Read Southern Rengma Naga ROMNYU 13 Bible Online

ROMNYU 13 - Southern Rengma Naga bible

ROMNYU 13

¹Temi ligühigüe a-so ge kekvu kesenyu jo zenlo mvulo shvu, kechamvule Sunggigü ka nyu kemvu we temi nme-e me nye gon loho; lo me so ge gon kebin nyu le Sunggigü kendo genyu.

²Temi ligühigüe keda thyü kebin nyu shwirüchün yatselo, Sunggigü jo shwirüchün kehü gwünzin, lo tson kehünyu le a-npvü a-gwakemvu chün hyulo ti.

³Kechamvule tha kegwa thyü kehü nyu mvule gwakemvu thyü kehünyu no anyugun nshvu nrün dan me kethyü genyu. Nle kekvu kesen nyu kenshvu tsügü nrhilo nyülo tha kegwa thyülo; tsonlo yatselo kekvu kesen gü mhundyü nyu nle teshwe pvülo ti.

⁴Kechamvule nno gwalo titseo a-le Sunggigü lothyü kebin genyu, ai nle tha gwakemvu thyü hü yatselo nshvulo chi, a-le shaja pe me tsüti tsekethyü tsüle ketsin, a-le Sunggigü lo thyüo Sunggigü nyun kekhü pe gwakemvu thyü kehünyu tsüti.

⁵Lo hagun Sunggigü nyun kekhü genyu ntimvule hagun nyun nyu kegwa keshvu shalo kehü genyu a-jo zenlo mvulo shvu.

⁶Tsükon ka hagun le khajana-e shü hünyo, lo tson-o kekvu kesen dan le Sunggigü lo thyüo anyugun tho thyü hünyo.

⁷N khajana-e lo n kanyü kecha-e anyugun ketsü kho pe tsülo, lo nshvu kezü gü nshvulo, lo rühvu kezü gü rühvulo.

⁸Khinyunyu keso kethyü nyeki temi nme-e pu pvünya; a-kazon kazin so kehü nyu le tejvü gü zen penlo hünyo.

⁹Kechamvule, “Keyüla nya, me dushvu nya, rühu nya, tha tepen nya,” jo hidan hi aphu, lo kecha le kebin dan-e sin tseo jo nme nyu chwiryü kethyü gwünzin; lo tsügü tsüle, “N kazon kazin so pe n npvü nkeso hontselo.”

¹⁰Ligühigüe a-kazonkazin so kehünyu le thyüzüla hümvu. Tsügenyu keso le tejvü gü zen pen shü hü nyo.

¹¹Hagun le gwünkho higü hi shabin ti, tsügütsü le hagun le zhü kebin nyu chonkelo gwünkho so. Kechamvule nle ntsoka we tenyenlo kerika nyeki kenikelo kho nni kvu kelasi genyu.

¹²Kezün jon kechon gü le güla so, lo tsangkeben ti güzhü laso, tsügenyu ngun kezün tho dan khelao keben ronye thyü pvülo nu.

¹³Ngun nzeü, nmvue kega, nmvue me shwi pe nyhüthyü mvuo keben nyu yhun kehünyu hontse njüo yhunlo nu.

¹⁴Ai hagun Npugü Jisu Khrista teri ronye dan khipvülo, lo hagun thyümin kenyü yhüdyü kipon thyü titseo rüchün kehü khela lo.