Read Southern Rengma Naga 1 KORINTHIANYU 16 Bible Online

1 KORINTHIANYU 16 - Southern Rengma Naga bible

1 KORINTHIANYU 16

¹Lo Kenshün nyu ju genyu tha kequen kethyü rüla. Ale Galatianyu kehun dan no thyülo tse keshü hontse, hagun ai tsühontse thyülo nye.

²Npugü jon keri tsennyü temi ligühigü ai Npugü le khipe a-tsü keshü hontse khishülo kegwa kho khikho kecha thyü binlo; tson-o ale gunkeryü ka tha kequen bin mvu kelo thyülo.

³Tson-o ale gunryülo hagun le temi ligühigü ai tenyen-o kejü keshü nyu ale lesü thupe tsünyu tsüshüo no hagun le tha khikeshü dan sen-o Jerusalem nyu gunti le.

⁴Lo ako no gunlo gwa nrün hontse yatselo tsüdan no azen-o gunti.

⁵Ale Makedonia kazü pvüthü kegun rüchün bin nyo, lo ale Makedonia kazü pvüthü gun gü ti kelo sikinyu hagun ki gunryü tile.

⁶Tson-o ale gwüngwa hagun zen-o bin ti, tsangse gwünkho aphu hagun zen bin tinla-e shalo ho, lo tson-o ale lika hika njwen kela gü ai akeche, lo anishü nrün genyu.

⁷Ale ntsoka tsonne nyu hagun zen kehyu shüo tinla nyü mvu; kechamvule Npugü kendo yatselo, ale jon keshanyu hagun zen-o bin gwa kelo rüchün kebin genyu.

⁸Ai Pentekos jon keti we ale Efesa nyu bin ti.

⁹Kechamvule lotho thyülo kegwa kakhin kemhun nme khinshye pe atsü bin kela genyu, lo shwikerüchün nyu kechon ai tsü nyu bin.

¹⁰Lo Timothi le gunryülo, a-no a-nyun nkhi mvutse hagun zen bin kelo rüchünlo nye; kechamvule a-ko ahontse Npugü lotho thyü kehü genyu.

¹¹Tsügenyu temi nme ai a-nkhin nya, tsonkethyü gü mvule a-no a-nyun bwen-o aki rani gunryülo nrün genyu a-cheshü nye. Kechamvule a-le a-pvünyu ju zen ryü nrün ale khwen bin ti.

¹²Ai ngun pvügü Apola we, a-no ngun pvünyu kechanyu ju zen-o hagun ki ryülo tse ale a-ka zo tenge shü le, ai a-le hizonka ryü kethyü le a-kendo mvu shüla. A-le a-gwünkho hyulo yatselo gunryü ti.

¹³Hagun khwen binlo, ketenyen nyu tsekho binlo, peche binlo, lo nko binlo.

¹⁴Hagun tho aphu keso nyu thyü lo.

¹⁵Lo apvünyu ju, Stefana kaminyu le Akaya nyu a-nyun kelulo keri tsin nyu tsekethyü hagun le sha bin ti, lo anyugun le kenshün nyu dan keche titse kethyü anyu gwünkho hoshü laso.

¹⁶Ale hagun no temi tsühontse kethyünyu, lo kengüo lotho thyü kehünyu ligü higüe tsünyu sithenlo lotse kethyü tsinhi shü bin nyo.

¹⁷Lo Stefana lo Fortunata lo Akaika anyugun le aki keryü genyu akenyü sa bin nyo; kechamvule ale hagun nnyü kebin ka anyugun le hagun aphu sunthyü keshü genyu.

¹⁸Anyugun le anyun-e lo hagun nyun-e gwün nrhün keshü genyu. Hagun tsügenyu temi tsühontse kethyü nyu sha binlo nye.

¹⁹Asia nyu kehun dan le hagun kelushü le, Aquila lo Priskila au lo au kanyu kehun kehü dan ko tse Npugü zan nyu hagun kelushü le.

²⁰N pvünyu ju aphu hagun kelushü le. Kenshün nyu le kembo kehü jvü sen-o kembo-o khinyu khinyu kelushü nye.

²¹Ale Paul, a npvü aben pe hagun kelu keshü thu shü le.

²²Temi ligühigüe Npugü sohü kemvunyu no swetsü kelanyu thyüla lo. Agun Npugü, ryülo lo!

²³Npugü Jisu Khrista kanyu chwikeryü shwikenjün gü no hagun zen bin kelogü thyülo.

²⁴Khrista Jisu nyu a-keso no hagun zen bin kelogü thyülo nye. Amen.