa le zoni shü: “Ale hagun no a-keda kendi temi dan me shwipe hagun yhüthyü ti; lo temi thasha kemvu dan me genyu hagun no hagun nyun kenta thyüti.”

²⁰Lo Isaya ai peche sao hihontse zo, “Nduka a fü hü kemvunyu le a hyulo laso; nduka a rüla ketsonyü hü kemvu dan ale akhi pe hishü laso.”

²¹Ai Israel nyu dan genyu we a-le hihontse zo njü, “Me jo zen hü kemvu, lo me nyhen zin kehü temi dan ka we jon gwün tse aben shwen pen-o anyugun khwe zin bin nyo.”