Read Southern Rengma Naga ROMNYU 16 Bible Online

ROMNYU 16 - Southern Rengma Naga bible

ROMNYU 16

¹Ale Kenchrea nyu kehun lotho thyü kehü ngun lügi Foibe rüla pe hagun ka zoshü bin nyo.

²Npugü zan nyu a-zenlo, Sunggigü temi letse yatselo tsonlo mvulo shvu, lo a-le tha lihi-e sen mvuloshvu bin yatselo khipe a-tsüshü; kechamvule a-le temi kechon keche ryü, lo ako a cheshü le.

³Khrista Jisu lotho nyu azen kengüo lotho thyü kehü Priskila lo Aguila au kelushü lenye.

⁴Au le a genyu au phoue tepen mvu tseo, a nti mvu ai Judakemvunyu kehun aphu au chenno sa bin nyo.

⁵Lo au kanyu kehun kehü dan ko kelushü le nye. A keso a pvü gü Epaineta, Asia nyu Khrista tenyenlo keritsin gü kelushü le nye.

⁶Maria kelushü le, a-le hagun genyu a-yhenthyü sa le.

⁷A kaminyu lo azen kengüo dothyü kethyü Andronika lo Junia au kelushü le, apostel nyu dan nyue mele au shasa, lo au le a mhundyü khristian thyülo laso.

⁸Khrista nyu kengü kehü a keso a pvügü Ampliata ko kelushü le.

⁹Khrista lotho nyu ngun kengüo lothyü kehü gü Urbano lo a keso a pvügü Staki ko kelushü le.

¹⁰Khrista sohü ketsin tse sha kela gü Apele kelushü le, Aristabulo nyu kaminyu dan ko kelushü le.

¹¹Ngun temi Herodion lo Narcisus nyu kanyu khristian nyu dan kelushü le.

¹²Npugü lothyükehü Triphaena lo Trifosa hvu kelushü le, lo Npugü genyu thathyü sa keshü gü Persi kelushü le.

¹³Npugü lotho thyü sa kehü Rufu lo a-jvü au kelushü le; tsügi le a lope a-nyu hontse thyü hü le.

¹⁴Asikritos, Flegon, Hermis, Patrobas, Hermas lo anyugun zen kehü khristian nyu dan aphu kelushü le.

¹⁵Filologos lo Julia Nerius lo a-lügi, lo Olimpas lo tsüdan zen kehü Sunggigü temi dan aphu kelushü le.

¹⁶Tsasikezen nyu kekenbo jvü sen-o khinyunyu kelushülo. Khrista kehun aphu hagun kelushü bin nle nye.

¹⁷Apvünyu ju, senyu le hagun le himhundyü ki shalo kela ketenyen gü zen kentsun lo me pvükho-o me tson kekhin thyü hü yo le tsünyu tsü shabin lo, lo tsünyu nrhilo.

¹⁸Kechamvule tsühontse thyü kehünyu le Npugü Khrista lothyü bin mvu, ai a-npvü a-gin fü kehü gwünzin. Anyugun jo gwasa tse, lo jozo shünshvu shülao a-nyun kenjü nyu ju sala hünyo.

¹⁹Hagun le jolokegwa jo gü zen kehü temi ligühigüe nyülo laso, tsügenyu ale hagun rüla rüchün a sherhün le. Ale hagun no nyu le gwa yo tsükipon we thasha lo, ai gwakemvu kipon we rhumvu bin nyü.

²⁰Lo nyu kebwen khishü kehü Sunggigü le thonsa mvutse satan boren pe hagun phasin shüla ti. N gun Npugü Jisu Khrista shwikenjün gü no hagun zen bin kelo gü thyülo.

²¹Azen kengüo lotho thyü kehü gü Timothi le hagun kelushü le, lo Sosipater nyugun ai le nye.

²²Lesü higü kethu gü, ale Tertios, ako Npugü zan nyu hagun kelushü le.

²³Asin gü, Gayas, a-ka nyu kehun kehü ju le hagun kelushü le lo rünyi hinyu kenya kesen gü Erasta lo ngun sikezen gü Quartos ko hagun kelushü le.

²⁴Ngun Npugü Jisu Khrista shwikenjün gü no hagun aphu zen bin kelo gü thyülo. Amen

²⁵Ngun Sunggigü zan shwenlo nu! Ale Jisu Khrista rüla jolokegwa jünzo kehü hontse lo ketsin gü ndukanyu kebu kenjü gü henshwi keshü hontse a-le ketenyen nyu hagun ntsen pe hagun no nnun mvu binlo gwa.

²⁶Ai ntsoka we kethonthen Sunggigü jo gü genyu sidyükeshanyu ju lesü nyu ketsin gü tsü khinshye pe tsipwen aphu hishü laso, tson-o temi aphu no tenyenlo njüo zenlo nrün genyu.

²⁷A-npvü tha aphu keshagü, Sunggigü no Jisu Khrista genyu kethonthen zankechwi gü thyülo! Amen.