Read Southern Rengma Naga ROMNYU 7 Bible Online

ROMNYU 7 - Southern Rengma Naga bible

ROMNYU 7

¹A sikezenyu dan, hagun le tejvü gü sha kebin genyu ale hagun ka zo hünyo. Temi le rhün kebin then tejvü gü tsüle a-so gon bin hü nyo.

²Tenunyu kalu kelanyu le a-nyepvü le rhün kebin then tejvü gü le a-so gon bin hü nyo, ai a-nyepvü le sila yatselo a-nyepvü le a-khin sen kebin tejvü gü tsü nken chwila hünyo.

³Tson-o a-nyepvü le rhün kebin ka a-le peche kecha zen-o yhun tinla yatselo a-le keyüla gi letse ti; ai a-nyepvü le sila yatselo a-le peche kecha nme ka kalu ai a-le tejvü gü nyu njü bin nyo.

⁴Tsühontse apvünyu dan, hagun ai Khrista min gü genyu tejvü gü kipon sila so; tsüle kechamvule Sunggigü danzin kipon nsha nshalo nrün genyu hagun no kecha nme tsügü tsüle kesinyu dan nyu rhünni kelo gü zen-o yhun tinla nrün genyu.

⁵Kechamvule nduka nne thyümin nyu kehü ka nno kesi kipon nsha nshalo nrün genyu tejvü gü kesun keshü kemu gü kenyü dan nmin ge thyü shü hü.

⁶Ai ntsoka we nduka nphin sen kebin gü kipon sikela genyu nle tejvü tsügü nken chwi laso; tson-o nle tejvü whe gü nyu mvule Kapu gü nyu keyhun keshün sen-o Sunggigü lothyü hü nyo.

⁷Tsonlo nle nyu zo mon? Tejvü gü tsüle mu le? N mvu shü! Ai tejvü gü kemvu we, ale kemu tsü shamvu nrün, tejvü gü tsüle, “Nle tha tepen nya,” tsekethyü zoshü kemvu we tha ketepen le dihontse kethyü nme yo ale shalo ho.

⁸Ai kemu henkegwa ki tejvü gü nyu zokeshü genyu anyun nyu tha ketepen aphu thyüshü; kechamvule tejvü kendi we kemu le a-kesi.

⁹Ale nduka gwüngwa nme tejvü sen mvuo yhun; ai tejvü gü le ryü ntsin kemu gü tsüle rhünlo la; lo ale sila.

¹⁰Lo me thyü nrhün shü titse kethyü johokeshü gü le a genyu we kesi laso, tsekethyü ale shalo.

¹¹Kechamvule kemu henkegwa ki tejvü gü nyu zokeshü jogü genyu a sala, lo tsüle a dushvula.

¹²Tsügenyu tejvü gü le nshün, lo johokeshüe nshün njü lo gwa.

¹³Tsonlo thakegwa tsügü tsü genyu ale sila ole? N mvu shü! Tsügü tsüle kemu genyu; kemu le thakegwa tsügü sen-o a thyü pe kesi den zin shüla. Kechamvule johokeshü jo gü genyu kemu le gwamvuri tsin kethyü tsin tsentsü shü nrün genyu.

¹⁴Lo tejvü gü we Kapu danzin tsekethyü nle sha bin nyo; ai a we a jwen pe kemu hensin shü kela kesi thyümin.

¹⁵Lo ale a npvü ale thyü kehügü shamvu, kechamvule ale thyü kenyü gü thyülo hümvu; ai thyünyü kemvu gü thyüla la tse kehü genyu.

¹⁶Lo ale thyünyü kemvu dan thyü hü ai ale tejvü gü tsüle gwa letseo a-zen-o kejorhün hünyo.

¹⁷Tsügenyu ale thyü kehü tsügü tsüle ale mvule a kipon kebin kemu gü le a-npvü.

¹⁸Kechamvule a ge; tsügü tsüle a thyü amin nyu thakegwa nme ndi tse kethyü ale shabin laso; thakegwa thyü titse rüchün bin hü, ai ale thyülo hü mvu.

¹⁹Tson-o thakegwa ale thyü kenyü gü tsü thyü hü mvu; ai tha gwakemvu ale thyünyü kemvu gü tsü thyüla la tse hünyo.

²⁰Lo ale thyünyü kemvu gü thyü hü ai tsüthyü kehü gü tsüle ale mvu, ai akipon kebin kemu gü le.

²¹Tsügenyu ale tha kegwa thyünyü keso ka gwakemvu le a khoka bin lola kehü jvü nme shalo so.

²²Lo anyun nyu Sunggigü jvügü le a kenyü laso.

²³Ai tejvü kecha nme le amin ge anyun ki kebin jvü gü zen kenren-o a-ten zen gü do thyüla kehü tsü shalo laso.

²⁴O, a hile temi rüsürükhü nme le! Segü le aten sen-o kesinyu güzhü kela min hinyu a süshwi shü tila?

²⁵N gun Npugü Jisu Khrista genyu Sunggigü shwen bin nyo! Ale a npvü anyun pe Sunggigü jvü gü lo thyülo gwa, ai a thyü min pe kemu jvü gü lothyü hü nyo.