Read Southern Rengma Naga ROMNYU 4 Bible Online

ROMNYU 4 - Southern Rengma Naga bible

ROMNYU 4

¹Lo n gun le n gun bon Abraham rüla nyu zo mon? A-le nyu hyulo la?

²Kechamvule Abraham le a-npvü a-tho genyu ntsenlo yatselo, a-le a-npvü ketekho lo gwa; ai Sunggigü we a-shwen loho.

³Ketsinlesü le nyu zohü nla? “Abraham le Sunggigü tenyenlo, tsügenyu a-lope kentsen nyu letse kolo.”

⁴Lo tha kethyünyu le tha hyulo ai tsüle a-shwikenjün genyu tse hümvu, ai tsü le a-shün.

⁵Tson ai tha nme thyü keshü genyu mvu, ai ntsen kemvu nyu thyü ntsenshü kehü gü tenyenlo yatselo a-ketenyen genyu a-le ntsen letselo hünyo.

⁶Tsühontse ntho genyu kemvu ai Sunggigü le nthyü pe kentsen nyu thyülo kehünyu phou kengvü rüla David ai nduka hihontse so:

⁷“Sunggigü le a-thyükezü jü pe tsü kelanyu, lo a-kemu henlo kelanyu le aphou kengvü ketsin le!

⁸Sunggigü le a-lope kemunyu letse lo kehonyu le aphou kengvü ketsin!”

⁹Kengvü ketsin higü hile gikerünyu genyu nti le girü kemvunyu genyu ko sin la? Abraham le ketenyen genyu a-lope kentsen nyu letse kolo. Tson yatselo dihontse a-lope kentsen nyu letse kolo la? A-girü kelo siki le a-girü kemvuka la? Tsüle a-girü kelo siki mvu ai a-girü kemvu ka.

¹⁰Lo a-le a-girü kemvuka nyu ketenyen genyu ntsen kelo mohor hontse kethyü gikerü hyulo.

¹¹Tson-o a-no girü kemvuka ai tenyenlo-o ntsen kelo hontse girü kemvunyu aphu bon thyülo nrün genyu.

¹²Tsüntimvule a-no a-girü kelo dan bon gü thyü sin; tsüdan le a-girü kelo ntimvule n gun pvü Abraham le a-girü kelo mhundyü ki tenyen-o yhun kehü hontse yhun kethyü genyu.

¹³Tson-o Abraham lo a-tsipwen dan no kazü gü lolo titse zope bin kenjü le tejvü gü genyu mvule tenyenlo-o ntsen kelo genyu hyulo.

¹⁴Tson mvuo tejvü zen kehü dan nti no kazü tsügÜ gwen ti yatselo, ketenyen le a-kon ndi laso, lo zope bin kenjü güe tha ja thyü lati.

¹⁵Kechamvule tejvü gü le nyunkekhü senryü hünyo; ai tejvü kendi bin nyu we tejvü gwünkerho-e ndi.

¹⁶Tsügenyu kenrun nyu shwikenjün ka tsekethyü shalo nrün genyu tsüle ketenyen genyu le. Lo nduka zope bin kenjü jo tsügü tsüle Abraham tsipwen aphu genyu zo tsentsü; lo tsüle tejvü zen kehü dan nti genyu mvule ngun aphu bon gü Abraham ketenyen hontse tenyen kehünyu dan ko sin.

¹⁷Tsügenyu hihontse thu njü, “Ale nthyü pe nno tsipwen kechon pvügü thyüshü laso.” Tson-o Abraham le a-le tenyen kehü gü kesi ai pe kerhün thyülo kehü, lo kendi ai pe kebin thyülo kehü gü Sunggigü mhundü nyu n gun bon thyülo.

¹⁸Ketsinlesü le kezo hontse, “Ntsi npwen no chonsa ti,” tsekethyü zo pe bin kenjü hontse a-no temi kechon bon gü thyülo nrün genyu thame tenyenlo nrün kendi ka ai a-le Sunggigü jo tenyenlo.

¹⁹Tson-o a-keyhun chen le chen tsi pen güzhü la lo Sara (a-nu) ge nyu yhunlo hoso tsekethyü siki ai a-ketenyen sünila mvu.

²⁰A-le Sunggigü jo gü tsü rüchün pe kenyunhvuo tenyenmvu lamvu, ai tenyen tsentsü tseo Sunggigü shwen bin.

²¹Lo Sunggigü le zoshü kela gü a-le thyü penshü tsentsü tse tenyen ton bin.

²²Tsügenyu a-ketenyen genyu a-le ntsen letse la.

²³Lo tsügü tsü le a-npvü a-genyu nti mvule n gun genyu ko thu njü.

²⁴N gun ai kesi nyu Npugü Jisu thyü nrhün kelogü tenyen hü yatselo n ketenyen genyu a-le nthyü ntsen loti.

²⁵N kemu genyu a-no si lo nthyü ntsenlo nrün genyu a-thyü nrhün nilo.