Read Southern Rengma Naga ROMNYU 5 Bible Online

ROMNYU 5 - Southern Rengma Naga bible

ROMNYU 5

¹Tsügenyu ketenyen ka ntsen kelo siki nle Npugü Jisu Khrista genyu Sunggigü zen-o kengügwa lola so.

²Khrista genyu nle hijonka shwikenjün bin higü nyu ketenyen nyu yüryü kelo gwünzin; tson-o nne Sunggigü ka nyu hyulo nrün nsidyü kegwa gü rüchün pe ndü nyün bin laso.

³Tsüntimvule nne kenjün kethyü nyu ai n kenyü hünyo; kechamvule kenjün kethyü genyu nyhenhi lo hü.

⁴Lo nyhenhi kelo genyu njvü gwalo hünyo lo njvü gwakelo genyu nsidyü le binlo hünyo.

⁵Lo sidyü tsüle nno kejola loho; kechamvule khipe ntsüshü kela Kenshün Kapu gü genyu Sunggigü le keso run pe n nyun nyu shükela genyu.

⁶Lo nle kvumvu kebin ka Khrista le a-gwünkho toka n ntsen njü kemvunyu sunthyüo sila so.

⁷Temi nme-e temi kentsen nyu sunthyüo sishü loho ado, temi peha le kegwanyu nme sunthyüo nshvu mvu tse si-e shü logwa.

⁸Ai Sunggigü keso le nle kemunyu thyü kebin ka-e Khrista no nphou sunthyüo si kethyü nyu tsin tsentsü pe nhi shü laso.

⁹Lo tsügenyu, nle a-zi genyu nthyü ntsen njülo yatselo, nle Sunggigü nyunkekhü gü nyu n kenilo titse kethyü le tsentsü kvu laso.

¹⁰Kechamvule nle a-shwikerüchün nyu thyü kebin ka ai A-nyugü si genyu Sunggigü zen kengü gwalo yatselo, a-zen-o kengügwa kelo siki a-le rhün kebin genyu nkenilo titse kethyü le tsentsü kvu laso.

¹¹Tsüntimvule, nle a-genyu kengügwa kelo gü Npugü Jisu Khrista genyu Sunggigü kipon n kenyü sin bin laso.

¹²Lo temi nme genyu kemu le kazü nyu ryü, tson-o a-kemu genyu kesi le ryüla, lo temi aphu mukela genyu kesi ai temi aphu ge ryüla.

¹³Tejvü le keryü mhundyü kinyu kemu le kazü nyu hü laso; ai tejvü kendi bin ki we mu letse hü mvu.

¹⁴Tson ai Adam ka gü Mosa keti kesi le temi so gon tinla, Adam le Sunggigü jo gwünrho kela hontse kemu thyüla kemvunyu dan so ai kesi le gon ryüla. Adam tsüle ryü titse kehü gü zansü nme thyü.

¹⁵Ai Sunggigü jo gwünrho kethyü gü we kenrun nyu pe nshwinjün keshü gü hontse mvu. Kechamvule temi nme le thyüzü kela genyu temi kechon le sila yatselo, tsünyeki Sunggigü ka nyu chwikeryü shwikenjün gü lo Jisu Khrista nshwikenjün genyu kenrun nyu khikeshü gü we temi kechon kesükela thyü kvu.

¹⁶Lo kenrun nyu khipe ntsü keshü gü le temi nme le mu kelagü hontse mvu, kechamvule temi nmula kethyü le temi nme nti ge chwiryüo temi nmu la, ai kenrun nyu khikeshü gü we temi kechon le mu kela genyu ryüo temi thyü ntsen njülo.

¹⁷Lo temi nme le mu kela genyu kesi le temi aphu so gon tinla yatselo, tsünyeki shwikenjün lo ketsen kenrun nyu pe n kesükela thyü keshü hyukelonyu we temi nme Jisu Khrista genyu rhünlo-o gon tsentsü ti.

¹⁸Tson-o temi nme le mukela genyu temi aphu nmu kela hontse kenrun nyu khikeshü kentsen tho nme genyu temi thyü njÜ pe kethonthen kerhün nyu shü kelo ai ryü.

¹⁹Lo temi nme le Sunggigü jo zen mvukela genyu temi kechon no mukela hontse temi nme le Sunggigü jo zen kelo genyu temi kechon thyü ntsenlo ti.

²⁰Tejvü gwünkerho no chonlo nrün genyu tejvü gü le ryü, ai kemu le chon kethyü bin nyu shwikenjün gü ai chon kvu laso.

²¹Tsühontse kemu le kesi nyu gon kethyü hontse kethonthen rhünlo nrün genyu kentsen sen-o shwikenjün gü no Npugü Jisu Khrista genyu gon ti.