Read Southern Rengma Naga 1 KORINTHIANYU 14 Bible Online

1 KORINTHIANYU 14 - Southern Rengma Naga bible

1 KORINTHIANYU 14

¹Hagun keso, hü gunlo, lo sidyü jo zo kelogü tsü rüchün nchon-o Kapu ka hyulo kehü dan tsü fü tenge tselo.

²Kechamvule shakemvu khwen nyu jozo kebin gü tsüle temi ka mvu le Sunggigü ka zo hünyo, lo temi nme-e no a-khwen sha mvu le Kapugü nyu a-npvü jo kentsun zo bin kehü genyu.

³Ai sidyü jo zo kebin gü we, me thyü nsoshü lo methukeyhun shü lo me nyun thyü nbwen shü nrün genyu temi ka zo bin hünyo.

⁴Shakemvu khwen sen-o jozo kebin nyu le a-npvü a-thyü ngwalo hü, ai sidyüjo zo kehünyu le kehun thyü ngwa lo hünyo.

⁵Lo ale hagun aphu no khwen senni sen-o jozo kethyü le akenyü, ai hagun no sidyü jo zo kethyü we akenyü kvu, ai khwen seni sen-o jozo kebin güle kehun thyü ngwashülo nrün genyu a-kon ai zope mehi kemvu we tsügü nyeki sidyü jo kezo gü we gon kvu.

⁶Lo apvünyu ju, ale keshanyu laka hagun ki ryüo teshakeshü jo, nmvue thakesha jo, nmvue sidyü jo, nmvue senkethyü jo pe hagun ka zomvuo khwen seni nyu tha zotin la yatselo, agenyu hagun le nyu kechwi hyulo tila? Ale Sunggigü kipon yhenshwi keshü, nmvue thakesha nmvue jolo peha nmvue senkethyü senryü kemvu we.

⁷A-kerhünronzin kendi kanyü kheli nmvue a-ron kechon le kebin lü kethyü khin tsü ai a-khwen thyü kecha thyüshü mvu yatselo digü le digü khwe yo segü le shalo mon?

⁸Tsühontse shu khun petsü shü mvu yatselo, segü le teri thyü nrün genyu a-gwün ndolo tila?

⁹Tsühontse hagun ai meno shalo kegwa jozo shü mvulo, mele dihontse hagun jokezo shalo mon? Kechamvule hagun jokezo le tsangkenhi nyu tinkelai gwünzin lati.

¹⁰Kazü hinyu thakhwen kechacha kethyü le chon sa bin tsentsü, lo tsüdan nme ai a-kon kendi nme ndi.

¹¹Tsügenyu ale tha khwen gü kon shamvu yatselo ale jozo kebin gü mhundyü nyu tesin nme thyüla ti, lo jozo kebin gü ai amhundyü nyu tesin thyüla ti.

¹²Tsühontse hagun ai Kapu jochü dan, fü tserü kebin hontse, kehun thyü ngwa shülo nrü ai fü tenge lo.

¹³Tsügenyu khwen kechaki jozo kehü gü no a-kon ai zosin shülo nrün genyu hilo nye.

¹⁴Kechamvule ale shakemvu khwen sen-o kehithyü yatselo akapu le a-npvü kehi thyü hünyo, ai anyun kipon we thame shalo hümvu.

¹⁵Tsonlo ale nyu tsethyü tila? Ale akapu nyu kehi thyüti, ai ale anyun nyu ko kehi thyü ti, ale akapu nyu lüthyü ti, ai anyun nyu ko lüthyüti.

¹⁶Tson mvuo nle Kapu nyu nti jochü shü yatselo temi kechanyu le njo shalo mvuo nle Sunggigü shwen keshü nyu dihontseo “Amen” zolo mon? A-le nle nyu zo bin yo shalo mvu laso.

¹⁷Kechamvule n we Sunggigü shwen sashü binlo gwa ai me kechanyu we thyü ngwalo mvula so.

¹⁸Ale hagun aphu nyeki khwenkecha sen-o tha zo chon kethyü genyu ale Sunggigü shwen binnyo.

¹⁹Tson ai kershvuka nyu we khwen kechaki jo yietseryü kezo nyeki, me kechanyu ai senthyüshülo nrün genyu, athakesha kerüchün sen-o jo kon pvün nti kezo we a-kenyü kvu.

