Read Southern Rengma Naga ROMNYU 3 Bible Online

ROMNYU 3 - Southern Rengma Naga bible

ROMNYU 3

¹Tsonlo Judanyu kethyü le nyu kegwa le bin nla? Nmvu ai gikerü genyu nyu kechwi le bin nla?

²Ligühigü ai a-kechwi le bin sa; keda tsingü le hi: Sunggigü jo gü pe anyugun tenyen shü kela genyu.

³Tsonlo tsüdan peha le joketsin zomvu kela genyu Sunggigü we thyü pe no joketsin zomvula logwa ole?

⁴Tsonlo nrün ndi, temi aphu kenkunyu thyü hü yatse ai Sunggigü we no joketsin gü thyülo mvulo shvu. Tsü rüla hihontse thu njü, “Njo kezo nyu meno nle joketsin zohü nletse mvuloshvu; lo mele njün kera kegun ka nle me nyeki kvulo mvuloshvu.”

⁵Ai n ntsenseri kemvu genyu Sunggigü kentsen sha petsülo yatselo, nle nyu zo semon? Sunggigü le shaja pe me ketsü tsüle a-zümvu ole? (Ale temi kerüchün hontse zoti.)

⁶Tsonlo nrün ndi, kechamvule tson yatselo dihontse Sunggigü le temi jün keralo ti la?

⁷Ai a kenku genyu Sunggigü joketsin kezo sha ntsen pe a-zankechwi thyülo hü yatselo, tsonlo nyu genyu meno a nmu hü nla?

⁸Lo thakegwa no chwiryülo nrün genyu gwakemvu thyü nu, tse ale zo letseo pehale aka zo kehü hontseo jo tsühontse kethyü zo kehünyu nmu zü.

⁹Tsonlo dihontse mon? N gun Judanyu le me nyeki gwakvu ole? Nmvu shü, ale n güka Judanyu metse lo Griknyu metse aphu kemu hensin binla sele tse zoshü so.

¹⁰Ketsinlesü le hihontse thu njü nyo: “Temi kentsen mi ndi laso; nme ai ndi laso

¹¹temi thakerüchün me ndi, Sunggigü kefü mi ndi laso.

¹²Anyugun aphu tson gwünzü laso; temi thakegwa kethyü mi ndi so; nme-e ndi laso.

¹³Anyugun jo dan le sika kepe kü hontse; lo anyugun yi le me kesa jozo hünyo, lo anyugun mün nyu peri tseyi le bin;

¹⁴Anyugun mün nyu shochün shokhü le süpvü.

¹⁵Me dushvu titse kethyü anyugun pha shwe whüwhü tse gwünzin;

¹⁶anyugun le kehü tson nyu kenke kenmhü lo kenjün kethyü nti.

¹⁷Lo anyugun le nyun kebwen tsongü shamvu;

¹⁸lo anyugun mhundyü ka Sunggigü shye kenshvu ndi.”

¹⁹Tejvü gü nyu tha zokeshü dan le tejvü hensin kebin nyu dan ka zo kebin gwünzin tse kethyü ngun le shabin nyo, tsügenyu temi aphu jo (mün) khinla hünyo, tson-o kazü temi aphu no Sunggigü mhundyü nyu kemu nyu thyüla nrün genyu.

²⁰Tsügenyu tejvü kezen genyu temi nme-e a-mhundyü nyu kentsen nyu thyülo hümvu; kechamvule tejvü genyu kemu rüla shalo kehü gwünzin.

²¹Ai ntsoka we Sunggigü le temi thyü ntsenlo kehü tesha shü laso, lo tsüle tejvü genyu mvu. Tejvü gü tsüle sidyükeshanyu ko tsü jünzo ryü.

²²Tsügü tsü le Sunggigü kentsen le Jisu Khrista ketenyen genyu tenyen kelonyu aphu ge ryü hünyo. Kechamvule temi ligühigüe kecha thyü loho.

²³Temi aphu mu laso, lo Sunggigü zankechwi gü timvu laso.

²⁴Ai Jisu Khrista ge kenikelo khikeshü Sunggigü le n shwikenjün genyu kenrun nyu kentsen nyu thyülo hü nyo.

²⁵Temi ligühigü ai tenyenlo yatselo tsü hyulo titse kethyü genyu Sunggigü le Jisu zi pe kerüshvu nme thyüshü. Tsügü tsü le Sunggigü le a-nyunthon-o nduka mu kehü dan jüshüo a-kentsen tsinshü.

²⁶Tsühontse ntsoka ai a-le ntsen letse kethyü tsinshü hünyo. A-le ntsen lo Jisu Khrista tenyen kehünyu dan thyü ntsen shü kehü gü tse kethyü meno shalo nrün genyu.

²⁷Tsonlo n gun le ketekho keloi bin le dikipon bin nla? Ndi! Tejvü genyu ole? Ntho genyu la? Nmvu, ai ketenyen jvü gü genyu.

²⁸Tsügenyu temi le tejvü genyu mvule ketenyen genyu kentsen nyu thyülo hü nyo tsekethyü n gun le sha tsentsü laso.

²⁹Sunggigü le Judanyu dan nti Sunggigü ole? Judakemvunyu we sin mvu ole? E, Judakemvunyu-e Sunggigü le.

³⁰Sunggigü le nme, lo a-le gikerünyu metse lo girü kemvunyu metse tenyenlo yatselo tsünyu thyü ntsenlo hünyo.

³¹Tson yatselo nle ketenyen higü genyu tejvü gü khela se ole? Nmvu, nne tejvü gü thyü nkoshü kehü gwünzin.