Read Southern Rengma Naga 1 KORINTHIANYU 4 Bible Online

1 KORINTHIANYU 4 - Southern Rengma Naga bible

1 KORINTHIANYU 4

¹Tsügenyu temi ligühigü ai ale Khrista gonyu lo Sunggigü jo kentsun dan ntsen kehünyu letselo nye.

²Tsünyeki ai me hon kentsen nyu le meno a-tenyenlo kekünyu mvulo shvu.

³Ai awe hagun no nmvue jo kekera bin nyu a ketso titse kethyü tsüle tha lihi kemvu le, ale a npvüe a ketso hü mvu.

⁴Kechamvule ale a npvüe akemu nme-e sha kemvu genyu; ai tson le tseo ale ntsenlo la mvu, ai aketso kehü gü tsüle Npugü le.

⁵Tsügenyu Npugü le ryü kemvuka, a-gwünkho gü ti kemvu ka thame ketso nya. A-le kezün nyu tha kebu pe bin kenjü tsüe kehenshwi pe keben nyu shüti, lo me nyun kendo dan ai shalo ti, tsüka temi ligühigü ai Sunggigü ka nyu teshwen hyu loti.

⁶Lo apvünyu ju, ale hagun phin kegwa rüchün-o Apola ai ge tha zo kendyü shü le, tsüle hagun no ayi ge thashalo-o ketsinlesü jo dan gwünzü mvulo nrün genyu, tson-o hagun ligühigü ai no nme ge ai ketekho-o kechagü nkhinla mvu nrün genyu le.

⁷Kechamvule segü le nthyü pe me nyeki kecha thyüshü la? Nle meka nyu hyulo kemvu nyule bin nla? Tsonyatselo, nyu thyü meka kenrun nyuhyulo kemvu hontse kemakin hü nla?

⁸Ntsoka we hagun le hagun gin nyülo laso? Hagun le nnyalo laso? Agun sin mvu tse raja thyü bin laso? Hagun no raja thyü bin kela we ako a kenyü le, tson-o agun kono hagun zen-o raja thyülo nrün genyu.

⁹Akerüchün le Sunggigü le agun postelnyu dan thyü pe me nyeki keshen tsin dan me, mele nmuo boshvu lati tse kebin nyu hontsela sele tse bin nyo; kechamvule agun le kazü gü mhundyü nyue meno kenri-i thyü laso.

¹⁰Khrista genyu ale kenunyu thyü laso, ai hagun we Khrista nyu thakeshanyu thyülo laso. A we kvumvu, ai hagun we kvu, hagun we teshwe pvü loso, ai awe tetsin pvü laso.

¹¹Ntsoka keti ai awe nnyon lo teri bin hünyo, phi nya-e ndi, lo me benshvu ai pvü, lo abin zhü ai ndi.

¹²Lo ale a npvü aben pe tha thyüo kenjün thyü bin nyo; mele arho ai ale jochü pe me tsühü nyo, mele a nshwen ai ale nyhenhi bin hünyo.

¹³Mele azo nshvu ai ale me ge ajo gwa hünyo; a lope kazü hinyu kerhunyu hontse laso, ntsoka hi keti a lope kerhu ketsin nyu thyü laso.

¹⁴Ale hagun no kejolo titse kethyü genyu mvu ai hagun lope anyenyu a kesonyu hontseo hagun senzhü shü kenyü genyu ale jo hidan hi thu keshü le.

¹⁵Lo hagun le Khrista kipon hagun tsonketsinnyu yietseryü le bin ai hagun pvü hontse kethyü we chon mvu; kechamvule Khrista Jisu kipon Jolokegwa gü genyu hagun nnyu pe anyenyu thyü kelo genyu.

¹⁶Tsügenyu hagun cheno ai tsin pe hi keshü then külo nye.

¹⁷Hagun no tsühontselo nrün genyu ale Timothi nipe hagun ki shüle. A-le Npugü kipon ale a-tenyenlo kekü anyu a kesogü le, Kehun lika hika-e ale sen-o me senthyü kehü Khrista kipon senkethyü jvü tsüdan a-genyu hagun no rüchün nilo ti.

¹⁸Lo hagun peha le ano hagun ki niryü loho nrün hontse rüchün-o ketekho bin ti.

¹⁹Ai Npugü kendolo ale nshwen hagun ki ryü ti; lo tsüka ale temi ketekho kehü dan zo mvule anyugun kekvu shalo ti.

²⁰Kechamvule Sunggigü keda le jo nyu mvule kekvu nyu kebin genyu.

²¹Ano digü khisen-o hagun ka ryü tila? Thün sen ryü tile? Le kebwen Kapu gü nyu kesogü sen ryü tila?