²⁰Apvünyu ju, tha kerüchün kipon we hagun ntsenyu thyüla nya, ai gwakemvu kethyü kipon we nyuhonyu hontselo, lo tha kerüchün kipon we peshünyu thyülo.

²¹Npugü le, “Ale khwen kecha nyu lo tesin mün nyu temi hidan ntho ti ale atemi dan ka zo ti, Npugü le tson zo. Ale tesin dan mün nyu jo zoti, ai tson-e atemi dan le akhwen nyü shü loho.” tson kethyü tejvü gü nyu thu pe bin njü nyo.

²²tsügenyu jo kecha zo kethyü we ketenyen nyu dan genyu mvule tenyenkemvu nyu dan genyu tha zansü nme le; ai sidyükesha jo kezo we tenyen kemvu nyu genyu mvule ketenyen nyu dan genyu.

²³Tsügenyu, keshanyu laka kehun nyu aphu gungü kequen-o a-khwen kechacha kethyü sen-o tha zo kü tinkela nme thyüo mishün nmvue tenyen kemvunyu peha le yüryülo, tsüdan le hagun le nnu tinla sele tse mvu ti ole?

²⁴Ai aphu sidyü kesha jo zo bin-o tenyen kemvunyu nmvue mishün nme le yüryü yatselo, tsüdan aphu genyu a-le a-npvü a-kemu shalo hünyo, lo tsüdan aphu genyu a-le a-rüla rüchün petsü lo hünyo.

²⁵Tson-o anyun nyu kebu pvü kebin dan khishwi shü hünyo, “Lo hagun dan nyu Sunggigü le bin ketsin,” tse kethyüzo-o nkhün tsügü Sunggigü rüshvu soti.

²⁶Lo dihontse mon? Apvünyu ju, hagun le gunryüo kequen kelo ka, hagun ligühigüe peha no lüthyü shü, peha no senthyü, peha no teshakeshü jo zo, peha no khwen kechaki tha zo, lo peha no tsüdan kon zoshülo, tha lihi thyüe me thyü ngwa lo nrün genyu thyülo nye.

²⁷Kehun nyu peha le khwen kechacha kethyü nyu jozo hü yatselo, mihvu nmvue chon ai mishen no zolo, lo tsüdan ai no keseri-o zolo, lo temi nme no a-kon zo kentsen thyüshü lo.

²⁸ai a-kon zokeshü temi ndi yatselo, anyugun no kehun nyu ntsema bin tinla; lo tsügü no a-npvü a-nthon lo Sunggigü nthon bin tinla lo.

²⁹Sidyükesha jo we mihvu mishen no zoshü, lo kechanyu dan we no ketsin le mvuyo nyülo.

³⁰Keshanyu laka a-khoka dun kebin nyu nme le teshakeshü jo nme shalo yatselo jozo kerigü no nra mvu bin tinla.

³¹Kechamvule hagun aphu nme me tse sidyükesha jo zo külo gwa, tson-o aphu no shalo, lo aphu no a-nyun pechelo nrün genyu.

³²Lo sidyükeshaju Kapu le sidyükesha ju zo zen hünyo.

³³Kechamvule Sunggigü le kevü keben kethyü gü mvule bwenye tse kethyü gü genyu; kenshün nyu kehun aphu nyu tsühontse bin hünyo.

³⁴Lo tenunyu dan no kehun nyu ntsema tse binlo' kechamvule anyugun no jozo mvuo tejvü gü nyu zo kehü hontse anyugun no me jozenlo lotse kehü genyu.

³⁵Lo anyugun le tha lihi-e shalo nyü yatselo, anyugun no ka ki anyugun nyepvünyu ka ketsolo. Kechamvule tenunyu le kehun nyu jozo kethyü le tha kejokepvü nme genyu.

³⁶Nyu letse? Sunggigü jo le hagun ka binzen shwi ole? Le hagun ka nti gunryü ola?

³⁷Hagun dan nyu ligühigüe a-le sidyükeshanyu nmvue Kapu temi letse rüchün hü yatselo tsügü no ale jo thu pe hagun ka shü kethyü dan rüchün-o tsüle Npugü johokeshü dan letse kethyü shalo nye.

³⁸Keshanyu laka ligühigüe jo hi nyü mvu yatselo tsügü khwen nyü nya.

³⁹Tsügenyu apvünyu ju, sidyükesha jo zonyü tenge lo, lo khwen kecha sen-o tha kezonyu-e khin nya.

⁴⁰Ai tha lihi thyüe thyükezü gü nyu kesithen to tseo thyülo.