Read Southern Rengma Naga ROMNYU 14 Bible Online

ROMNYU 14 - Southern Rengma Naga bible

ROMNYU 14

¹Ketenyen nyu kvu kemvunyu nkhin nyao a-zenlo.

²Temi nme le a-le tha aphu tyülo gwa tse tenyen bin ai ketenyen nyu kvu kemvu gü we hen nti tyü hü ti.

³Tsügenyu thyü, lo tha lihi-e tyü kehügü no tyü hü kemvugü sala nya, lo tyü hü kemvu güe tyü kehügü nkhin nya, kechamvule Sunggigü le a-zenlo kela genyu.

⁴Nle segü letseo me gonyu nmu hü nla? A-le solo metse chela metse Npugü le ti. Ele, a-le solo ti; kechamvule Npugü le a-senthyülo kegwa kekvu le kebin genyu.

⁵Temi nme le tsangkeben jon nme nyeki tsangkeben jon kecha nme rühvu kvu hü nyo; lo kechanyu nme le tsangkeben jon aphu rühvu ketunkü hü. Temi ligühigüe no a-nyu ki a-kezü gü thyü binlo.

⁶Temi ligühigüe a-le tsangkeben jon rühvu kehü tsüle Npugü genyu rühvu kehü gwünzin; lo ligühigüe thyü tyü kehünyu le Npugü genyu tyü kehü gwünzin, kechamvule a-le Npugü shwe kehü genyu. Lo ligühigü ai a-le tsü tyü hü kemvu gü le Npugü genyu tyü hü mvu; lo a-ko Npugü shwen hünyo.

⁷Lo ngun aphu ngun le ngun npvü n genyu rhün bin hü mvu, lo ngun npvü sila hü mvu.

⁸Tsühontse nle rhün bin ai Npugü genyu rhün bin hünyo; lo nle sila ai Npugü genyu sila hünyo. Tsügenyu nle rhün-e sie Npugü hon le.

⁹Kechamvule Khrista no kerhün nyu lo kesinyu metse Npugü thyü titseo a-no sila ai rhünnilo laso.

¹⁰Ai nwe nyuthyüo n sikezen gü nmu hü nla? Lo nko nyuthyüo n sikezen gü sa hü nla? Ngun aphu Sunggigü le ketso kethyü bin mhundyü nyu so küti.

¹¹Tsü rüla hihontse thu njü nyo, “Ale rhün kehü hontse temi ligühigüe a mhundyü nyu khosen küti, lo temi aphu a-mün pe Sunggigü shwen küti.”

¹²Tson-o ngun nme me tsekethyü Sunggigü mhundyü nyu nnpvü nrüla henshwi küti.

¹³Ngun khinyunyu nmu nya, tsonkethyü gü mvule n sikezengü phakensü nmvue tsonkekhin thyüla mvu titse kethyü rüchün tonlo tinu.

¹⁴Tha nme-e a-npvü nshünmvu kethyü ndi, ai temi ligühigüe tsüle nshün mvu tse rüchün kehü gü genyu nshü mvu laso tsekethyü ale Npugü nyu tsü sha laso.

¹⁵Keshanyulaka n ketyüketsü genyu n sikezen gü no a-nyun gwamvula yatselo nle keso jvü gü nyu bin mvu laso. N ketyüketsü genyu Khrista le a-genyu si kenjü gü bonshvu laso.

¹⁶Tsügenyu ngenyu kegwa gü tsü zo nshvula nya.

¹⁷Sunggigü keda le ketyüketsü gü mvule Kenshün Kapu nyu kentsen keseri lo nyun kebwen lo nkenyü kethyü gü genyu.

¹⁸Tsühontseo Khrista lothyü kehünyu le Sunggigü mhundyü nyu a-zü lo temi-e tsünyu tenyen ngwa hünyo.

¹⁹Tsügenyu ngun dihontselo kengü gwalo tiyo lo khinyunyu thyü ngwalo tiyo tsü fü tenge lo tinu.

²⁰N ketyüketsü genyu Sunggigü tho bonshvula nya. Ketsin, tha aphu nshün le, ai ketyüketsü genyu me tsonkekhin thyü kela tsüle a-zümvu.

²¹Thyü tyü kemvu nmvue zu tsü kemvu nmvue tha lihi thyüe n sikezen nyu no a-pha nsü kemvu tsüle njü le.

²²N ketenyen gü tsüpe Sunggigü hai jaka shü sen binlo; ligühigüe a-le njü letse kebin gü tsü rüchün pe a-npvü a-nmu kemvu nyu le jochü kepvü ketsin le.

²³Ai temi ligühigüe kenyun hvuo tyülo tsüle mula hünyo. Kechamvule a-le ketenyen nyu tyü kemvu genyu, lo tha lihi-e ketenyen nyu kemvu tsüle kemu.