Read Southern Rengma Naga ROMNYU 11 Bible Online

ROMNYU 11 - Southern Rengma Naga bible

ROMNYU 11

¹Lo ale zoti: Sunggigü le a-npvü a-temi dan khela se ole? Nmvu shü! Kechamvule ako Abraham tsipwen Benjamin kami nyu yhun chwikeryü nme le.

²Sunggigü le a-temi a-le nduka sha kehü dan khela mvu. Nmvu ai ketsinlesü le Elijaj rüla zope bin kenjü hagun le shamvu ole? A-le Sunggigü ka Israel nyu genyu kenyo kethyü le hihontse:

³“Npugü, anyugun le nle nikeshü sidyükeshanyu dushvu bu laso, a npvü a nsen gwünzin laso; lo anyugun le a dushvula titse a fü bin nyo.”

⁴Ai tsüka Sunggigü le dihontse a-jo kenishü la? “Nkhün tsügü Baal rüshvu kemvu ale temi yie tsenyü ntsen pe bin njü zun, tson amon!”

⁵Tsühontse hijonka ai shwikenjün genyu kejükelo temi dan me nsen bin zun.

⁶Lo shwikenjün genyu, tselo thatho genyu mvula so; tson kemvu we shwikenjün lope shwikenjün letse mvu lati.

⁷Tsonlo nyuthyü mon? Israel nyu le fü kehü gü anyugun le tsügü hyulo mvu laso; ai kejükelonyu dan le tsügü tsü hyulo laso. Lo a-sen dan nyun thyü pe rü laso.

⁸Tsüdan rüla thu pe bin kenjü le hihontse, “Sunggigü le anyugun nyun thyü npin laso, ryü nthu keti ai anyugun yhütyü no tha hyu nya lotse lo anyugun nyetin no tha khwen nyü nya lotse laso.”

⁹Lo David ai zo kethyü le hihontse, “Anyugun keho no anyugun nse kenjü lo anyugun kebin thyülo; anyugun no chela, anyugun shaja hyulo!

¹⁰Anyugun yhütyü no zünla, tson-o tha hyu nyalo; anyugun sen no kethonthen teren tse tinla lo.”

¹¹Lo ale ketso shü kebin gü le: anyugun le anyugun pha nsü kela hontse che kelai se ole? Nmvu shü! Ai anyugun kemu genyu kenikelo khipe Judakemvunyu tsü kela gwünzin, tson-o Judanyu no anyugun yhüthyü lo nrün genyu.

¹²Anyugun le mu kela genyu kazü temi aphu thyü pe nnya shü lo anyugun le che kela genyu Juda kemvunyu thyü pe nnya shü, tsonlo Judanyu aphu sinlo yatselo ditsülaki thyü jochü hyu chon kvulo mon!

¹³Lo ale hagun Judakemvunyu dan ka zo hünyo: Ale Judakemvunyu kipon apostel thyü kebin hontse, ale higü thyü ngonshü hünyo.

¹⁴Tsügü tsü le a npvü a temi dan rhikeyhun pe anyugun peha no a-yhüthyü lo njüo kenikelo hyulo nrün genyu.

¹⁵Kechamvule anyugun khe kela genyu kazü aphu no Sunggigü zen kengü gwalo yatselo, anyugun zen nikelo we kesinyu thyü nrhünni kethyü gwünzin mvu ti ole?

¹⁶Dan me nyu keridan keni kecha thyü pe Sunggigü kipon shülo gwala yatselo tsügü dan aphu tsühontse logwa; lo senbin nme a-me gü keni kecha thyü pe Sunggigü kipon shülo gwala yatselo a-ro dan ai tsühontse logwa.

¹⁷Ai a-ro peha boryüla njüo, hagun tehen oliv sen ryüo a-bin nyu queshü, tson-o oliv zü a-me nyu hyukelo gü kenjün kelo gwünzin.

¹⁸A-ro boryü kela dan ge ketekho nya; nle ketekho tiya tselo nle n npvü njwi gü le npvü bin mvule, a-jwi gü le npvü kebin rüchünlo nye.

¹⁹Lo nle a khisen gü quenlo nrün genyu a-ro peha boryü laso, tson zo soti.

²⁰Tsüle a-ketsin, tsüdan le tenyen kemvu genyu boryü laso, lo nwe ketenyen genyu binlo so, tsügenyu n we ketekho nya, ai nrün ho tselo.

²¹Kechamvule Sunggigü le a-ge senchwikeryü a-ro dan ai gwenla tepen mvu tse gwenla yatselo, a-le nwe ntepen ti ole?

²²Lo Sunggigü le me shwikenjün ai lo a-jo kerü ai shalo nye, chekela dan genyu we a-jo rü; ai nkipon we nle Sunggigü shwikenjün nyu bin yatselo, nwe nshwi njün ti; nmvu yatselo nko ngwenla ti.

²³Lo kechanyu ai ketenyen gü nyu binlo yatselo pe queni loti; kechamvule Sunggigü le anyugun pe quenikelo kekvu le kebin genyu.

²⁴Lo nwe oliv bin ge n nti sen gü nle bin kenye hü kemvu oliv bin kegwa ge quenlo la yatselo, kecha dan hi mhundyü a-ro thyü keryü dan we sen gü anyugun bin ketsin gü ge quenlo gwa kvu mvu ti ole.

²⁵Apvünyu ju, ale hagun no hagun npvü hagun rüchün ketekho mvulo nrün genyu, ale jo ketsin nme zope hagun hinyü bin nyo; lo tsügü tsüle Judakemvunyu dan aphu no chonsa chwiryülo kemvuthen Israelnyu dan peha nyun thyü pe rü laso.

²⁶Tsühontse Israel nyu aphu kenilo ti. Tsü rüla hihontse thu njü, “Kenikelogü le Sion ge chwiryü ti a-le Jakob tsipwen ge serikemvu tho dan tsü khi lati.

²⁷Lo a-le anyugun kemu dan khi kela siki a-le anyugun zen-o kejozen kelo le higü hile.”

²⁸Jolokegwa kipon yatselo anyugun le hagun genyu Sunggigü shwikerüchün nyu dan. Ai kejükelo kipon yatselo anyugun le anyugun bon nyu dan genyu Sunggigü kesonyu dan le.

²⁹Kechamvule Sunggigü le kenrun nyu tha pe me ketsü lo me ko kethyü a-nyun kelula hü kemvu genyu.

³⁰Nduka hagun le Sunggigü jo zenmvu hü ai ntsoka we Judanyu dan le a-jo zenmvu kela genyu hagun le a-keso pvü kelo hontse.

³¹Tsühontse hagun shwi njün keshü gü genyu tsüdan ai no shwikenjün hyulo nrün genyu anyugun le ntsoka a-jo zenmvu bin nyo.

³²Kechamvule Sunggigü le temi aphu shwi njün keti shülo nrün genyu temi aphu khipe a-jo zen kemvu nyu shüla so.

³³Hei Sunggigü kenya, a-thakesha lo a-kerüchün le ditsülaki ntsun yo no! A-le pe me nmu kehü lo a-tho dan segü le sha tilo gwa tila?

³⁴Ketsinlesü le hihontse zo hünyo, “Segü le Npugü nyu shalo la? Nmvue segü le tsin pe a-hilo gwa la?

³⁵Nmvue segü le a-no pe kethun ni nrün genyu pe a-tsü ri shüla?”

³⁶Kechamvule a-genyu lo a-le lo a-kipon tha aphu thyü külo. A-no kethonthen zankechwi gü thyülo! Amen