Read Southern Rengma Naga ROMNYU 9 Bible Online

ROMNYU 9 - Southern Rengma Naga bible

ROMNYU 9

¹Ale Khrista nyu joketsin zo hünyo, ale nku bin mvu, tsekethyü anyun gü le Kenshün Kapu gü nyu ajün zo bin nyo.

²Ale anyun gwamvu sa, lo anyun kenjün thyü zin bin hünyo.

³Kechamvule thyülo gwa yatse kethyü we thyümin kipon a tsasikezen nyu lo a tsipwen dan kenilo nrün genyu Khrista no a swe tsülao a khela lotse lati atale tson keloi kemvu.

⁴Anyugun le Israel nyu, tsüdan le a-nyenyu dan, a-zankechwi kethyü, kejozenkelo dan, tejvü gü khikeshü, Sunggigü kerüshvu, lo Sunggigü le zope bin kenjü dan-e, tsüdan hon.

⁵Lo bon nyu dan ai anyugun bon nyu, lo thyümin kipon rüchün gunlo anyugun ge Khrista le yhun ryü le. A-le aphu so Npugü, lo kethonthen kengvü ketsin Sunggigü le! Amen

⁶Ai Sunggigü jo gü le a-kenrun thyüla titse kethyü kon mvu. kechamvule Israel ge yhun chwikeryü dan aphu Israel nyu kü kemvu genyu.

⁷Lo Abraham tsipwen aphu Abraham nyenyu kemvu, “Ai Isak ge n tsipwen letse koti,” tsekethyü genyu.

⁸Tsügü tsüle a-kon le thyümin nyenyu dan le Sunggigü nyenyu dan mvu; ai zope bin kenjü gü nyenyu dan we a-tsipwen letse la.

⁹Kechamvule zope bin kenjü güle: “Higwünkho ka ale ryü ti, lo Sara le tsükatsü pechenyu nme nnyu zen bin ti,” tson kethyü thu pe bin njü.

¹⁰Lo tsüntimvule Rebeka ko temi nme tsügü tsüle nbon Isak nyuphou pvülo.

¹¹Tsükatsü Sunggigü le nchwenyu me kejükelo a-kendo le thatho dan genyu mvule, nkokelo gü kendo titse kethyü genyu, a-nyu hvu nnyu kelo mhundyü kegwa keshvu thyüla kemvu kanyu;

¹²tenu tsügi ka peshügü no nchegü lothyüti tse kethyü zo njü.

¹³Lo a-le, “Jakob we so, ai Esau we nrhi,” tse kethyü thu njü.

¹⁴Tsonlo nle nyu zo mon? Sunggigü kipon njü kemvu le bin le? tsonmvu shü.

¹⁵Kechamvule a-le Mosa ka, “Ale shwi njün kehünyu shwinjün ti, lo ale so kehünyu soti,” tse zo njün nyo.

¹⁶Tsügenyu temi kendo nyue mvu, nmvu ai nyhen kethyü genyue mvu, ai Sunggigü nshwikenjün genyu.

¹⁷Tsühontse ketsinlesü le Faro ka, “Ale nge a kekvu khipe me tesha shü nrün lo a zan pe kazü aphu nyu sha gunlo nrün genyu a kendo tsügü tsü thyülo titseo ale n penso keshü le,” tson njü.

¹⁸Tsühontse Sunggigü le shwi njün kenyünyu shwi njün shü hünyo, lo senyu nyun thyü pe rü nyü yo tsünyu nyun thyü rüla hünyo.

¹⁹Ai nle aka hon zo so ti ado, “Tsonlo Sunggigü le nyu thyüo me nmu hü nla? Kechamvule temi segü le a-kendo nkenlo tila?”

²⁰Ai nle temi, Sunggigü zen kenyon kehü hile nle segü la? Kanyü thyü kelo dan le a-thyü keshü gü ka, “Nle nyuthyüo a thyü pe hihontse lala, tson ti ole?”

²¹La kethyü gü le gin thün nme ge peha lope a-min ketsen kanyü thyü, lo peha lope a-min kenne kanyü thyülo kegwa gin ge kekvu ndi ole?

²²Lo Sunggigü le nyunkekhü lo akekvu pe me hishü nyü bin yatse ai nkela kekü a-nyun kekhü hyula lokekü dan ge-e a-nyun thonsao nyhenhi bin mvu ole?

²³Tsüle kechamvule nchweki nyu nno zankechwi thyü nrün kejü sen kehü shwikenjün fü kehü dan ge a-kegwa kebin pe me teshashü titse kethyü genyu.

²⁴A-le Judanyu dan nyu nti mvule Juda kemvunyu dan nyu ai anyugun kolo laso.

²⁵A-le Hosea lesü nyu zo kenjü le hihontse: “Nduka a temi kemvu dan Ale tsüdan lope ‘A temi’ letse koti. Lo nduka ale so hü kemvugi ka ‘keso gi’ tse ko ti.

²⁶Lo nduka ‘hagun le a temi kemvu le,’ tse so kehü bin nyu ai anyugun no rhün bin kehü Sunggigü nyenyu le tse koti.”

²⁷Lo Isaya le Israel nyu rüla zo-o: “Israel nyu nyenyu le chon pe züda nyu hachon hontse bin yatse ai kenikelo hyulo nrün dan we a-sen keshanyu nti ti.

²⁸Kechamvule Npugü le kazü higü jün pen whütse lao a-jo thyüpenlo nrün genyu.”

²⁹Isaya le nchweki nyu, “Danda dan Npugü le ntsipwen peha nsen pe ntsi thyüshü kemvu we, nle Sodom hontsela tsentsü lo nthyü pe Gomora hontse kelai,” tse zope bin njü.

³⁰Tsonlo nle nyu zo mon? Juda kemvunyu dan le Sunggigü mhundyü nyu ntsenkelo fü mvutse ntsenkelo hyulo, tsügü tsüle ketenyen genyu hyukelo kentsen.

³¹Ai Israel nyu dan le tejvü nyu ntsenkelo fü anyugun nyun kenkhi thyü tseo gü tejvü tsü tilo mvu laso.

³²Nyu genyu la? Anyugun le ketenyen sen mvuo anyugun tho sen-o fülo nrün hontse kethyü genyu anyugun le, “Me pha kensü tsogü,”ge anyugun pha nsü laso.

³³Tsü rüla hihontse thu njü, “Hire, ale phakensü tso nme khipe Sion ge shü njü nyo, anyugun no tso tsügü ge pe kerheo nto ti. Ai temi ligühigüe a tenyen kelo gü we kejopvüla loho.”