Read Southern Rengma Naga ROMNYU 8 Bible Online

ROMNYU 8 - Southern Rengma Naga bible

ROMNYU 8

¹Tsügenyu ntsoka we Khrista Jisu kipon kehünyu nmu kethyü ndi so.

²Kechamvule Khrista Jisu nyu kehü kerhünronzin Kapu jvü gü le kemu lo kesi jvü gü nyu a hoshü kela genyu.

³Lo tejvü gü le thyümin genyu kvumvuo thyü loho kela gü Sunggigü le thyü laso. Tsügü tsüle a-npvü a-nyugü nipe a-no kemu thyü ngwao kemu rüla denzin a-thyü ge kemu gü nmu laso.

⁴Kechamvule nle thyü min kipon hü mvule Kapu gü denzin hü kelanyu dan no tejvü nyu thyü mvulo keshvü kenjü dan thyü penlo nrün genyu.

⁵Kechamvule thyümin kipon yhun kehü nyu le thyümin phin rüchün bin hünyo; ai Kapu kipon yhun kehünyu le Kapu gü phin gü rüchün bin kehü genyu.

⁶Thyümin phin kendo kerüchün gü tsüle kesi, ai Kapu phin kerüchün gü le kerhün lo nyun kebwen kipon.

⁷Kechamvule thyümin kenyü yhüdyü le Sunggigü shwinyü kemvu thyüla kehü genyu; lo tsüle Sunggigü jvü hensin bin hü mvu lo bin-e loho.

⁸Lo thyümin kipon kehünyu le Sunggigü kenyü thyü lo nrün ndi.

⁹Ai Sunggigü Kapu le hagun nyun nyu bin yatselo, hagun le thyümin kipon mvule Kapu gü kipon bin laso; lo temi ligü higüe Khrista Kapu gü kendi nyu le a-hon mvu.

¹⁰Ai Khrista le hagun nyun nyu bin yatselo, kemu genyu hagun min le kesi yatse ai kentsen genyu hagun kapu le kerhün kipon bin laso.

¹¹Keshanyu laka kesinyu dan nyu Jisu thyü nrhün kelo Kapu gü le hagun nyun nyu binlo, kesinyu dan nyu Jisu thyü nrhün kelo gü npvü, hagun nyun nyu kebin a-kapu gü genyu kerhünronzin khipe sila lo kegwa hagun min ge shüti.

¹²Tsügenyu a pvünyu dan, nle nthyü min kendo thyü yhun tile tseo thyümin pu pvü bin mvu.

¹³Hagun le thyümin kendo zen-o yhun hü yatselo siti, ai hagun le Kapu gü pe thyümin tho dan boshvula yatselo hagun le rhünlo ti.

¹⁴Kechamvule Sunggigü Kapu gü le a-tsontsin zen hü kela dan aphu, tsüdan le Sunggigü nyenyu thyü kelasi genyu.

¹⁵Lo hagun le nshvu nrün kipon do kethyü kapu hyulo mvu, ai Sunggigü nyu thyükelo kapu hyulo laso; tsügenyu nle nrao, “Abba! Apvü!” tse ko hünyo.

¹⁶Nle Sunggigü nyenyu thyülo laso tsekethyü Kapu gü le a-npvü n kapu gü zen-o jünzo bin hünyo.

¹⁷Lo nle a-nyenyu thyülo yatselo, a-kenya gwenlo tiso, lo tsügü tsüle Sunggigü kenya dan Jisu zen kerhün-o tsü gwen ti, nle a-zen kenjünthyülo yatselo a-zen-o zankechwi ai thyü ti.

¹⁸Lo ale kesha le hizonka kenjün thyü kebin dan rüchün pe siki ntesha shün nrün zankechwi kethyü dan zen-o kendyülo kümvu letse bin nyo.

¹⁹Kechamvule nyhun keshü dan aphu Sunggigü nyenyu dan tesha shü nrün gü khwen-o nrin nnyun bin nyo.

²⁰Nyhun keshü dan nmu pe thakon thani kemvu thyüla, anyugun npvü anyugun kendo genyu mvu, ai tsühontse kethyü Sunggigü kendo kela genyu, tson ai anyugun sidyü higü le bin.

