Read Southern Rengma Naga 1 KORINTHIANYU 10 Bible Online

1 KORINTHIANYU 10 - Southern Rengma Naga bible

1 KORINTHIANYU 10

¹Lo apvünyu ju, nduka nbon nyu dan aphu nmha hensin züda pvüthü chwi kethyü ale hagun no shanyü.

²Lo anyugun aphu Mosa denzin nmha gü lo züda gü nyu baptaiz thyü külo.

³Lo tsüdan aphu kapu chvü nme tyü kü.

⁴Lo anyugun aphu kapu zü nme tsü kü. Kechamvule anyugun sithen kehü kapu Tsonye gü ge chwikeryü zü tsükü kethyü genyu, lo Tsonye tsügü tsüle Khrista.

⁵Tson ai Sunggigü le temi tsüdan kechon ge a-kenyü mvula, tsügenyu tehen nyu anyugun no sila.

⁶Tsüdan le tha tepen rüsi kethyü hontse nno tha gwakemvu tepen rüsi mvulo nrün genyu, nno petsülo lotse kethyü tsinhi nme thyü shü.

⁷Nmvue tsüdan peha hontse teromen kezü rüshvu kehünyue thyü tinla nya; tsüdan rüla thu pe bin kenjü le hihontse: “Temi dan le bin-o tyütsülo njüo sogü nashü tinla.”

⁸Nmvue tsüdan peha le keyülao khenyüme jon nyü temi yie nki kenshen le sikela hontse, ngun ko tsüdan hontse keyüla mvulo tinu.

⁹Nmvue tsüdan peha le Npugü semen-o peri no anyugun ndushvu kela hontse ngun we tsüdan hontse Npugü semen mvulo tinu.

¹⁰Nmvue tsüdan peha le tha kenyon shüo temi nkela kehü gü no tsüdan nke kela hontse ngun we kebükerü nya nu.

¹¹Temi tsüdan ge tha tsüdan thyü kela nno hyuo petsülo nrün tsinhi nme, ai a-gwünkho kekhin gü ka keyhun nyu ngun senzhü shü nrün genyu tsüdan thu njü nyo.

¹²Tsügenyu temi ligühigüe solo sele tse rüchün kehü gü no chela mvulo nrün genyu petsülo nye.

¹³Temi le shahü kemvu, kesemen le hagun semen la mvu, Sunggigü le joketsin kezo gü, lo a-le hagun no nyhen lo kegwa nye kerüche no hagun semen loho; tson kethyü gü mvule kesemen le gunkeryü ka a-le hagun no tin chwilo nrün tson ndoshü hünyo.

¹⁴Tsügenyu akesonyu dan, hagun teromen kezü kerüshvu tsü nrhilo nye.

¹⁵Ale hagun le tha keshanyu letseo hagun ka zo hünyo; hagun npvü ajo rüchün shwita.

¹⁶Nle khipen-o jochü kehü jochü honpen gü tsüle nle Khrista zi gü nyu kengü nme kethyü zansü nme mvu ole? Nle boshwen tyü kehü tensü pvü gü tsüle Khrista min gü nyu kengü nme kethyü zansü nme mvu ole?

¹⁷Kechamvule tensü nme, tsühontse n gun temi kechon le min nme, kechamvule nle kengüo tensü pvü nme nti kenjün tyü kehü genyu.

¹⁸Israel nyu rüla rüchün shü shwi; tha pe rüshvu keshü dan tyü kehünyu le kershvubin gü nyu rüshvu shü kethyü gü zen-o kengü kepvüshen bin mvu ole?

¹⁹Ale tsü pe nyundyüo zo bin nla? Ketyüketsü pe teromen kezü kerüshvu le thakon le, nmvue teromen kezü tsüle thakon le?

²⁰Nmvu, ale zo kebin gü le Khristian kemvunyu dan le tha pe rüshvu kethyü le anyugun le tero gwakemvu rüshvu bin nyo, lo Sunggigü rüshvu bin mvu, ale hagun no tero gwakemvu dan zen keme kethyü tsü akendo mvu.

²¹Hagun le Npugü honpen gü lo tero gwakemvu dan honpen au nyu tsü kesinlo nrün ndi. Hagun le Npugü miz ge lo tero gwakemvu dan miz au kenyhun nren ge tha tyülo nrün ndi.

²²Hagun le Npugü nyun gwünkekhen pe a-no a-yhüthyü lati ole? Ngun le a-nyeki kvu ole?

²³“Ngun le tha lihi thyü titse ai nkekhin ndi,” anyugun le tson zo hü. Tsü le ketsin, ai tha aphu nkechwi le bin kü mvu. “Ngun le tha lihi thyü titse ai nkekhin ndi,” ai tha aphu nthyü nso küshü hü mvu.

²⁴Temi nme-e a-npvü a-genyu kegwa gü fü nya ai a-kazonkazin genyu kegwa fülo nu.

²⁵Thyü kejwen bin nyu tha lihi jwen bin yatse ai nnyun nkhi-o tha lihi ketso bin nya, ai hei tyülo chi.

²⁶“Kechamvule kazü higü lo hinyu kebin aphu Npugü hon kethyü genyu.”

²⁷Keshanyu laka tenyen hü kemvunyu nme le hagun no gü holo tse hagun ko-o hagun le günyü lo hagun nyun ki a-zü le a-zümvu yo tsekethyü ketso mvu tse tha khipe hagun ketsü tsü tyülo nye.

²⁸Ai peha le hagun ka, “Higü hile teromen kezü rüshvu kela hon le,” tsonzo yatselo zo pe hagun zen keshü gü phin kerüchün genyu lo a-kerüchün genyu hagun le tha tsügü tyü nya.

²⁹Tsüle nkerüchün kemvu ai kechanyu kerüchün. Lo nyuthyüo kechanyu kerüchün nme genyu akekhin ndi kela hi nmulo gwa tila? tse ketso bin lo gwa.

³⁰Lo ale Sunggigü shwen-o tyü bin yatselo, nyuthyüo meno ale shwen kebin gü nkhinlo gwa tila?

³¹Tsügenyu hagun tha tyütsü nmvue tha lihi thyü hü ai Sunggigü zankechwi genyu thyü külo.

³²Hagun le Judanyu metse Griknyu metse nmvue Sunggigü kehun dan-e no hagun genyu phakensü thyü nya.

³³Ale a npvü aphin ajün kegwa fü mvule temi kechon kenilo nrün genyu temi kechon phin kegwa füo tha lihi kethyü aphu nyu temi aphu kenyü thyü titse fü hünyo.