Read Southern Rengma Naga 1 KORINTHIANYU 2 Bible Online

1 KORINTHIANYU 2 - Southern Rengma Naga bible

1 KORINTHIANYU 2

¹Apvünyu ju, ale himhundyü hagun ki ryüo Sunggigü rüla jo kentsun zope hagun hi kethyü ka ajo zokegwa nmvue thakesha sen ryü mvu.

²Kechamvule Jisu Khrista lo a-khipe krus ge hü kela jo gü nyeki hagun dan nyu thakecha nme ai sha loho tse ale rhilo kela genyu.

³Lo ale hagun zen kehü ka kvumvu lo nshvu ho tse lo ake nsü bin hü.

⁴Lo ale jokezo lo jünkezo nyu temi thakesha jozo kegwa sen-o zomvu le Kapu gü lo a-kekvu gü tsin pe hagun hishü.

⁵Lo tsüle hagun ketenyen no temi thakesha ge mvule Sunggigü kekvugü ge binlo nrün genyu.

⁶Tson ai ale peshü kelanyu dan nyu we thakesha jo zo hünyo; ai thakesha jo tsügü tsüle hizonka keyhunnyu thakeshagü kemvu, nmvue hizonka kekvu sen kebin nyu hisiki kenrun thyüla nrün dan thakesha-e mvu.

⁷Ai ale Sunggigü thakesha kentsun gü pe zo hünyo, thakesha tsügü tsüle nno zankechwi thyü nrün genyu nchweki ndo pe binla so.

⁸Nzonka keyhun nyu nme ai tsügü shalo mvu laso. Anyugun le tsü sha yatselo zankechwi kethyü Npugü pe krus ge hüla mvu nrün.

⁹Ai ketsin lesü le hihontse thu njü, “Nyhütyü pe hyulo mvu kela, nmvue n nyetin pe nyülo mvu kela, tha tsühontse kethyü dan Sunggigü le a-so kehünyu genyu ndo pe bin laso.”

¹⁰Ai ngun we Sunggigü le Kapu gü nyu tsüdan kehen shwipe n gun hishü laso. Kechamvule Kapu gü le tha aphu kese hünyo, Sunggigü rüla kentsun dan ai.

¹¹Kechamvule temi nyun ka kebin Kapu gü kemvu we segü le temi rüla shalo hü nla? Tsühontse Sunggigü Kapu gü le kemvu we temi nme-e Sunggigü rüla shalo hümvu.

¹²Lo nle Sunggigü le kenrun nyu khipe ntsü kela dan shalo nrün genyu kazü hinyu Kapu gü hyulo mvule Sunggigü ka nyu chwikeryü Kapu gü hyulo laso.

¹³Lo ale temi thakesha jo nyu senthyü mvule Kapu gü nyu senthyü hünyo, Kapu nyu ketsin gü kon zokekho pe Kapu le a-ge kebin nyu hi hünyo.

¹⁴Ai a-nyun nshünlo kemvu temi le Sunggigü Kapu gü le kenrun nyu khikeshü dan tsü lo hümvu, kechamvule tsüdan tsüle a-mhundyü nyu lihi kemvu, lo a-le tsüdan shalo nrün ndi, kechamvule Kapu nyu tsüdan rüchün kekholo kehü genyu.

¹⁵Kapu le a-nyun nyu kebin nyu le tha aphu rüchün kekholo hünyo, lo temi nme-e a-nmulo nrün ndi.

¹⁶ketsinlesü le hihontse zo njü, “Segü le Npugü nyun shao a-senthyü logwa tila?” Tson-e, n gun we Khrista nyun pvü hü laso.