²¹Tsügü tsüle nyhun keshü dan ko shvula lo kegwa dogü nyu anyugun süshwi pe Sunggigü nyenyu dan le a-kendo thyü zankechwi kethyü tsü kenjünlo nrün genyu.

²²Lo ntsoka-e nyhun keshü dan aphu a-kethyü pvüo kengüo ayaya tse bin kehü nne shabin nyo.

²³Lo tsühontse kethyü ntimvule Kapu sha keri n gun hi ai nleyi pe a-nyenyu thyülo nrün gü khwen-o nnyun nyu ayaya tse bin hünyo.

²⁴Kechamvule sidyü le bin tse kethyü ketenyen genyu kenikelo gwünzin; tson ai hyulo kelagü tsü lope sidyü letse hü mvu. Lo segü le hyulo kelagü hyulo titse nrin bin hü nla?

²⁵Ai nle hyulo mvu zun kethyü gü hyulo nrün tenyen bin yatselo, nle nyhenhio tsügü khwen binlo hünyo.

²⁶Tsühontse Kapu gü ai nle kvu kemvu ka n kecheshü hünyo; kechamvule nle hilo mvulo keshvu ka ai hilo sha hü kemvu genyu; ai Kapu gü le a-npvü nsun thyüo ayaya tse bin hünyo; tsüle temi khwen jo nyu zoshwilo nrün ndi.

²⁷Tsüntimvule nnyun kese kehü gü Sunggigü le kapu gü kerüchün sha hünyo, a-le Sunggigü kendo hontse kenshün nyu genyu hibin kehü genyu.

²⁸Lo Sunggigü so lo rühvu kehü , a-le ndukanyu rhinhi pe bin kela gü genyu ko kelo dan genyu we tha lihi thyü yatse ai anyugun genyu kegwa tsekethyü nle shabin nyo.

²⁹Kechamvule a-le ndukanyu tsüdan shao tsüdan no a-nyugü hontselo nrün genyu a-le nchwenyu tsüdan ndo sen bin laso; tson-o a-nyugü no a-pvü nyu kechon dan nyu nyuri gü thyülo nrün genyu.

³⁰A-le nchwenyu rhinhi sen bin kela dan, tsüdan kolo, lo a-le kolo kela dan; tsüdan thyü pe ntsen-e lola, lo a-le thyü ntsenlo kela dan, tsüdan no zankechwi-e thyülo laso.

³¹Tsonlo nle tha higü rüla nyu zo mon? Sunggigü le nkipon yatselo, segü le n ntsunlo gwa tila?

³²A-npvü a-nyugü ai khishü tepen mvutse n gun aphu genyu khishü kelagü, a-le tha aphu pe a-nyugü sin-o kenrun nyu pe ntsüshü mvu ti ole?

³³Segü le Sunggigü le kejülo kelanyu dan nmu logwa ti la? Anyugun le njü letse kezo gü tsüle Sunggigü.

³⁴Segü le n nmulo gwa tila? Tsügü tsüle silao kesinyu dan nyu rhünnilo, tson-o gungü Sunggigü ben njüzin bin-o ngenyu hizin bin kehü gü Khrista Jisu.

³⁵Lo segü le Khrista le nkeso nyu nsükho sen tinlo gwa tila? Kenjün kethyü, nmvue shekese, nmvue n nshwen kethyü, nmvue chenda, mvue rhokedyü, nmvue kenshvu, nmvue zhethon le thyülo gwa ti ole?

³⁶Ketsinlesü nyu thu kenjü le hihontse: “Ngenyu meno jongwün agun dushvu; mele agun khipe tanyü dushvu gü kezhü hontse thyü.”

³⁷Nmvu, tha hidan hi aphu nyu ai nso kehü gü genyu nle kvukelo soki ai kvulo hünyo.

³⁸Tson-o kesie kerhün-e, tsangge jolonyu-e, Npu kethyü dan-e, hizonka kebin dan-e, hisiki ryü nrün dan-e, kekvu dan-e,

³⁹ketetso-e, kentsun-e, nmvu ai nyhun keshü kecha lihi-e n Npugü Khrista Jisu nyu ntesha keshü Sunggigü keso nyu tsü nsükholo nrün ndi tsekethyü ale sha tsentsü laso.