Read Southern Rengma Naga 1 KORINTHIANYU 12 Bible Online

1 KORINTHIANYU 12 - Southern Rengma Naga bible

1 KORINTHIANYU 12

¹Lo apvünyu ju, ale hagun no Kapu le khishü kehü dan shamvu tse bin nyü mvu.

²Hagun le nduka khristian thyü kemvu ka thame rüchün mvutse jozolo keho teromen kezü dan kipon hü kethyü hagun npvü tsü shabin ti.

³Tsügenyu temi ligühigüe Sunggigü Kapu nyu tha kezonyu le, “Jisu swetsü,” hü mvu, lo Kenshün Kapu gü kemvu we temi nme-e “Jisu le Npugü,” letse kethyü zohü mvu tsekethyü hagun no sha nyü.

⁴Lo Kapu le khishü kehü le kechacha le bin; ai Kapu gü we nme.

⁵Tson-o lotho-e kechacha kethyü le bin; ai Npugü we nme.

⁶Lo thatho ai kechacha kethyü le bin, ai tsüdan nyu tha aphu khishü kehü gü le Sunggigü.

⁷Ai Kapu tho khipe temi ligühigüe tsü keshü le temi aphu kechwi genyu.

⁸Tson-o Kapu nme tsüge tedo kegwa pe peha tsü, lo thakesha jo zolo kegwa pe peha tsü.

⁹Lo Kapu tsügü ge ketenyen pe peha tsü, lo Kapu tsügü ge me thyü kesherhünlo kegwa pe peha tsü,

¹⁰ndun kethyü tho thyülo kegwa kekvu pe peha tsü, lo sidyü jo zolo kegwa pe peha tsü, lo Kapu dan sha kekholo kegwa pe peha tsü, lo khwen tseryü zolo kegwa pe peha tsü, lo khwen tserü tsüdan kon zoshülo kegwa khipe peha tsü laso.

¹¹Hi aphu Kapu nme le a-npvü a-kendo thyüo kenjün kekho kü pe me tsüshüo aphu nyu tha thyü bin hünyo.

¹²Lo min güle nme ai a-zan ketho kechacha kethyü kechon le bin hünyo, lo min nme ge a-zan ketho kechacha kechon le bin ai aphu kesin pe min nme kethyü hontse Khrista rüla ko tsühontse le.

¹³Tson-o Judanyue Juda kemvunyue, me do kethyünyue medo thyü kemvunyue kengüo min nme thyü nrün genyu Kapu nme nyu baptaiz thyü külo laso, lo ngun aphu no kengüo Kapu nme nyu tsü külo laso.

¹⁴Tsüntimvule nmin le zan nme nti mvu, ai kechon pe thyü njü.

¹⁵Keshanyu laka npha le, “Ale me ben kemvu genyu me min ge zan nme kemvu le,” tson bin ai me min ge zan ketho nme thyümvu keloi mvu.

¹⁶Tsühontse me nyetin le, “Ale me yhütyü kemvu genyu me min ge zan ketho nme kemvu le,” tson bin ai a-le me min ge zan ketho nme thyü mvu keloi kemvu.

¹⁷Nmin aphu no nyhütyü thyü küla yatselo nyu lope tha khwen nyü mon? Nmin aphu no n nyetin thyüla yatselo nyu lope tharün sha mon?

¹⁸Ai Sunggigü le a-npvü a-kendo thyüo a-zan ketho kechacha kethyü dan khipe nmin ge shüla so.

¹⁹Ai tsüdan aphu no zan nme nti thyüla yatselo nyu lope nmin thyü mon?

²⁰Tsühontse zan kechon le bin ai min nme.

²¹N yhütyü le npha ka, “Ale nsen mvu ai gwa,” tse zolo nrün ndi, nmvue nben le npha hvuka,“Ale hai sen mvu ai gwa,” tse zolo nrün ndi.

²²Tsonkethyü gü mvule nmin ge zan ketho kechacha kethyü kvukemu hontse kethyü gü ai sen mvulo shvu tsin hü nyo.

²³Lo nle nmin ge zan kechacha kethyü dan nyu rüchün nshe kehü dan, nle tsüdan tsü ai rühvuo hen kezegwa thyü pvü bin hü nyo, tson-o a-ge zan ketho keshvunyu no zegwa kvu bin hünyo.

²⁴Ai n ge zan kegwa dan we a-kehen sen mvue gwa, ai nge teshwen kendi zan ketho dan no teshwenpvülo nrün genyu Sunggigü le nmin thyü keren pe tsühontse shü laso.

²⁵Tsügenyu min gü ge kenjün kekho kethyü ndi, ai zan kechacha kethyü tsüdan le khinyu khinyu phin rüchün bin hünyo.

²⁶Lo nme le kenjün thyülo yatselo kechanyu ju aphu tsügü zen-o kenjün thyü hünyo; lo nme le teshwe pvülo yatselo kechanyu aphu a-zen-o a-kenyü kü hünyo.

²⁷Ntsoka we hagun le Khrista min gü laso, hagun nmeme hile tsügü ge zan nme me le.

²⁸Tson-o Sunggigü le kehun nyu kejü küshü, kerigü le Apostel ju, kenyhun gü le sidyükesha ju, kenshen gü le senkethyü dan, tsüsika le ndun kethyü tho thyükelo dan, lo kehokenyü thyü kesherhün kelo ju, me keche kehü dan, me ketsen shü kehü ju, lo khwen seni zolo kehü ju ai khin nya.

²⁹Tsüdan aphu apostel kü ole? Aphu sidyükeshanyu kü ole? Aphu senkethyü nyu kü ole? Aphu ndun kethyü tho thyü kehünyu kü ole?

³⁰Tsüdan aphu me thyü kesherhün shü kehü jochü le bin kü ole? Aphu khwe seni sen-o jozo kü ole? Aphu khwen seni kon zo külo kehünyu ole?

³¹Ai jochü kegwa tsin dan nnyü tserülo nye. Lo tson ai ale tson kegwa tsin nme tsin pe hagun hishü ti le.