Read Southern Rengma Naga ROMNYU 2 Bible Online

ROMNYU 2 - Southern Rengma Naga bible

ROMNYU 2

¹Tsügenyu, hire temi, nle segü yole, me nmu kehü nle thame kezoi bin ndi, kechamvule nle me kechanyu nmu hü yatselo n npvü n nmu kehü gwünzin, nle me nmu kehü gü n npvü ai me hontse thyü kehü genyu.

²Lo Sunggigü le temi tsühontse kethyünyu nmu zü tsekethyü nle shabin nyo.

³Tsügenyu, hire temi tsühontse thyü kehünyu nmu kehügü nle n npvü tsühontse thyü hüo Sunggigü jo kekera gü nrhilo titse rüchün hü nle?

⁴Nmvue nle Sunggigü shwikenjün kegon lo nyhenhi kethyü lo A-nyun kethon tsü shamvu ole? A-shwikenjün gü tsüle ntson tsin pe nno nnyun kelulo nrün gü shamvu hü le?

⁵Ai nnyun kerü le nnyun kenjünthyülo kemvu genyu Sunggigü le kenjü nyu me nmu kesoka, nyunkekhü tsangkeben gü genyu n npvü nyunkekhü kequen kebin gwünzin.

⁶Kechamvule Sunggigü le temi nme me tse a-tho hontse a-chün thyü pe tsü nrün genyu.

⁷Nyhenhio zankechwi, ndila lokeho lo teshwe füo thakegwa thyü kehünyu le kethonthen kerhün pe tsüti.

⁸Ai a-npvü a-so lo ketsin gü jo zen mvuo ketsin kemvu jo zen kehü dan we nyunkekhü lo nyunkenta pe tsüti.

⁹Judanyu no ri lo Griknyue sin tseo temi ligühigüe gwakemvu thyü kehünyu kenjün kethyü lo nyungwakemvu no a-chün thyü pe tsüti.

¹⁰Ai Judanyu no ri lo tsüsika Griknyue sin tseo zankechwi lo teshwen lo nyukebwen pe thatho kegwa thyü kehünyu tsüti.

¹¹Kechamvule Sunggigü le temi aphu so ketun kehü genyu.

¹²Temi ligühigüe tejvü kendinyu kemutho thyü kehünyu le tejvü kendi nyu anyugun no nkela ti, lo temi ligühigüe tejvü le bin ai mu hü yatselo tejvü nyu anyugun jokera ti.

¹³Kechamvule Sunggigü mhundyü nyu we tejvü jo nyü kehü dan mvule tejvü jo thyü lo zen kehünyu nti le kentsen nyu thyü kehü genyu.

¹⁴Lo Judakemvunyu tejvü kendinyu dan le anyugun nyunki tejvü nyu thyü mvulokeshvu dan thyü kehü, tejvü ndi ai tsüle a-jvü thyü laso.

¹⁵Tson-o anyugun le tejvü nyu sen kezü dan pe anyugun nyun ge thu kenjü tsinshü hünyo, anyugun nyun le tsü lope jünzoshü hünyo, tson-o anyugun kerüchün nme le anyugun nmu lo kecha nme le anyugun le njü letse hü.

¹⁶Tsangkeben jon tsünyü tsü ale jolokegwa gü nyu kezo hontse, Sunggigü le Jisu Khrista no temi rüla tesü tebu kebin dan tsü kera ti.

¹⁷Hire, nle Judanyu letse-o tejvü gü tenyen hü lo Sunggigü temi letseo ketekho bin logwa.

¹⁸Lo nle tejvü gü nyu thashalo-o Sunggigü kendo sha, lo thakegwa dan tsüle gwa letse hü ado;

¹⁹lo nle a-yhütyü keponyu tsonketsin nme letse lo kezün nyu kehünyu dan mah kenben nme thyü,

²⁰lo nle tejvü gü nyu ketsin gü shalo-o kepin nyu dan no thasha kelo nme thyü lo nyuhonyu dan senkethyü nme thyü hü ado.

²¹Tsügenyu me senthyü kehü gü, nle n-npvü nsenthyü hü mvu ole? Nle meno, “Rühu nyalo,” tseo me ka zokehü gü nle rühu hü ole?

²²Nle meno, “Keyüla nyalo,” tseo me ka zokehü gü nle keyüla hü ole? Nle teromen kezü ntsü kehü gü, nle teromen kerüshvu kanyu tha rühu hü ole?

²³Nle tejvü sen hü nle tseo ketekho kehü gü, nle tejvü gwünrho-o Sunggigü rühvu kemvu tho thyü hü le?

²⁴Kechamvule ketsin lesü le zo, “Hagun genyu Judakemvunyu dan nyu Sunggigü zan ntsü tin laso.”

²⁵Lo nle tejvü gü zen kehü we nge gikerü le a-kechwi le bin nyo, ai nle tejvü gwünrho hü yatselo n gikerü le girükemvu thyüla hünyo.

²⁶Tsügenyu girü kemvunyu nme le tejvü nyu thyümvulo keshvu dan thyü, lo zen hü yatselo a-girü kemvu lope gikerü hontse mvu ti ole?

²⁷Lo nle thu pe bin kenjü tejvü le bin, lo girü pvülo tse ai tejvü gü gwünrho hü yatselo, a-girü kemvu tejvü zen pen kehünyu nme le n nmu lati.

²⁸Kechamvule tegwen ki nti Judanyu kethyü le Judanyu ketsin mvu, nmvu ai thyü ge gikerü nti we gikerü ketsin kemvu genyu.

²⁹Ai nnyunki Judanyu le Judanyu ketsin, lo a-nyun ki gikerü le gikerü ketsin, tsüle thu pe bin kenjü tejvü gü nyu mvule Kapu kipon, temi tsünyu kegwa le temi ka nyu kemvu, ai Sunggigü kipon hyulo.