Read Southern Rengma Naga ROMNYU 15 Bible Online

ROMNYU 15 - Southern Rengma Naga bible

ROMNYU 15

¹Ngun nko kebin nyu le n npvü nkenyü yhüdyü thyü tinla nyao kvu kemvunyu khvü nolo zü.

²Ngun ligühigüe n kazonkazin thyü ngwa kelo rüchün-o tsünyu kenyü thyülo nu.

³Tsühontse Khrista-e a-npvü a-kenyü yhüdyü thyü mvu; ai tsü rüla hihontse thu nnjü, “Mele nrho kethyü dan tsüle age chetsüryü la sele.”

⁴Kechamvule nduka thu pe bin kenjü ge nsenthyülo nrün genyu, tson-o ketsin lesü then-o kelukenyonla mvu, lo nnyun njüo n sidyü no binlo nrün genyu.

⁵Kelukenyon hükemvu lo nnyun thyü njüshü kehü Sunggigü no hagun khinyunyu nyun thyü kerhün pe Khrista Jisu nyun hontse shü kelo gü thyülo.

⁶Tson-o hagun no kenyunrhün lo kejorhün-o n gun Npugü Jisu Khrista a-pvü Sunggigü zankechwi thyülo nrün genyu.

⁷Sunggigü no zankechwi thyülo nrün genyu Khrista le hagun zenkelo hontse hagun ko khinyunyu zenlo.

⁸Lo Khrista le nduka nbon nyu juka tha zope bin kenjü dan tsüle a-ketsin tsekethyü nno sha, lo gikerü tho gü tsü thyüo Sunggigü joketsin gü pe me hishü.

⁹Tson-o Judakemvunyue no Sunggigü shwikenjü nyu a-shwenlo nrün genyu. Tsü rüla hihontse thu njü, “Tsügenyu Judakemvunyu dan nyu ale nshwe ti; lo nzan nyu lüthyü ti.”

¹⁰Lo a-le zoni kethyü le; “O hagun Judakemvunyu ju a temi dan zen-o hagun sherhünlo!”

¹¹Lo tsüsika ko, “Hagun Judakemvunyu ju aphu, Npugü shwenlo; lo temi aphu a-shwenlo!”

¹²Lo tsünyeki-e Isaya le zo-o, “Judakemvunyu so keda thyü nrün güle; Jesse jwi ge soryü ti, lo Judakemvunyu ju le a-genyu sidyü le binlo ti.”

¹³Kenshün Kapu kekvu nyu hagun sidyü no chonsalo nrün genyu nsidyü füshü kehü Sunggigü no ketenyen genyu shekerhün lo nyun kebwen pe hagun kesü thyüshü kelo gü thyülo.

¹⁴Lo a pvünyu ju, hagun jvü kegwa pe hagun süpvü kehü, lo thakesha aphu pe hagun süpvü kehü, lo khinyunyu senzhülo kegwa ale hagun rüla sha pe anyun bwen laso.

¹⁵Ai Sunggigü le shwikenjün khipe a ketsü honntse hagun no rüchün nilo nrün genyu thakon peha ka ale peche sa tse lesü higü thu pe hagun tsüshü bin nle.

¹⁶Kechamvule ale Judakemvunyu dan nyu Khrista Jisu lotho thyülo Sunggigü peshükeda thyüo Judakemvunyu khipe Sunggigü tsüo Kenshün Kapu no thyü nshün pe lolo kekü thyülo nrün genyu.

¹⁷Lo Khrista Jisu genyu ale Sunggigü lotho kethyü genyu ketekholo kegwa kon le bin nyo.

¹⁸Lo Judakemvunyu dan no ajo zenlo nrün genyu Khrista le age bin-o thyükeshü dan nyeki ale thakecha nme-e zoshü nshvu laso.

¹⁹Lo tsüle jokezo nyu lo thatho nyu, tha zansü nyu lo ndunkethyü tho kekvu nyu, lo Kenshün Kapu kekvu nyu thyü kelo le; tson-o Jerusalem lo tsü temhun gü Illirikum keti Khrista jolokegwa gü pe jünzo keshü.

²⁰Lo ale me kechanyu le khwen kenjü bin ge ka thyü mvu nrün genyu himhundyü Khrista zan shamvu hü kethyü bin ki jolokegwa gü pe jünzo shü nyü bin nyo.

²¹Tsü rüla hihontse thu njü, “A-rüla pe anyugun ka zoshü mvu shü kethyü ju no a-hyuti, lo anyugun le a-rüla nyülo hümvu shü kethyü gü tsü shalo ti.”

²²Higenyu ale hagun ki keryü tson khinla la tse zin hünyo.

²³Ai ntsoka we ale hiden zin tha kethyüi bin kendi si genyu lo chen kethon ki hagun ki ryü nyü bin kehü genyu.

²⁴Ale Spain ki gunkejü ka hagun ka nsen-o hagun hyushü nyü bin nyo, tson-o jon keshanyu hagun zen kengüo asherhünlo nyü bin nyo.

²⁵Ai nthu gwün we ale kenshün nyu ju keche shü nrün tho gü tsü sen-o Jerusalem ki nsin jü laso.

²⁶Kechamvule Makedonia lo Akaya nyu kebin nyu dan le tha khipe Jerusalem nyu kebin kenshün nyu dan rhokedyü ju tsüshü nyü kela genyu.

²⁷Anyugun le tsühontse kethyü tsüle anyugun kenyüla ketsin le, anyugun le tsüdan pupvü bin nyo, kechamvule Judakemvunyu jule anyugun zen-o Kapu jochü kenjünlo yatselo anyugun ko kazü kanyü kenya dan kecheshü mvulo shvu kethyü genyu.

²⁸Tsügenyu anyugun le kequen penlo yatselo ale khipe tsüshüla njüo ale hagun ka ryüo Spain ki gunti.

²⁹Lo ale hagun ki ryülo Khrista jochü kesükela kethyü nyu ryü titse kethyü ale shabin nyo.

³⁰Apvünyu ju, ngun Npugü Jisu Khrista lo Kapu gü le khikeshü keso gü nyu hagun no azen kengüo agenyu Sunggigü ka kehithyü tenge binlo tse ale hagun ka hishü bin nyo.

³¹Lo Judia nyu kebin tenyen kemvu ju ben nyu a kenishülo tsekethyü lo Jerusalem nyu Sunggigü temi dan no atho genyu anyugun sherhünlo nrün genyu hagun kehithyü binlo.

³²Tson-o Sunggigü kendo yatselo ale a sherhün sa tse hagun ki ryü ti lo hagun zen-o anyun bwenye lo nrün genyu.

³³Nyun kebwe khishü kehü Sunggigü no hagun aphu zen bin kelo gü thyülo. Amen.